Համաշխարհային պատերազմը հետաձգվեց

Լրագիր | Համաշխարհային լրատվամիջոցները հայտնում են, որ երրորդ համաշխարհային պատերազմը նորից հետաձգվում է: Երեկվա լարվածությունը, որը գագաթնակետին հասավ ԱՄՆ նախագահ Թրամփի թվիթներից հետո, թուլանում է, եւ Սպիտակ տունը հայտարարել է, որ Սիրիայում քայլերի վերաբերյալ վերջնական որոշում դեռ չկա:

 

Համաշխարհային դերակատարները կարողացե՞լ են ժամանակավոր համաձայնության հասնել Սիրիայում: Լրատվամիջոցներն սպասում էին Պուտինի ու Թրամփի բանակցություններին, բայց երեկ հեռախոսազրույց են ունեցել Թրամփն ու Էրդողանը, եւ հայտարարվել է, որ Թուրքիան ու ԱՄՆ-ն համակարգելու են իրենց քայլերը Սիրիայում: Դժվար է ասել, թե արդյոք Էրդողանը խոսել է Պուտինի ու Ռոհանիի անունից, բայց Թրամփը գերադասել է զանգել Էրդողանին, այլ ոչ թե Պուտինին:

 

Պակաս հատկանշական չէ, որ ապրիլի 16-ին Թուրքիա է այցելելու ՆԱՏՕ-ի գլխավոր քարտուղար Յենս Ստոլտենբերգը: Նա Էրդողանի հետ զրուցելու է Սիրիայի մասին:

 

Նախքան այցը Ստոլտենբերգը հոդված է հրապարակել, որում նախազգուշացրել է, որ Մոսկվան արդիականացնում է միջուկային զինանոցը, եւ դրա կիրառման խոչընդոտը նվազում է:

 

Փաստացի, Ստոլտեմբերգը հայտարարում է, որ ի պատասխան Արեւմուտքի գործողությունների Մոսկվան կարող է միջուկային զենք կիրառել:

 

Հիշեցնենք, որ վերջերս Անկարա այցի ժամանակ Վլադիմիր Պուտինը խոստացել է Թուրքիայի հետ «կիսվել» միջուկային տեխնոլոգիաներով՝ Թուրքիայում ԱԷԿ կառուցել եւ փոխանցել C-400 համալիրների արտադրության տեխնոլոգիաները:

 

Պուտինի այդ մտադրությունը դուր չի եկել Արեւմուտքին: Համաշխարհային լրատվամիջոցները հիշեցրել են, որ ատոմակայան կա աշխարհի 31 երկրում, եւ միջուկային տեխնոլոգիաների փոխանցումը մի երկրին, որին մինչեւ հիմա չեն վստահել այդ տեխնոլոգիաները, պատասխանատու քայլ է:

 

Տեղեկացնենք, որ Հայաստանը ատոմակայան ունեցող 31 երկրների ցանկում է: