Կրակոցներից առաջ փոխմարզպետի ազգականները ծեծել են որդու սպանության մեջ մեղադրվողի պապին. նոր մանրամասներ

Tert.am-ի տեղեկություններով երեկ Սևանի դատարանի մոտ միջադեպի մասնակիցների միջև հնչած կրակոցից առաջ ծեծկռտուք է տեղի ունեցել:

Նշենք, որ Սևանի դատարանի մոտ, որտեղ տեղի էր ունենալու Գեղարքունիքի փոխմարզպետ Անդրանիկ Հակոբյանի որդու՝ Հայկ Հակոբյանի սպանության գործով դատավարությունը, կրակոցներ են հնչել։

Սակայն, նախքան այդ սպանված Հակոբ Հակոբյանի հարազատները ծեծի են ենթարկել ամբաստանյալ Մեխակ Հարությունյանի պապին՝ Հայկասար Հակոբյանին, և նրա որդին ու կողմնակիցները եկել են դատարան վրեժ լուծելու:

Հայկասար Հակոբյանի որդին, ըստ նախնական տեղեկությունների, կասկածվում է կրակոց արձակելու մեջ, զենքով սպառնացել է կրակել, սակայն թույլ չեն տվել: Դատարանի մոտից հեռանալու ժամանակ մեքենայից Հայկասար Հակոբյանի որդին՝ Գուրգեն Հակոբյանը կրակոց է արձակել սպանվածի ազգական Ռաֆիկ Հակոբյանի ուղղությամբ, ով վիրավորվել է:

Ռաֆիկ Հակոբյանը փոխմարզպետի հորեղբոր որդին է:

Ռաֆիկ Հակոբյանը տեղափոխվել է «Սևան» բժշկական կենտրոն, որտեղից էլ Երևան՝ «Իզմիրլյան» բժշկական կենտրոն, որտեղ էլ ենթարկվել է վիրահատության:

Tert.am-ի տեղեկություններով կրակոցներ արձակելուց հետո երկու մեքենաները, ովքեր գտնվել են Սևանի դատարանի դիմաց, դիմել են փախուստի, սակայն մեքենաներից մեկը և Հայկասար Հակոբյանը հայտնաբերվել են Նորատուս գյուղում:

Հիշեցնենք, որ դատարանում քննվում է Գեղարքունիքի փոխմարզպետի որդու սպանության գործը, գործով մեղադրյալը Մեխակ Հարությունյանն է: Ըստ մեղադրանքի՝ Մեխակ Հարությունյանը ապօրինի կերպով ձեռք է բերել, պահել և կրել է ռազմամթերք հանդիսացող 48 ատրճանակային փամփուշտներ և գործարանային արտադրության մարտական ակոսափող հրազեն հանդիսացող 9 մմ տրամաչափի ԻԲ 6528 համարի Մակարով տեսակի ատրճանակ, որից արձակված 7 կրակոցներով 2017թ. հունվարի 7-ին՝ ժամը 12.20-ի սահմաններում, սպանել է Հայկ Անդրանիկի Հակոբյանին:

Դատարան «Նիվա» և «Միցուբիշի» մակնիշի մեքենաներով գնացել են ամբաստանվողի մայրական պապը՝ Հայկասար Հակոբյանը, նրա վարորդը՝ Գևորգ Գուգոյանը, Հայկասար Հակոբյանի փեսան՝ Արտակ Խաչատրյանը և Հայկասար Հակոբյանի տղան՝ Գուրգեն Հակոբյանը: