Աղմկահարույց «Դեպի վայրէջք» դրաման` արդեն եթերում․ լուսանկարներ

Երկուշաբթի օրվանից  «Արմենիա TV»–ն կսկսի Ելենա Արշակյանի «Դեպի վայրէջք»  հեռուստանովելի ցուցադրությունը։ Թրաֆիքինգի մասին պատմող ֆիլմում խաղում են Սարգիս Գրիգորյանը, Էմմա Մանուկյանը, Ալեքսանդր Բաբասյանը, Մերի Հակոբյանը, Վարդան Հովսեփյանը, Էվա Խաչատրյանը, Գնել Սարգսյանը և այլք։ Այս ֆիլմում իր առաջին քայլերն արեց Սարգիս Գրիգորյանի կրտսեր  դուստրը` Յանան։

25 մասանոց հեռուստասերիալի ռեժիսորը Ելենա Արշակյանն է, սցենարի հեղինակը` Անահիտ Մխիթարյանը։ Ֆիլմում կան համբույրի և բաց տեսարաններ Սարգիս Գրիգորյանի և Էվա Խաչատրյանի, Սարգիս Գրիգորյանի և Էմմա Մանուկյանի, Ալեքսանդր Բաբասյանի և Մերի Հակոբյանի մասնակցությամբ, ինչը լայն քննարկումների առարկա էր դարձել։ Tert.am Life-ը ներկայացնում է դերասանների կարծիքներն այս մասին ու ֆիլմի մանրամասները։

Գլխավոր հերոսուհու դերակատար Էմմա Մանուկյանը բավականին բարդ հոգեբանական ապրումներ է ունեցել կերպարը մարմնավորելիս։ Միաժամանակ ֆիլմում իրականացել է իր վաղեմի երազանքը` նկարահանվել է Աննա Էլբակյանի հետ։

Ինչ վերաբերում է բաց տեսարաններին ամուսնու` դերասան Վիլեն Սարգսյանի արձագանքին` Էմման ասաց, որ նման  հարցերն իրենց մոտ քննարկման առարկա չեն դառնում։ «Մենք այդ մասին խոսել ենք տարիներ առաջ, երբ ընտանիք ենք կազմել, հիմա մեր կենցաղում նման հարցեր չկան։ Տեսարաններն ընտանեկան խնդիրներ չեն ստեղծել ու չեն ստեղծի, որովհետև ես իմ կողքին ունեմ մի մարդ, որը, բացի  այն, որ իմ ասպարեզից է, նաև  ինձ շատ լավ է ճանաչում և գիտի` ինչ է ինձ համար  իմ աշխատանքը։ Մասնագիտական առումով մենք երբեք չենք սահմանափակում իրար։ Ճիշտ տեղում և ճիշտ ժամանակին ես պատրաստ եմ յուրաքանչյուր տեսարանի։ Այս նախագծում ես հասկացել եմ, որ սա ճիշտ տեղն է, չեն կարող այդ տեսարանները չլինել։ Էստեղ չկա սկանդալ, արտասովոր որևէ բան։ Դա շատ նորմալ է, մեր մասնագիտության  մի մասը»։

Մերի Հակոբյանն առաջին անգամ էր նկարահանվում համբույրի տեսարանում։ Մինչև այդ նա հայտարարել էր, որ երբեք չի նկարահանվի համբույրի տեսարանում, հիմա ասում է` շտապել էր նման հայտարարություն անել։ ««Դեպի վայրէջք»–ում ես անցա այդ կարծրատիպը։ Երբ երկար ժամանակ աշխատում ես ֆիլմերում ու ունենում ես հնարավորություն գլխավոր կերպարներով ներկայանալու, հասկանում ես, որ այդպիսի դերերի համար ռեժիսորներն ունեն ուրիշ առաջադրանքներ։ Դու պետք է  լինես հնարավորինս պրոֆեսիոնալ, որովհետև հեռուստադիտողը չի ուզում տեսնել սուտ համբույր։ Այս ֆիլմում շատ են բաց տեսարանները։ Ես վստահ եմ, որ դա այնպես կմատուցեմ, որ իմ հեռուստադիտողը չի խորշի այն նայելուց։ Ինձ համար կարևոր է, որ տեսարանը չլինի վուլգար։ Եթե բաց տեսարանը ներկայացնում ես այնքան կոռեկտ, որ հեռուստադիտողը գլուխը չթեքի, չխորշի դրանից, ուրեմն չես անցել սահմանը։ Ինձ համար խնդիր չէ բաց տեսարանում խաղալը»,– ասել է նա։

