«Արծրուն Հովհաննիսյանը լկտիաբար ստում է»․ Վահան Բադասյան

«Չորրորդ իշխանությունը» գրում է․

«Ես ձեզ հավաստիացնում եմ, որ Արծրուն Հովհաննիսյանը ուղղակի ստում է։ Լկտիաբար է ստում։ Սուտը լավ չէ, լավ չէ՝ առավել եւս պաշտպանության նախարարի խոսնակի պարագայում։ Եթե նա այսօր այս հարցում է ստում, վաղն ավելի կարեւոր հարցերի մեջ կստի, ինչը ծանր կանդրադառնա մեր պաշտպանության վրա։

Հովհաննիսյանն ասում է, թե «Սիփան» ձեռնարկության հետ Մովսես Հակոբյանը կապ չունի։ (Խոսքը ՀՀ զինված ուժերի Գլխավոր շտաբի պետ Մովսես Հակոբյանի մասին է-խմբ.)։ Եթե «Սիփան» ընկերության տնօրենը Մովսես Հակոբյանի եղբայրն է, եւ Մովսես Հակոբյանը միշտ հսկում է այդ ձեռնարկության գործունեությունը, հիմա նա կապ ունի, թե՞ ոչ։ Այդ ձեռնարկությունը զբաղվում է հացաթխմամբ՝ մի «գարաժի» մեջ։ Ես վստահեցնում եմ՝ ոչ մի օրենք ու սանիտարահիգիենիկ նորմեր պահպանված չեն, բայց դե տարբեր զորամասերի հացն է սպասարկում։ ՊՆ խոսնակը ստում է, թե ո՞վ է նրան հանձնարարել այդպես անել՝ չեմ կարող ասել», «ՉԻ»-ի հետ զրույցում հայտարարեց Արցախյան պատերազմի վետերան, նախկին զինվորական Վահան Բադասյանը։

Հիշեցնենք, որ Բադասյանն օրերս Facebook-ի իր էջում` դիմելով ՀՀ նորանշանակ վարչապետ Կարեն Կարապետյանին, հայտարարել էր. «Հարգարժան պարոն վարչապետ, ՀՀ զինված ուժերի Գլխավոր շտաբի պետը, լինելով նախկինում ՀՀ ՊՆ ՆՏԱԴ-ի պետ-փոխնախարար, չարաշահելով իր պաշտոնական դիրքը, խախտելով գնումների մասին օրենքը, շուկայականից զգալի բարձր գներով իր ձեռնարկության եւ ՊՆ-ի միջեւ կնքել է ցորենի գնման պայմանագիր, ինչի արդյունքում՝ բանակից յուրացվել է մի քանի տասնյակ միլիոն դրամ։ Այս երեւույթն է կոռուպցիայի երեւույթ, թե՞ նույն դպրոցում մայր ու աղջկա՝ որպես մանկավարժ աշխատե՞լը։ Կարո՞ղ եք պատասխանատվության ենթարկել Գլխավոր շտաբի պետին։ Կամ եթե ես զրպարտում եմ Գլխավոր շտաբի պետին, ինձ պատասխանատվության կենթարկե՞ք։ Իսկ ընդհանրապես իրավապահ եւ անվտանգության մարմիններին այս եւ նման երեւույթները չեն հետաքրքրո՞ւմ։ Սիրով, հույսով եւ հոժարությամբ սպասում եմ բոլորիդ արձագանքին, վերացնելու այս ազգակործան երեւույթները, որի պատճառով առաջնագծում զոհվում են ժողովրդի զավակները»։

Երեկ էլ իր հերթին պարզաբանմամբ է հանդես եկել ՀՀ պաշտպանության նախարարի մամուլի քարտուղար Արծրուն Հովհաննիսյանը։ Բադասյանի հայտարարության առնչությամբ վերջինս նշել է. «ՀՀ ՊՆ ալյուրի մատակարարման մրցույթներին, որոնք անցկացվել են մի քանի չափաբաժիններով եւ փուլերով, մասնակցել են տասնյակ ընկերություններ։ Մրցույթների համար հաշվարկային նախնական գինը եղել է 220 դրամ 1 կգ 1-ին կարգի ալյուրի համար։ Նշված ընկերությունների մեջ եղել են նաեւ ընկերություններ Արցախից։ Պարոն Բադասյանի ներկայացրած «Սիփան» ընկերությունը, որը կապ չունի ՀՀ ԶՈւ ԳՇՊ գեներալ-լեյտենանտ Մովսես Հակոբյանի հետ, մասնակցել է ամենափոքր չափաբաժիններից մեկի մրցույթին։ (Մրցույթներում եղել են նաեւ 5 անգամ ավելի մեծ չափաբաժիններ)։ Նույն չափաբաժնի համար պայքարել է նաեւ մեկ այլ ընկերություն, որի առաջարկած գինը ավելի բարձր է եղել։ Այլ չափաբաժնի համար մրցույթներում հաղթել են նաեւ արցախյան 5 այլ ընկերություններ։ Հաղթող ընկերությունները մատակարարել են 164-173 դրամ գներով»։

Վահան Բադասյանը մեզ հետ զրույցում «Սիփան» ձեռնարկության մասին այլ բաներ էլ ասաց՝ հավելելով, որ եթե ինքը զրպարտում է, ապա թող դիմեն իրավապահ մարմիններին կամ էլ թող իրենով զբաղվեն իրավապահները։ Ուշագրավ զրույցի մանրամասները՝ թերթի վաղվա համարում։