Հնդկական հեռուստասերիալն այլեւս չի ցուցադրվելու հեռուստաընկերության եթերում, թեև սյուժեն դեռ ավարտված չէ

Հնդկական «Կնոջ ուժը» հեռուստասերիալն այլեւս չի ցուցադրվելու ATV հեռուստաընկերության եթերում, թեեւ սյուժեն դեռ ավարտված չէ: Այս մասին համացանցի իր էջում հայտնել է հեռուստաընկերության գործադիր տնօրեն Ռուբեն Արամյանը:

«Ահա եւ վերջ … Սույն թվականի հուլիսի 24-ից ATV-ն հրաժարվելու է հնդկական «Կնոջ ուժը» հեռուստասերիալի ցուցադրությունից՝ չսպասելով դրա ավարտին: Գրեթե 9 ամիս առաջ ATV-ն առաջիններից էր, որ մեկնարկ տվեց հնդկական սերիալների ցուցադրությանը, բայց եկել է ժամանակը փոփոխություններ անելու համար: Ես գիտեմ, որ իմ որոշումը տակտիկական տեսանկյունից կարող է լավ միտք չթվալ, բայց ռազմավարական հեռանկարում այն ճիշտ է: Այո՛, հնդկական սերիալներ ցուցադրելը հեռուստաալիքի համար նշանակում է ավելի քիչ ծախսերով ունենալ ավելի ռեյտինգային ծրագիր, բայց հնդկական սերիալներ ցուցադրելը նշանակում է նաեւ աստիճանաբար կրճատել սեփական արտադրությունը: Դեռ 15 տարի առաջ հայկական ալիքները գնում էին թանկարժեք արտասահմանյան սերիալներ, ինչը իր հերթին խթանեց հայկական արտադրությանը, քանի որ այդ նույն գնով հնարավոր էր արտադրել սեփականը՝ վարձելով հայ սցենարիստի, հայ ռեժիսորի, հայ դերասանի եւ այլ մասնագետների: Ի՞նչ ցույց տվեցին վերջին 9 ամիսները։ Փաստորեն այն, որ ծախսելով գրեթե 6 անգամ ավելի քիչ գումար, կարող ես ունենալ նույն, իսկ գուցե նաեւ ավելի բարձր վարկանիշ, ինչ ունեիր հայկականը ցուցադրելով: Սակայն, կարծում եմ, որ հեռուստառեյտինգը, որքան էլ այն կարեւոր լինի, չպետք է միակ ցուցիչը լինի, եւ ելնելով այս նկատառումից՝ մենք որոշեցինք, որ ավելի հեռանկարային ու ճիշտ է ծախսել ավելի շատ գումար, բայց արտադրել սեփական հեռուստանախագծեր, քան ծախսել ավելի քիչ ու ձեռք բերել ռեյտինգային հնդկական սերիալներ: Ի վերջո, շատ է հնչում այն միտքը, որ մենք որակյալ սերիալներ չունենք: Ողջ հարցը նրանում է, թե ինչն ենք ինչի հետ համեմատում: Եթե մեր սերիալները համեմատում ենք HBO-ի ու Netflix-ի սերիալների հետ, ապա այո՛, չունենք: Գուցե նաեւ հենց հնդկականների հետ համեմատելիս էլ ոմանք այդ եզրահանգմանը գան: Կարծում եմ, սակայն, որ պետք է համեմատենք մեր սերիալները՝ մեր սերիալների հետ, որովհետեւ մենք չունենք ո՛չ արեւմտյան բյուջեները, ո՛չ էլ անգամ հնդկական փորձը, որը տասնամյակներ է հաշվում: Ակնհայտ է, որ 10 -15 տարվա վաղեմության սերիալների համեմատությունը այսօրվա սերիալների հետ պարզ ու ակնառու է դարձնում այն որակական աճը, որ գրանցվել է: Մենք ընտրում ենք հետագա զարգացման ճանապարհը, անգամ եթե կարճաժամկետ հեռանկարում դա նշանակում է ռեյտինգային նահանջ»,- գրել է նա:

Նյութի աղբյուրը՝ այստեղ

Այս թեմայով «Մերժվածը» հեռուստասերիալից հայտնի Ակաշին իրական կյանքում այսպիսին հաստատ չէիք պատկերացնի Բոլիվուդյան ամենաաղմկահարույց պլաստիկ վիրահատությունները. Իչային ու Տապասիային նախկինում տեսնելն անգամ սարսափելի է Բացառիկ... «Մեղրամիս» հեռուստասերիալի Վերջին սերիան. Գլխավոր հերոսներից մեկը կմահանա. Ամբողջական տարբերակը դիտեք Այստեղ .