Լևոն Տեր-Պետրոսյանի առաջարկները տեղ են գտել կառավարության նոր ծրագրում

Nyut.am-ը գրում է․

Այսօր Ազգային ժողովն արտահերթ նիստում քննարկում է կառավարության ծրագիրը: Մինչև օրենսդիր մարմին հասնելը հոկտեմբերի 17-ին այն ներկայացվել էր ՀՀԿ գործադիր մարմնի նիստում:
Մի կողմ թողնելով բոլոր տնտեսագիտական նրբերանգներն ու մոտեցումները, պետք է արձանագրել մի հետաքրքիր փաստ․ Կարեն Կարապետյանի ներկայացրած կառավարության ծրագիրը ներառում է ՀՀ առաջին նախագահ Լևոն Տեր-Պետրոսյանի` տնտեսության վերականգնման համար որպես առաջնահերթություն մատնանշած երկու կետերը:
Հիշեցնենք, որ երեկ Լ. Տեր-Պետրոսյանը իր նկատառումներն էր հայտնել տնտեսական վիճակի մասին, ընդգծելով, որ «Հայաստանի բոլոր չարիքների` սոցիալական ծանրագույն վիճակի, բնակչության աղքատության, զանգվածային արտագաղթի, բանակի թերզինվածության, ապօրինի ընտրությունների, արդարադատության չգոյության, ժողովրդավարության և մարդու իրավունքների ոտնահարման արմատը կոռուպցիան է` պետական պաշտոնյաների կողմից ազգային հարստության համատարած ու անհագ թալանը»: Ուստի առաջարկել էր կոռուպցիան վերացնելու երկու առաջնահերթ պայման` վերացնել նախարարությունների, պետական այլևայլ գերատեսչությունների, ինչպեսև տեղական ինքնակառավարման մարմինների արտաբյուջետային հաշիվներն ու հիմնադրամները: Եվ` անմիջապես վավերացնել ՄԱԿ-ի Հակակոռուպցիոն կոնվենցիայի` պետական պաշտոնյաների ապօրինի հարստացման քրեականացմանը վերաբերող 20-րդ հոդվածը` օժտված նաև հետադարձ ուժով»:
«Եթե կառավարության ծրագրում այս երկու դրույթները չընդգրկվեն, ապա Հայաստանի տնտեսական վիճակի բարելավման ու զարգացման հույս փայփայելն անիմաստ կդառնա, իսկ նոր կառավարությունը կարժանանա նախորդ երկուսի բախտին»,- իր խոսքում ընդգծել էր առաջին նախագահը:
Ու փաստորեն այդ երկու կետերը կառավարության այս ծրագրում կան: Այն, որ պետական կառույցները պետք է ազատվեն ավելորդ բեռ դարձած ՊՈԱԿ-ներից ու ԾԻԳ-երից, որոնց ՕԳԳ-ն, ըստ վարչապետի, զրո է, Կ. Կարապետյանը հանձնարարել էր դեռ անցած շաբաթ կայացած կառավարության նիստի ժամանակ: Իսկ այսօր ԱԺ ներկայացված ծրագիրն ամրագրում է պետական ապարատի օպտիմալացում: Իսկ երկրորդ կետի համար` կառավարությունը պատրաստվում է եռամսյա ժամկետում քրեականացնել «ապօրինի հարստացումը», իսկ վեցամսյա ժամկետում ներդնել դրա կիրառումն ապահովող գործուն կառուցակարգեր:
Հետաքրքիր է, ո՞վ է առաջինը հղացել այս գաղափարները և ով ում առաջարկին է անսացել: Պատահական զուգադիպությո՞ւն էր հենց այս օրերին Լ. Տեր-Պետրոսյանի առաջարկը և դրա` կառավարության ծրագրում արձանագրված լինելը, թե, այնուամենայնիվ, քաղաքականության մեջ պատահականություններ չեն լինում: