«Մենք սաղից լավ ենք զգում մեզ»․ Առաքել Մովսիսյան

Shame.am-ը գրում է․

Ինչ Կարեն Կարապետյանը վարչապետ է նշանակվել, ՀՀԿ խմբակցության պատգամավոր Առաքել Մովսիսյանը (Շմայսը) բավական ակտիվացել է: Գուցե պատճառը հին մտերմությունն է, ի՞նչ իմանաս, բայց այսօր նա իր գերխնդիրն է դարձրել կրծքով պաշտպան կանգնել վարչապետին ամեն կարգի քննադատություններից: Այդ պատճառով էլ, երբ լրագրողները հարցրին Կարապետյանի՝ Հանրապետական կուսակցության անդամ դառնալու հնարավորության մասին, Շմայսն անմիջապես գրոհի անցավ։ «Կարող ա՞ գիտեք Հանրապետականը վարկաբեկված ա, ձեր իմացած մյուս թիմերն էլ եսիմ ինչ են։ Ժողովրդի քանակով նայեք դուք՝ Հանրապետականի կողմն ինչքան մարդ կա, նրանցը՝ ինչքան»,- ասաց նա՝ իր սովորության համաձայն քանակական առավելությունը գերադասելով որակականից։

Իսկ այնուհետև Առաքել Մովսիսյանն արտասանեց մի միտք, որը լրջորեն խորհելու առիթ պիտի տա: Նա ասաց. «Դուք անընդհատ շեշտում եք, որ Հանրապետական ա՝ չիմանան․․․ Թաքուն բան չկա ստեղ, մենք չենք էլ ամաչում, որ Հանրապետական ենք, սաղից լավ ենք զգում մեզ...»:

Շմայսը չի ամաչում ՀՀԿ-ական լինելու համար: Այսինքն՝ կարող էր նաև ամաչել, բայց մեծահոգի է, չի ամաչում ու վատ չի զգում: Մնում է հասկանալ, թե ՀՀԿ-ն ինչպես է արձագանքում Մովսիսյանի անձնազոհությանը: Հանրապետականն ամաչո՞ւմ է այն բանի համար, որ Շմայսն իր անդամն է, թե՞ այս դեպքում էլ գործ ունենք ներդաշնակ համակեցության հետ: