«Նրանց հարազատները հայհոյելու են մեզ, բայց դա ոչինչ չի նշանակում՝ պետք լինի զրահաբաճկոններով կշրջենք, սակայն, կոռուպցիա չենք հանդուրժի»․ փոխվարչապետի խորհրդական

Կոռուպցիան հասարակական շահերի դեմ ուղղված անմրցելի չարիք է: Այն այլասերում է հանրային հարաբերությունները, կեղծում վիճակագրական պատկերն ու օբյեկտիվ իրականությունը, իրար դեմ թշնամացնում բնական հակադիր շահեր ունեցող խմբերին, դանդաղաշարժ դարձնում պետական կառավարման համակարգը:

Իմ ծառայության մեկ ամսվա ընթացքում բոլոր այն հարցերը որոնք ծայրաստիճան լղոզված են՝ իրենց հիմքում կրում են կոռուպցիոն կասկածելի պատմություններ: Մարդիկ հայհոյում են իրար ու մեղադրում վաճառված լինելու մեջ (և ցավալիորեն գրեթե բոլորն իրավացի են մեկը մյուսի հաշվով):

Ուստի օրենքի ողջ խստությամբ մենք պետք է լծվենք կոռուպցիան արմատախիլ անելու գործին: Հազարավոր մարդիկ են անցնելու դատական դահլիճներով: Նրանք, նրանց հարազատները հայհոյելու են մեզ փողոցներում: Բայց դա մեզ համար ոչինչ չի նշանակում՝ պետք լինի զրահաբաճկոններով կշրջենք, սակայն, կոռուպցիա չենք հանդուրժի: Եվ, եթե կարիք լինի՝ ինքներս կկանգնենք դատարանների առջև, պետք լինի՝ կնստենք վերջում, բայց հանրային համերաշխության աճուկներում դրված այդ ռումբը կվնասազերծենք: Չի կարող քաղաքական ղեկավարությունը լավ կառավարել, եթե չունի կոռուպցիոն շահերից ազատ ապարատ, որը կզեկուցի ամեն ինչ՝ օբյեկտիվ տեսքով: Եվ մենք ունենալու ենք այդ ապարատը: