Դեղերը կէժանանա՞ն

Հայաստանի խորհրդարանն այսօր՝ ապրիլի 12-ին, առաջին ընթերցմամբ միաձայն 92 կողմ ձայներով ընդունեց «Դեղերի մասին» Հայաստանի Հանրապետության օրենքում լրացումներ կատարելու մասին օրենքի նախագիծը:

Հատկանշական է, որ սա այն բացառիկ դեպքն է, երբ Ազգային ժողովը ընդունում է օրինագիծ, որին դեմ է կառավարությունը: Օրինագծի հեղինակներն են Հակոբ Հակոբյանը, Աղվան Վարդանյանը, Արսեն Միխայլովը, Մարինա Մարգարյանը, Մարգարիտ Եսայանը, Ջեմմա Բաղդասարյանը:

Նախքան քվեարկությունը «ԱԺ փոխնախագահ, «Ծառուկյան» խմբակցության պատգամավոր Միքայել Մելքումյանն ասաց, որ իրենց խմբակցությունը կողմ կքվեարկի պայմանով, որ բժշկական հաստատություններին դեղեր ներկրելու իրավունք կվերապահվի բացառապես այն դեղերի մասով, որոնք վերաբերում են քրոնիկ եւ դիսպանսերային բուժման ծառայությունների իրականացմանը:

Օրինագծի հեղինակներից ՀՀԿ խմբակցությունից Հակոբ Հակոբյանն էլ ընդգծեց, որ հիվանդանոցում մատուցվող ծառայությունները տասնյակներ են եւ դրանք երբեք հնարավոր չէ բաժանել դիսպանսերային եւ խրոնիկ հիվանդությունների:

«Ելք» խմբակցության պատգամավոր Արտակ Զեյնալյանը նշեց, որ իրենք կողմ են քվեարկել, որովհետեւ այս օրինագծի ընդունմամբ ենթադրվում է, որ դեղերի ինքնարժեքը նվազելու է:

Ավելի վաղ NEWS.am-ը հայտնել էր, որ «Դեղերի մասին» ՀՀ օրենքում փոփոխություններով առաջարկվում է թույլ տալ հիվանդանոցներին դեղ ներկրել, ոչ թե դրանք ձեռք բերել մեծածախ լիցենզիա ունեցող ընկերություններից: Դա, ըստ օրինագծի հեղինակների կհանգեցնի դեղերի գների նվազման:

Բացի այդ, այս օրենքով առաջարկվում է, որ ֆիզիկական անձը արտասահմանից ժամանելիս իրավունք ունենա առանց հավաստագրի երեք հոգու համար դեղ բերել: «Սրանով մենք ասում ենք, որ դու կարող ես քո երեխայի, քո ծնողի, քո հարազատի համար դեղ բերել»,-նշել է Հակոբ Հակոբյանը:

Նշենք, որ կառավարությունը դեմ է արտահայտվել այս օրինագծի ընդունմանը: Կառավարությունում կարծում են, որ դեղեր ներմուծելու համար հիվանդանոցները նույնպես պետք է լիցենզիա ունենան, մինչդեռ օրինագծի հեղինակները կարծում են, որ չի կարելի հիվանդանոցներին լիցենզիա տալով դրդել զբաղվել դեղերի վաճառքով:

Այս թեմայով Ուսանողուհին մեծ գումարի դիմաց հայտնի դերասանին է վաճառել կուսությունը Հստակեցվել է հատով դեղերի գնման նոր կարգը Մայրը վաճառում է 3-ամյա աղջկան․ լուսանկարներ Մարդիկ 3-4 ամսվա համար դեղերի պաշար են հավաքել. տեսանյութ «Բա մեռնե՞նք». Սոնա Ռուբենյանին դեղեր չեն վաճառել