ՀՀԿ-ն կրկին չի կարողանալու յոլա գնալ առանց ամենակարող Արգամիչի

«Ժողովուրդ» օրաթերթը իր այսօրվա համարում անդրադարձել է Գյումրիի և Վանաձորի ավագանիների ընտրությունների արդյունքներին, որոնք դեռ տարբեր ձևաչափերով քննարկվում են ՀՀԿ-ում։

«Թեև ՀՀԿ երիտթևը հպարտորեն հայտարարում է, որ առանց Հովիկ Աբրահամյանի հաղթանակ են բերել, այնուամենայնիվ, զուտ թվերի համեմատությամբ կարելի է արձանագրել, որ ՀՀԿ– ն գալիք Աժ ընտրություններում լուրջ խնդիրներ ունի։ Ինչպես հայտնի է՝ Գյումրիում և Վանաձորում իշխանական ցուցակները ստացել են մոտ 15 հազարական քվե։ Սա այն դեպքում, երբ 2012-ին Վանաձորում ՀՀԿ– ական քաղաքապետի թեկնածուն՝ Սամվել Դարբինյանը, ստացել էր 21 հազար 300 քվե, իսկ Գյումրիում իշխող կուսակցության աջակցությունը վայելող Սամվել Բալասանյանը ստացել էր 27 հազար 500 քվե։ Երկու քաղաքներում էլ իշխանական լծակների գործադրմամբ հնարավոր եղավ արդյունք ապահովել։ Հավելենք, որ Գյումրիում «Բալասանյան» դաշինքի օգտին քվեարկածներից և անգամ նրանց շտաբի ներկայացուցիչներից շատերը ՀՀԿ-ի անունը լսել չեն ցանկանում և խուսափում էին ՀՀԿ անունից հանդես գալ։ Ուստի Աժ ընտրություններում ՀՀԿ-ն Գյումրիում և Վանաձորում չի կարող լուրջ ակնկալիքներ ունենալ»,–գրում է թերթը։

Փաստորեն, իշխող կուսակցությունը այս երկու քաղաքներում անցած ընտրությունների համեմատությամբ կորցրել է շուրջ 18000 քվե, ինչը խորհրդարանական ընտրությունների համար շատ լուրջ թիվ է: Գյումրիի ու Վանաձորի ընտրությունները իշխանությունների համար լուրջ մարտահրավերներ դարձան, և հստակ ցույց տվեցին, որ օսլայած օձիքներով ընտրական տարաբնույթ տեխնոլոգիաներ կիրառող իշխող կուսակցությունը, անգամ իշխանական լծակների ողջ ներկապնակը օգտագործելով, ի զորու չէ քիչ թե շատ տանելի արդյունքներ ապահովել եկող` խորհրդարանական ընտրությունների համար:

Փաստորեն` ՀՀԿ երիտթև - Հովիկ Աբրահամյան տանդեմում երիտթևը պարտվեց, և ՀՀԿ-ն կրկին չի կարողանալու յոլա գնալ առանց ամենակարող Արգամիչի, ով տասնամյակներ շարունակ կարողացել է ապահովել իշխանության քվեները: 

Ըստ էության, անկախ վարչական ապարատի փոփոխություններից, ՀՀ-ում քաղաքական դերակատարները շարունակում են մնալ անփոփոխ...

Տիգրան Բարսեղյան