«Մեր դասերը ավելի կարևոր ա». ուսանողները «թեթևի մեջ են» տեղյակ Փաշինյանի քայլից / տեսանյութ

Նիկոլ Փաշինյանը, երեկ ֆեյսբուքյան իր էջում գրառում էր կատարել, որտեղ երիտասարդներին, և ուսանողներին կոչ էր անում ապրիլի 13-ի հանրահավաքի իրազեկման աշխատանքներին մասնակցելու համար ներգրավվել որպես կամավոր։ Փաշինյանի գրառումին հաջորդեց #Իմքայլը և #ՄերժիրՍերժին նախաձեռնության անդամների հանդիպում-քննարկումն ուսանողների հետ ՝ ԵՊՀ հարակից տարածքներից մեկում, որտեղ նրանք ուսանողներին կոչ էին անում միանալ Սերժ Սարգսյանի վարչապետության դեմ պայքարին։

Արդեն այսօր, մի խումբ ուսանողներ Երևանի պետական համալսարանում իրազեկման ակցիա են իրականացրել ապրիլի 13-ին Ազատության հրապարակում սպասվող հանրահավաքի մասին և բաժանել «Իմ քայլը» շարժման թռուցիկներ։

Բնական է, որ ցանկացած քաղաքական շարժում պետք է փորձի թիրախավորել երիտասարդներին ու ուսանողներին։ Ոչ հեռավոր անցյալում, Երևանի փողոցներում ակտիվ էր #Տարկետումլինելուա երիտասարդական շարժումը։ Իսկ ավելի վաղ տեսել ենք, որ այս կամ այն քաղաքական և սոցիալական ակտիվ դրսևորումներում երիտասարդներն ակտիվ մասնակցություն ունեցել են․ հիշենք Էլեկտրիկ Երևանը կամ Տրանսպորտի ուղեվարձի թանկացման դեմ ակցիաները։

Շատ երկրներում հենց ուսանողներն են սոցիալական շարժումների, քաղաքական գործընթացիների շարժիչը և բնական է նույն բանը սպասել նաև Հայաստանում։ Այս պահին, սակայն, Հայաստանում նման տրամադրությունները երիտասարդության շրջանում գերիշխող չեն։ Չնայած Սերժ Սարգսյանի վարչապետության դեմ պայքարի դուրս եկած միաժամանակ մի քանի ուժերի ակտիվությանը, արդեն շաբաթներ շարունակվող տարատեսակ ակցիաներին, հայաստանյան երիտասարդությունը, ուսանողները կամ տեղյակ չեն տեղի ունեցողից, կամ էլ տեղյակ են, բայց բավականին պասիվ են մասնակցում այդ գործընթացներին։

Երիտասարդության դերակատարությունը մոտ ժամանակներս նախանշվող քաղաքական զարգացումներում հասկանալու համար էլ 1in.am-ը փորձել է հարցախույզ իրականացնել ուսանողների շրջանում։