«Հետը չէի խոսում, ինձ «թուրք» էր ասել»․ գեներալ Մանվելի եղբորորդին անկեղծանում է

ՀՐԱՊԱՐԱԿ | ԱԺ պատգամավոր, գեներալ Մանվել Գրիգորյանի հայրենի Արշալույս համայնքի գյուղապետը նրա ազգականն է՝ Զարզանդ Գրիգորյանը, ով համայնքը ղեկավարում է 10 եւ ավելի տարի: 2009-ին, երբ շրջում էինք այս համայնքում, մարդիկ Մանվել Գրիգորյանի մասին կա՛մ չէին ուզում արտահայտվել, կա՛մ էլ անգիր արած տեքստի պես շարում էին՝ «մեր գյուղի գեներալն ա, պատերազմի մասնակից ա, լավ մարդ ա, գյուղը հպարտանում ա իրա գեներալով»: Բայց բավական էր անջատել դիկտոֆոնը, մարդկանց երկյուղածությունը տեղի էր տալիս, ու լսվում էր հետեւյալ ֆրազը․ «Ախպոր պես, թարգի, հարցեր մի տուր, մեզ էլ շառի մեջ մի քցի»:

Իսկ այսօր, ինչպես պարզեցինք Զ. Գրիգորյանի հետ զրույցից, արշալույսցիները խրոխտ հոլովում են գեներալի անունը, անկաշկանդ քննարկում նրա հետ տեղի ունեցածը, թեեւ ԱԱԾ-ի բացահայտումից հետո շոկը դեռ լիարժեք չեն հաղթահարել: «Որ ասեմ՝ արշալույսցիները ողջունում են գեներալի արածը, կհավատա՞ք: Իհարկե քննադատում են, լցված են իր հանդեպ, ինչպես ամբողջ ազգը»,- նկատեց գյուղապետը: Զարզանդ Գրիգորյանը պնդում է՝ ինքը, լինելով համայնքի ղեկավար, մտքի ծայրով անգամ չի անցկացրել, որ հնարավոր է իր ղեկավարած համայնքում գտնվող գեներալի ամառանոցը ծառայի որպես «զինվորի փայ տուշոնկեքի ու սգուշչյոնկեքի պահեստարան»: Լավ, իսկ այդտեղ աշխատողները, որոնք պահածոները բացել-լցրել են գազանների առաջ, մի՞թե իրենց ծանոթ-բարեկամների շրջանում չեն արտահայտվել, թե ինչով են կերակրվում գեներալի կենդանիները: «Չեմ կարող ասել, քանի որ չգիտեմ, թե ովքեր են կենդանիներով զբաղվում: Երեւի ես էլ, հա՞, պետք է պատասխան տամ դրա համար, որ տեղյակ չեմ եղել: Ասեմ, որ դուք իրա հետ ավելի շատ եք շփվում, քան ես, բա դո՞ւք ոնց չեք իմացել: Նույնիսկ իրա ամենամոտիկ ընկերները չեն իմացել, որ ամեն օր իրար հետ հաց են ուտում, նստում-վեր են կենում, արտերկիր բուժվելու են գնում… Ես համայնքի ղեկավար եմ, բայց ես հո չե՞մ գնում-մտնում իրանց տարածքներն ու ստուգում: Ինքն իմ հոր փոքր ախպերն ա: Մենք իրար հետ, եթե ուզում եք անկեղծ ասեմ, 97 թվից՝ իմ հարսանիքի օրվանից, գժտված ենք, մենք էդ օրվանից հետո պրոբլեմ ենք ունեցել: Դրանից հետո՝ 2007 թվականին, մենք արդեն իրար հետ չենք շփվում, քանի որ ինքն ինձ թուրք ա ասել, ես էլ իրա հետ գործ չեմ ունեցել»,- պնդում է գյուղապետը: Իսկ ինչո՞ւ է թուրք անվանել: «Դե… քանի որ ես իր ասածները չեմ կատարել, ասենք թե՝ մեքենայի կալյոսները չեմ փոխել, կամակատար չեմ եղել: Ինքն էլ քֆրատու մարդ ա, քֆուր ա տվել, նեղացել ենք, մի քիչ էլ ագահոտ ա եղել, ու էդ ֆոնի վրա նեղացել ենք իրարից, չենք շփվում արդեն քանի տարի»:

մանրամասն՝ կայքում