«Սասնա ծռերի» 2 անդամներին ծեծելու դեպքով նյութեր են նախապատրաստվում

Հուլիսի 27-ին ՊՊԾ գնդի տարածքում տեղի ունեցած փոխհրաձգությունից հետո իրավապահներին հանձնված «Սասնա ծռերի» անդամներ Գագիկ Եղիազարյանին եւ Արամ Հակոբյանին բռնության ենթարկելու վերաբերյալ նյութեր են նախապատրաստվում: Այս մասին Armtimes.com-ի հետ զրույցում հայտարարել է նրանց պաշտպան Լուսինե Հակոբյանը՝ հավելելով, որ չգիտի՝ այդ նյութերը նախապատրաստվում են ԱԱԾ վարույթո՞ւմ, թե՞ հիմնական գործի հետ փոխանցվել են Հատուկ քննչական ծառայություն:

Գագիկ Եղիազարյանը եւ Արամ Հակոբյանը, պաշտպանի պնդմամբ, ձերբակալվելիս ծեծի են ենթարկվել իրավապահների կողմից: Առկա են մարմնական վնասվածքներ, մասնավորապես՝ Արամ Հակոբյանը դեմքի, մեջքի, գոտկատեղի շրջանում, հավանական է նաեւ՝ քթի կոտրվածք: Գագիկ Եղիազարյանը վնասվածքներ է ստացել պարանոցի շրջանում:

Լուսինե Հակոբյանի փոխանցմամբ՝ Արամ Հակոբյանին ծեծողները եղել են 7-8 հոգի, նրանց դեմքերը Հակոբյանը չի տեսել, քանի որ դիմակավորված են եղել: Պաշտպանը միջնորդել էր, որ թե՛ Եղիազարյանը, թե՛ Հակոբյանը ենթարկվեն դատաբժշկական փորձաքննության: «Գագիկ Եղիազարյանը դեռեւս դատաբժշկական փորձաքննության չի ենթարկվել, Արամ Հակոբյանին տրվել է դատաբժշկի ուղեգիր, որի համաձայն՝ նա պետք է ենթարկվեր ռենտգեն եւ նյարդաբանական հետազոտությունների, ինձ պետք է տեղեկացնեին այդ հետազոտությունների կատարման վայրի եւ ժամի մասին, որ ես եւս մասնակցեի, բայց ես դեռեւս տեղեկություն չունեմ: Ռենտգեն հետազոտությամբ պետք է պարզվի նաեւ՝ Արամ Հակոբյանը ծեծի հետեւանքով քթի կոտրվածք ստացել է, թե՞ ոչ: Ինչքան ուշացնեն, այնքան ավելի դժվար կլինի ունենալ ամբողջական եւ ճշգրիտ փորձագիտական եզրակացություն»,- ասել է պաշտպանը:

Ըստ ոստիկանության հաղորդագրության՝ Գագիկ Եղիազարյանն ու Արամ Հակոբյանը հուլիսի 27-ի փոխհրաձգությունից հետո հանձնվել են: Այնինչ, նրանց պաշտպան Լուսինե Հակոբյանը հակառակն է պնդում. «Եթե իմ պաշտպանյալները հանձնվել են, ապա ինչո՞ւ են ենթարկվել բռնությունների, ես առ այսօր իմ այդ հարցադրման պատասխանը չեմ ստացել»,- նշել է Լուսինե Հակոբյանը:

Նա տեղեկացրեց, որ Գագիկ Եղիազարյանին եւ Արամ Հակոբյանին մեղադրանք է առաջադրվել ՀՀ Քրեական օրենսգրքի 219 հոդվածի 3-րդ մասի 1-ին կետով (շենքեր, շինություններ զավթելը, որոնք կատարվել են կազմակերպված խմբի կողմից) եւ 235 հոդվածի 3-րդ մասի հատկանիշներով (ապօրինի կերպով զենք-զինամթերք, ռազմամթերք պահելը կամ փոխադրելը, որը կատարվել է կազմակերպված խմբի կողմից): Պաշտպանը նշել է, որ առաջադրված մեղադրանքում խմբի անդամները իրենց մեղավոր չեն ճանաչում եւ հրաժարվել են ցուցմունք տալ: Նրանք կալանավորվել են հուլիսի 29-ին:

«Իմ պաշտպանյալներին երկու ամսով կալանավորելը հիմնավորվել է նրանով, թե ճնշում կգործադրեն գործով այլ մասնակիցների նկատմամբ, կթաքնվեն նախաքննությունից, կկատարեն նոր հանցանք, կկեղծեն ապացույցները: Կարծրատիպային հիմնավորումներ են, որոնք բոլոր միջնորդություններում լինում են, կալանքի որոշումները ապօրինի են, որովհետեւ որեւէ կերպ չեն հիմնավորվում»,- ասել է Հակոբյանը:

Հիշեցնենք, որ նրանք հանձնվել են ազատամարտիկ Պավել Մանուկյանի եւ նրա որդու՝ Արամի վիրավորվելուց հետո: