«Ես այդ կայքերի խմբագիրը չեմ»

Gazeta.am և Neonews.am լրատվական կայքերի դեմ ԱԺ պատգամավոր Տիգրան Ուրիխանյանի հայցով պատասխանող Լուիզա Գումրոյանը պարզաբանում է ուղարկել «Հրապարակ»-ի խմբագրություն՝ Ավան և Նոր Նորք վարչական շրջանների ընդհանուր իրավասության դատարանի վճռի առթիվ, ինչի մասին այսօր տեղեկություն է տարածել Ուրիխանյանի գրասենյակը:

«Նախ ցանկանում եմ նշել, որ ես Gazeta.am և Neonews.am լրատվական կայքերի խմբագիրը չեմ, որևէ առնչություն չունեմ այդ կայքերի հետ, բազմիցս ասել եմ, թե ինչ գործունեություն եմ իրականացրել: Կայքերը չեն գործում այս տարվա հունվարից, այժմ դրանք անգամ իմ անունով չեն գրանցված, քանզի ի սկզբանե որևէ հետաքրքրություն չեմ ունեցել վերոնշյալ կայքերի հետ կապված: Ես եղել եմ «Առաջ Ռուսաստան և Հայաստան» բարեգործական հիմնադրամի կրթական բաժնի ղեկավարը: Հիշյալ կայքերի հետ առնչությունս եղել է այնքանով, որ դրանք գրանցված են եղել իմ անունով, որը ինձ տարիներ առաջ խնդրել էր Ա. Նիկողոսյանը: Ես ի սկզբանե ինձ պատշաճ պատասխանող չեմ ճանաչել ու մինչ օրս էլ չեմ համարում: Ճիշտ է դատարանը հայցը մասնակի բավարարել է, սակայն ես համաձայն չեմ վճռի հետ, ուստիև պատրաստվում եմ դիմել վերաքննիչ դատարանին վճիռը բողոքարկելու նպատակով: Եվս մեկ, հուսամ վերջին անգամ կհայտարարեմ, որ ես Ա. Նիկողոսյանի հետ որևէ առնչություն չունեմ, իսկ եթե Տ. Ուրիխանյանի կռիվն ինձ հետ է, ուրեմն շատ լավ, դատը շարունակում ենք արդեն վերաքննիչ դատարանում»: