100 միլիոնի տուգանք. նյութերը քննչականում են

«ՉԻ»-ն գրում է․

«Երեւանի բժշկական կենտրոնի» փակման թեմային զուգահեռ հայտնի դարձավ, որ ՊԵԿ-ը ստուգումներ է իրականացրել այս բժշկական կենտրոնում, որտեղ էլ արձանագրված խախտումների արդյունքում տասնյակ միլիոնների հասնող ակտ է գրել։ «ՉԻ»-ն հետաքրքրվեց ՊԵԿ-ից, թե ինչ ստուգումների մասին է խոսքը, ինչքան է տուգանվել բուժհաստատությունը, եւ ինչի համար է տուգանվել (շփոթմունք, անփութություն, չարաշահում, խաբեություն եւ այլն)։

Ի պատասխան մեր հարցման՝ ՀՀ ԿԱ ՊԵԿ տեղեկատվության եւ հասարակայնության հետ կապերի բաժնից տեղեկացրին. «Երեւանի բժշկական կենտրոնի» նկատմամբ իրականացված հարկային ստուգման արդյունքում գրվել է շուրջ 100 մլն դրամի ակտ։ Կենտրոնի ղեկավարությունն ընդունել է գրված ակտը, ավելին՝ արդեն կատարել է ակտի գումարի 20% չափով (շուրջ 40 մլն դրամ) վճարում։ Կազմված նյութերն ուղարկվել են ՊԵԿ քննչական վարչություն։

Կենտրոնի ղեկավարությունը դիմել է ժամանակացույց կազմելու խնդրանքով՝ ակտի մնացած գումարը մաս-մաս վճարելու համար։ ՊԵԿ-ն ընդառաջել է եւ արդեն ստացել է ժամանակացույց կազմելու վերաբերյալ դիմումը, սակայն ժամանակացույց դեռ չի կազմվել, քանի որ չի տրամադրվել ակտի գումարի 20%-ի վճարումը հաստատող անդորրագիրը, ինչը բացատրվում է ներկա պահին տնօրենի պաշտոնի թափուր լինելով։

Ինչ վերաբերում է հիվանդանոցի փակմանը, նշենք, որ գործունեության դադարեցումը մեր գործողություններով պայմանավորված չէ։ Ավելին՝ կոմիտեն ընդառաջ է գնացել կենտրոնի ղեկավարությանը. արգելանք դեռ չի դրվել, սակայն որպեսզի ՊԵԿ-ը կարողանա բժշկական կենտրոնի վճարումները կանոնակարգելու համար ժամանակացույց կազմել, անհրաժեշտ է պահպանել օրենքի պահանջը եւ սահմանված ժամկետում անդորրագիրը ներկայացնել ՊԵԿ»։

Հիվանդանոցի շուրջ ստեղծված իրավիճակի մասին «ՉԻ»-ն առաջինը ահազանգեց։ Մեր հրապարակումից հետո բժշկական կենտրոնի սեփականատերերից մեկը` Հայկ Բալայանը (Զորի Բալայանի որդին), արձագանքեց` նշելով, թե պատրաստ է մեզ հետ զրուցել ու ներկայացնել փաստարկներ այն մասին, թե ինչ է տեղի ունեցել ու ինչի արդյունքում է բժշկական կայացած հիմնարկը անգործության մատնվել։