Մանվելի կլանը ջախջախվեց․ շատ կարևոր է, որ դա տարածվի նաև մնացած քաղաքներ
Հասարակություն
Առաջին լրատվական | Էջմիածնի քաղաքապետ Կարեն Գրիգորյանը` գեներալ Մանվել Գրիգորյանի որդին, ուշ երեկոյան ֆեյսբուքում գրառում է կատարել՝ տեղեկացնելով, որ հրաժարական է տալիս.«Ես՝ Կարեն Գրիգորյանս, տալիս եմ իմ հրաժարականը՝ իմ կամքով»,- գրել է Գրիգորյանը:
Այս հրաժարականը թերևս կանխատեսելի էր` երեկ երեկոյան ԱԱԾ հրապարակած տեսանյութից հետո, որտեղ բացահայտվում էր, որ գեներալ Մանվելի կողմից յուրացվել է 2016-ի Ապրիլյան պատերազմի ժամանակ բանակին, այդ թվում` դպրոցականների կողմից տրված օգնությունը:
Այս բացահայտումների առաջացրած տպավորությունն այնքան ծանր, որ դժվար է պատկերացնել, թե Էջմիածնում կամ Հայաստանում կգտնվի գեթ մեկ քաղաքացի, ով Էջմիածնում ծավալվող իրադարձությունների ֆոնին կարող է սատարել Գրիգորյանների ընտանիքին, տվյալ դեպքում` Կարեն Գրիգորյանին:
Վերջինս, անշուշտ, տեղյակ է եղել այն ամենին, ինչի մասին հասարակությունը իմացավ միայն երեկ երեկոյան: Մինչև վարչապետ Նիկոլ Փաշինյանի ելույթը և ԱԱԾ բացահայտումները Կարեն Գրիգորյանը թերևս հույս է ունեցել իրադարձությունների այլ ընթացքի վրա. նա Արմավիրի մարզպետի հետ հանդիպումից հետո ինքնավստահ հայտարարում էր, թե շարունակելու է պաշտոնավարել և իր հրաժարականը պահանջողներին հաշտության կոչեր էր անում:
Երեկոյան իրավիճակը փոխվեց արմատապես. ԱԱԾ-ն բացահայտեց Էջմիածնի դիմակայության երկու հիմնական կողմերի` Դոն Պիպոյի և գեներալ Մանվել Գրիգորյանի իրական դեմքերը, նրանց պատկանելիությունը քրեաօլիգարխիային` բառի իսկական իմաստով: Նիկոլ Փաշինյանի կառավարությունն Էջմիածնում, ըստ էության, իրականացրեց բացառիկ օպերացիա` իր քաղաքական, իրավական, բարոյական բաղադրիչներով, ինչի հետևանքով հոգևոր կենտրոնի հասարակությունն այսօրվանից լիարժեք կարող է զգալ թավշյա հեղափոխության լոկալ դրսևորումը:
Առաջին հերթին` իշխանության օպերատիվ արձագանքման շնորհիվ Էջմիածնում կանխվեց զինված բախումը, որովհետև Դոն Պիպոյի ու գեներալ Մանվելի տարածքներից առգրավված զգալի քանակությամբ զենքը հուշում է, որ դիմակայության էսկալացիան, ի վերջո, հանգեցնելու էր արյունոտ բախման:
Քաղաքական առումով` Էջմիածինն իսկապես ազատագրեց քրեաօլիգարխիայի երկու հակամարտ խմբավորումներից, նրանց հակադրությունից, մաուզերիստական կառավարումից և դրան առաջարկվող «այլընտրանքից», ինչը ենթադրում էր Էջմիածնում քրեական հեղաշրջման հաղթանակ: Էջմիածնի հասարակությունը հիմա ստացավ ազատ ընտրության հնարավորություն, ինչը բացառիկ հնարավորություն է ստեղծում քաղաքի հասարակության կոնսոլիդացիայի համար:
Շատ կարևոր է այն հանգամանքը, որ Էջմիածնի իրադարձություններին իշխանությունների օպերատիվ արձագանքը կանխեց անկայունության և քաոսի շղթայական տարածումը հանրապետության այլ քաղաքներ և համայնքներ, ինչը ուժեղ հարված կլիներ թավշյա հեղափոխությանը, նրա գաղափարներին:
Եվ վերջապես` Էջմիածնի լարվածության լիցքաթափումը, ճգնաժամի հաղթահարումն, ըստ էության, խոսում են Հայաստանում որակապես նոր իրավիճակի, թավշյա հեղափոխության անշրջելի հաղթանակի, քրեաօլիգարխիայի կրախի, լեգիտիմ իշխանության արդյունավետ և որակյալ կառավարման մասին:
1
2
3
4
5
1
2
3
4
5
1
3
4