Տղամարդ դերասանների` Ալեքսանդրի և Սարգսի դեպքում բաց տեսարանները նրանց կանանց` Լիլիթին և Մանոյին խանդի առիթ էին տվել, ընդ որում, Լիլիթի դեպքում խանդն առավել ընդգծված էր։ Մի առիթով նա ասել է, որ ամուսինն ուզում էր համբուրել Մերիին, քանի որ նա գեղեցիկ աղջիկ է։ «Ես և Լիլիթը խոսել ենք։ Բնական է, խանդը կա։ Ես իր արձագանքից հասկացա, որ հոգու խորքում չուզելով համաձայնեց։ Մեծ հաճույքով կուզեր ասել` ոչ, սակայն չցանկացավ  վնասել նախագծին, իմ խաղին»,– նշել է Ալեքսանդրը։

Մանոն առավել սրտնեղել էր հասարակական արձագանքից.  «Բնականաբար, չեմ  կարող ասել, որ որպես կին, ով շատ է սիրում իր ամուսնուն, հիացած էի այդ տեսարանով, սակայն փորձեցի  հարցին մասնագիտորեն մոտենալ։ Մենք նախապես խոսել էինք այդ մասին, սակայն մի բան է խոսելը, մի բան է տեսնելը։ Գիտեի, որ բաց տեսարան կա, սակայն  անսպասելի էր, այդ կադրը չէի սպասում անոնսի մեջ։ Բնականաբար, իմ մեջ առաջացան էմոցիաներ, աննորմալ կլիներ, եթե բացարձակ անտարբեր լինեի։ Սակայն թեթև եմ նայում այդ ամենին, ավելի շատ քննարկումներից սկսեցի նեղվել։ Մենք ապրում ենք հայկական  իրականության մեջ, երբ կողքից շատ են խանգարում խոսակցությունները։ Հետո Սարգիսը զրուցեց ինձ հետ, բացատրեց, խոսեց նաև մեր ընկերների հետ, որ այդքան չքննարկեն հարցը»,– պատմել է Մանոն։

Իր հերթին ռեժիսոր Ելենա Արշակյանը ասել է, որ բաց տեսարաններով սկանդալ անելու և ավելորդ ուշադրություն գրավելու միտում չեն ունեցել. «Մենք անում ենք մեր աշխատանքը։ Ինձ համար զարմանալի է, որ մարդիկ դեռ զարմանում են այդ գործոնի վրա»։

Նա պատմել է, որ  Էվան և Սարգիսը շատ արագ են ընկերացել։ Նրանց տեսարանները շատ հեշտ են ստացվել, իսկ ահա Ալեքսանդրն ու Մերին որոշ բարդություններ են հաղթահարել. «Ալեքսանդր Բաբասյանի և Մերի Հակոբյանի  հետ խնդիր կար, քանի որ մինչև այս նախագիծն իրենք իրար չէին ճանաչում։ Բնականաբար, հանդիսատեսին չի հետաքրքրում` Մերին ու Սաշն իրար ճանաչո՞ւմ են, թե` ոչ։ Իրենք սիրահարված զույգ պիտի խաղային, ունեին  անկեղծ տեսարաններ, սկսեցին հանդիպել,  ընկերացան։ Ֆիլմի վերջում կարող եմ ասել, որ, ի վերջո, ամեն բան ստացվեց»։

Այս թեմայով Արտակարգ վայրէջք․ ինքնաթիռում էր նաև երգիչ Մարտին Մկրտչյանը (լուսանկար)