Ինչ վիճակում է Մխիթարյանը վերադարձել Լոնդոն․ «Արսենալի» մեկնարկային կազմը «Սթոք Սիթիի» դեմ խաղում

1in.am | Անգլիայի Պրեմիեր լիգայի 32-րդ տուրում վաղը Լոնդոնի «Արսենալը» «Էմիրեյթս» մարզադաշտում կմրցի «Սթոք Սիթիի» հետ: 31-րդ տուրից հետո «Ստոք Սիթին» 27 միավորով նախավերջին՝ 19-րդ հորիզոնականում է և պայքարում է Պրեմիեր լիգայից դուրս չմնալու համար: «Արսենալը» 48 միավորով 6-րդ հորիզոնականում է և 8 միավորով զիջում է լավագույն հնգյակը եզրափակող «Չելսիին»: Կարելի է ասել, որ Արսեն Վենգերի թիմն այլևս հնարավորություն չունի պայքարելու լավագույն քառյակում տեղ ունենալու համար:

Գալիք մրցաշրջանում լոնդոնյան թիմի Չեմպիոնների լիգայի խաղարկությանը մասնակցելու միակ հնարավորությունը Եվրոպա լիգայի գավաթը նվաճելն է: Արդեն ապրիլի 5-ին «Արսենալը» Մոսկվայում Եվրոպա լիգայի խաղարկության քառորդ եզրափակչի առաջին հանդիպումը կանցկացնի ԲԿՄԱ-ի հետ: Արսեն Վենգերի ներկայիս խնդիրը մոսկովյան խաղին թիմին պատշաճ կերպով նախապատրաստելն է: Հիշեցնենք, որ կապված ազգային հավաքականների ընկերական հանդիպումների հետ եվրոպական առաջնություններում դադար էր: «Արսենալի» մի շարք առաջատար ֆուտբոլիստներ միացել էին իրենց ազգային թիմերին: Նշենք, որ Վենգերի թիմի հիմնական կազմի գրեթե բոլոր ֆուտբոլիստները ելութ են ունենում ազգային հավաքականներում: Հենրիխ Մխիթարյանը միանալով Հայաստանի ազգային հավաքականին առանց փոխարինման մասնակցեց Էստոնիայի և Լիտվայի ընտրանիների հետ խաղերին: Հայաստանցի շատ երկրպագուներ այն կարծիքին են, որ Մխիթարյանը նշված մրցավեճերում խնայեց իրեն, «Արսենալի» առաջիկա հանդիպումների համար:

Այդ երկու մրցավեճերում մեր հավաքականն այն աստիճան խղճուկ տեսք ուներ, որ Մխիթարյանի իրեն խնայել կամ չխնայելը երկրորդական պլան է մղվում: Եթե նույնիսկ «Արսենալի» կիսապաշտպան գործեր անձնուրաց, միևնունն է պատկերը նույնն էր լինելու, ասել է թե «ձուկը գլխից է հոտում»: Ամեն դեպքում փաստ է, որ մեր հավաքականի ավագը Երևանից Լոնդոն է վերադարձել ոչ այնքան լավ տրամադրությամբ: Ամուր նյարդեր են հարկավոր նման խաղերից հետո արագ վերականգնվելու համար: Հայաստանի խաղերում բացասական լիցքերն ու էմոցիաներն այնքան շատ են, որ ակումբ վերադառնալուց հետո հնարավոր է խնդիրներ առաջանան:

«Սթոք Սիթիի» հետ հանդիպումը թե Վենգերի և թե ֆուտբոլիստների համար լավ հնարավորություն է դադարի պատճառով առաջացած խնդիրները կարգավորելու համար: Ըստ փորձագետների վաղը Վենգերը կպայքարի 4-3-2-1 դասավորությամբ: Մասնավորապես, դարպասում կլինի Չեխը, իսկ պաշտպանության կենտրոնում՝ Կոսելնին և Մուստաֆին: Աջ եզրում կխաղա Բելերինը, իսկ ձախից՝ Մոնրեալը: Կիսապաշտպանության կենտրոնում կգործեն Ջական և Ռեմսին: Ենթահարձակվողի դիրքում կլինի Օզիլը, իսկ աջ եզրում՝ Հենրիխ Մխիթարյանը: Ձախ եզրում էլ հանդես կգա Իվոբին, իսկ կենտրոնական հարձակվողի դիրքում՝ Օբամեյանգը:

Պրեմիեր լիգայի 30-րդ տուրում «Արսենալը» սեփական հարկի տակ 3:0 հաշվով առավելության էր հասել «Ուոտֆորդի» նկատմամբ: Այս խաղում Մխիթարյանը դարձել էր գոլի և գոլային փոխանցման հեղինակ: Այս խաղից հետո բրիտանական մամուլը կրկին հիշատակեց Մխիթարյան-Օբամեյանգ խաղային զույգի արդյունավետության մասին: Մասնավորապես նշվում էր, որ հայ-գաբոնյան զույգին հաջողվել է «Արսենալում» շարունակել այն համագործակցությունը, որը նրանց միջև ձևավորվել էր դեռևս «Բորուսիայում»:

Opta պարբերականի տվյալներով Մխիթարյանն ու Օբամեյանգը Պրեմիեր լիգայում միասին խաղադաշտում անցկացրել են 406 րոպե և ստեղծել են 3 գոլ: Սա «Արսենալի» ֆուտբոլիստների լավագույն ցուցանիշն է Պրեմիեր լիգայում: Նախքան նրանց՝ ոչ ոք նման ցուցանիշ չի գրանցել: Ցավալի է, որ խաղային այս զույգը «Արսենալին» չի կարող օգնել Եվրոպա լիգայի խաղարկությունում: Հիշեցնենք, որ Օբամեյանգը Եվրոպա լիգայում խաղալու իրավունք չունի, քանզի այս մրցաշարին մասնակցել է Դորտմունդի «Բորուսիայի» կազմում: Վերջինս իրավունք էր ձեռք բերել մասնակցելու Եվրոպա լիգայի փլեյ-օֆին: Եթե վաղը Մխիթարյանն ու Օբամեյանգը կխաղան միասին, ապա ԲԿՄԱ-ի դեմ Վենգերը ստիպված է լինելու կրկին փոփոխություններ կատարելու:

Դեռևս հարցականի տակ է ֆրանսիացի հարձակվող Ալեքսանդր Լակազետի մասնակցությունը: Առկա խնդիրների պայմաններում Վենգերը Եվրոպայի լիգայում կենտրոնական հարձավողի դիրքում օգտագործում է Դենի Ուելբեքին:

Ինչևէ, «Արսենալ»-«Սթոք Սիթի» հանդիպումը կսկսվի Երևանի ժամանակով 16:30-ին:

Այս թեմայով Նորություններ Մխիթարյանի առողջական վիճակից Ռոնալդուն առաջին անգամ կարող է պահեստայինների նստարանին մնալ Վենգերն՝ իր հեռանալու մասին «Ժամանակն է, որ միջազգային հանրությունը ճանաչի մարդկության դեմ այս հանցագործությունը». Հենրիխ Մխիթարյան Մխիթարյանը հայտարարություն է տարածել