Ո՞ւր է «կորել» Նաիրա Գուրջինյանը

«Հայ սուպեր-սթար-1», «Հայ սուպեր-սթար-2», «Հայ սուպեր-սթար-4», «Իքս Ֆակտոր» նախագծերի ժյուրիի անդամ եւ երաժշտական պրոդյուսեր Նաիրա Գուրջինյանը տեւական ժամանակ է` էկրաններին չի երեւում: Վերջերս էլ մեկնարկեց «Իքս Ֆակտոր 4»-ը, սակայն նա կրկին ներառված չէ ժյուրիի կազմում: «Ժողովուրդ»-ը երգահանից հետաքրքրվեց` ինչն է պատճառը, որ իրեն նմանատիպ նախագծերում այլեւս չենք տեսնում:

«Ճիշտն ասած` ժամանակս չի ներում, ես ուղղակի չեմ հասցնում: Եղել են դեպքեր, որ ստացել եմ հրավերներ, բայց նշածս պատճառով մերժել եմ, իսկ վերջին երկու տարվա ընթացքում առաջարկներ չեմ էլ ստացել: Երաժշտական նախագծերն ինձնից շատ ժամանակ են խլում, արդյունքում իմ 120 սաները մնում են «անտեր»: Բացի այդ` գուցե այդ ամենից հոգնել եմ: Ես սիրում եմ, որ իմ կյանքում միշտ փոփոխություններ լինեն»,-մեկնաբանեց նա: Ն. Գուրջինյանը տեղեկացրեց, որ հիմա սաների հետ իրականացնում է հետաքրքիր նախագծեր, այդ թվում` համերգային ծրագրեր: Նշենք, որ երգահանը հիմնադրել է երաժշտական մի քանի խումբ, այդ թվում` «Jazzel», «Only Girls», «Վաղորդյան կաթիլներ», «Կամերտոն» եւ այլն։ Վերջերս էլ «Only Girls» աղջիկների խումբը Բաթումում մասնակցել է «Wonderland» երգի միջազգային մրցույթ-փառատոնին եւ ստացել «Գրան պրի» մրցանակը: «Հիմա էլ պատրաստվում ենք մասնակցել Ֆինլանդիայում կայանալիք մեկ այլ միջազգային մրցույթի»,-հայտնեց տիկին Գուրջինյանը:
Նա նաեւ հավելեց, որ «Only Girls» խմբի հետ պատրաստում են համերգային ծրագիր, որի շրջանակում կհնչեն «Բիթլզի» երգերը: «Սկզբում կներկայանանք ակումբային համերգով, հետո, եթե հաջողվի, հանդես կգանք մեծ դահլիճում»,-ասաց նա: Մենք հարցրինք` արդյոք տիկին Գուրջինյանը կապը պահում է երաժշտական նախագծերի մասնակիցների հետ. «Իհարկե, բոլորի հետ էլ մտերիմ եմ: Օրինակ` Արթուր Ալեքի հետ նույնիսկ համագործակցել ենք, ստեղծել ենք մի քանի երգ, որոնց երաժշտության հեղինակը ես եմ, խոսքերինը` ինքը: Նրանք բոլորն էլ գիտեն իմ տեղը եւ երբ ունենում են իմ կարիքը, անպայման հանդիպում ենք»,-եզրափակեց երգահանը:

Աննա Բաբաջանյան, Armlur.am