Ռուսներն անհանգիստ են հակառուսական տրամադրություններից

Ռուսաստանյան մամուլից

gazeta.ru-ն «Փաշինյանի նոր խոստումները Մոսկվայում: Հավատա՞լ, թե՞ չհավատալ» հոդվածում գրում է, որ «չնայած Մոսկվայում Փաշինյանի կողմից հնչեցրած բարեկամության մասին խոստումներին, շատ դիտորդների մոտ կասկածներ մնացին նրա իրական նպատակների մասին: Ամենաշատը անհանգստացնում է նրա շրջապատը, որտեղ առկա են բազմաթիվ դեմքեր , որոնք ունեն ընդգծված հակառուսական տրամադրություններ: Եվ դա այն դեպքում, որ հենց Ռուսաստանից և ռուսական ընկերություններից է մեծապես կախված կայուն տնտեսական վիճակը Հայաստանում: Հակառուսական տրամադրվածություն ունեցող պաշտոնյանները բազմաթիվ են, օրինակ նոր ընտրական օրենսգրքի աշխատանքները համակարգող Դանիել Իոաննիսյանը, տարածքային կառավարման նախարար Սուրեն Պապիկյանը, սոցապ նախարար Մանե Թանդիլյանը, մշակույթի նախարար Լիլիթ Մակունցը, կրթության նախարար Արայիկ Հարությունյանը և այլն:
Այսպիսով, վերլուծաբանների մոտ հարցեր են առաջանում՝ արդյոք Փաշինյանը չի՞ անելու նույնը, ինչ արեց Սահակաշվիլին, որը ևս սկզբից Մոսկվայի հետ հարաբերությունների մասին ասում էր լավ բաներ, իսկ հետո ինչ ստացվեց՝ բոլորս գիտենք: Կան վերլուծաբաններ, որոնք այդպես չեն կարծում: Դրանցից է Ալեքսանդր Իսկանդարյանը, որին թերթը մի քանի հարց է ուղղել: Նա կարծիք է հայտնել, որ Թբիլիսիի պես Երևանի գործելը բացառվում է, քանի որ դեռևս մինչև Սահակաշվիլու իշխանության գալն էլ Վրաստանի և Ռուսաստանի հարաբերությունները վատ էին: Նախագահ եղած Շևարդնաձեն արդեն հայտարարել էր, որ Վրաստանը պետք է դառնա ՆԱՏՕ-ի մաս: Սահակաշվիլու քաղաքականությունն ընդամենը դրա շարունակությունն էր , իսկ Հայաստանի դեպքում այդպիսի բան չկա: Ինչ կա Փաշինյանի գլխում Ռուսաստանի հետ հարաբերությունների մասով, ցույց կտա ժամանակը: Հնարավոր է, որ նա չի կարող իր շրջապատից հեռացնել հակառուսական տրամադրված այդ մարդկանց, քանի որ նրանք աջակցել են իշխանափոխության ժամանակ: Ցանկացած դեպքում Հայաստանը չպետք է մոռանա, որ հենց Ռուսաստանից և ռուսական ընկերություններից է մեծապես կախված կայուն տնտեսական վիճակը Հայաստանում»:

Արդյոք կվատանա՞ն հարաբերությունները
regnum.ru-ն «Իրականում Ռուսաստանը խնդիրներ է տեսնում Հայաստանի հետ հարաբերություններում և այդ մասին հայտարարում է հրապարակայնորեն և պաշտոնապես» հոդվածում կրկին անգամ անդրադառնում է Ալմաթիում ՀԱՊԿ անդամ երկրների արտգործնախարարների հանդիպման ժամանակ ՌԴ արտգործնախարար Սերգեյ Լավրովի այն հայտարարությանը, որ Հայաստանը և Ղազախստանը խարխլում են ՀԱՊԿ-ը իրենց գործողություններով: Մասնավորապես, Հայաստանի դեպքում դա վերաբերում է իր տարածքւմ ԱՄՆ-ի կողմից կառուցված և գործող ռեֆերես լաբորատորիաներին, որոնք կատարում են «կենսանյութերի հավաքում» : Դա մտահոգում է Մոսկվային. «Ըստ այդպիսի լաբորատորիաների թվի, Հայաստանը 2-րդ տեղում է Ուկրաինայից հետո: Չի կարելի հաստատ ասել, բայց փաստ է, որ, օրինակ, հարևան Աբխազիայում սկսել են հայտնաբերվել Զիկա վիրուս կրող մոծակներ այն դեպքում, որ առաջ չեն եղել: Անդրկովկասի տարածքում վերջերս արձանագրված խոզերի աֆրիկյան ժանտախտի բռնկումները ևս նախկինում այդ տարածքներում չեն եղել: Օրինակները կարելի է շարունակել»:
Հոդվածագիրը (Սերգեյ Շաքարյանց) հավատացնում է ընթերցողներին, որ շուտով կլսեն ռուս-հայկական և հայ-իրանական հարաբերությունների վատացման մասին, քանի որ այդ լաբորատորիաներից մեկը անմիջականորեն Իրանի սահմանի մոտ է:

Կամո Խաչիկյան