«Էս գործով շինծու ա ամեն բան… ». Թևոսիկի եղբոր սպանության մեղադրյալը համարում է, որ ուրիշի տեղն է նստած

Կենտրոն և Նորք-Մարաշ վարչական շրջանների ընդհանուր իրավասության դատարանում Արմեն Բեկթաշյանի նախագահությամբ դեռևս շարունակվում է Թևոսիկի եղբոր՝ Արթուր Սաֆարյանի սպանության կազմակերպման, այդ սպանությունը կատարողին սպանելու և ապօրինի զենք, զինամթերք ձեռք բերելու, պահելու, կրելու, գործադրելու համար մեղադրվող Իսրայել Սարգսյանի գործով դատական քննությունը:

46-ամյա Իսրայել Սարգսյանը մեղադրվում է ՀՀ քրեական օրենսգրքի 38-104 հոդվածի 2-րդ մասի 8-րդ, 104 հոդվածի 2-րդ մասի 11-րդ կետերով և 235 հոդվածի 1-ին մասով:

Ըստ մեղադրանքի՝ Իսրայել Սարգսյանը կազմակերպել և օժանդակել է Մովսես Ներսիսյանի կողմից Արթուր Սաֆարյանի սպանության կատարմանը, ապա այդ հանցանքը թաքցնելու նպատակով կյանքից զրկել է սպանության կատարող Մովսես Ներսիսյանին:

Բացի այդ, Իսրայել Սարգսյանը, ըստ մեղադրանքի, ապօրինի ձեռք է բերել, կրել ու գործադրել է «ՏԿ» մոդելի ատրճանակ, փամփուշտներ և այլ ռազմամթերք:

Թևոսիկի եղբոր՝ Արթուր Սաֆարյանի սպանության ենթադրյալ կատարողի՝ Մովսես Ներսիսյանի դիակը հայտնաբերված չէ:

Ամբաստանյալ Իսրայել Սարգսյանի դեմ մեղադրական ցուցմունք տված Տիգրան Ա.-ն մեղադրվում է սպանության մասին իմանալ-չհայտնելու համար: Գործով նա մեղադրյալի կարգավիճակ ունի, բայց նրա մասն անջատվել է Իսրայելի մասից: Նա կալանքի տակ չէ:

Դատարանը դեռ հետազոտում է 26 հատորից բաղկացած քրեական գործում առկա ապացույցները, դրանց վերաբերյալ հրավիրվում ու հարցաքննվում են համապատասխան փորձագետները:

Դատական այս նիստին դատարան էր ներկայացել մեղադրական եզրակացության մեջ հիշատակված՝ տեսանյութերի մի մասի վերաբերյալ փորձաքննություն իրականացրած փորձագետը:

Վերջինս նշեց, որ ինքը կոնկրետ կատարել է երկու ֆայլերի փորձաքննությունը: Տեսանկարահանումը կատարվել էր Սարյան փողոցի շենքերից մեկի արտաքին պատին տեղադրված տեսանկարահանող սարքով, որի տեսադաշտում եղել է փողոցի մի հատվածը:

Մեղադրական եզրակացության մեջ նշված է տեսանյութի այն հատվածը, որում երևում է, որ տեսասարքի առջևով անցնում է մի անձնավորություն: Տեսանկարահանված նյութը առանց ձայնի էր: Փորձագետը նշված նյութից առանձնացրել է տեսապատկերներ լուսանկարների տեսքով՝ հինգ կադր է առանձնացված, երևում է, որ մարդ է անցնում:

Ամբաստանյալ Իսրայել Սարգսյանը այդ անցնող մարդու վերաբերյալ փորձագետին հարցրեց. «Ինձ նմա՞ն ա»:

Փորձագետն այդ հարցին պատասխանել չէր կարող, նա նշեց, որ ինքը անձի նույնացման փորձաքննություն չի կատարել, դա իր իրավասության մեջ չի եղել, իրեն նույնացման վերաբերյալ հարցեր չեն տրվել:

Ամբաստանյալը շարունակեց հարցերը: Նա փորձագետի ու դատարանի ուշադրությունը հրավիրեց, որ նկարահանված անցորդի «կուրտկեն» սպիտակ է երևում, տաբատը՝ մուգ գույնի: Հնարավո՞ր է, որ տեսանակարահանման արդյունքում սև բաճկոնը սպիտակ երևա, իսկ բաց գույնի տաբատը՝ մուգ:

Փորձագետն ասաց, որ կախված՝ տեսանկարահանման որակից, լուսավորությունից, հեռավորությունից՝ կարող են լինել գունային տարբերություններ: Այդ հարցին հնարավոր է պատասխանել՝ տեսանխցիկի ուսումնասիրության ու փորձարարության արդյունքում:

Ամբաստանյալը պնդեց, որ տեսախցիկը եղել է գիշերային տեսանելիությամբ, հետևաբար՝ նա գույների խախտումներով նկարահանում չպետք է կատարեր. «Դա տարրական բան ա, տրամաբանություն գոյություն ունի՝ սևը սպիտակ չէր կարա ցույց տար…»:

Հետազոտվող նյութի մեջ երևում է միայն, որ Սարյան փողոցով անցնում է մի մարդ, բայց ո՞վ է նա: «Սարյան փողոցով բազմաթիվ մարդիկ են անցնում…»,- ասաց ամբաստանյալը:

Փորձագետը նշեց, որ անձի նույնացումը դիմանկարային փորձաքննությամբ է որոշվում, իրենց փորձագիտական կենտրոնում նման փորձաքննություն չի նշանակվել:

Ամբաստանյալի շահերի պաշտպան Հ. Սարդարյանը մեջբերեց գործով կատարված մեկ այլ փորձաքննության եզրակացությունից հատված, որում նշված էր, թե տեսանյութերը բավարար որակի չեն, վատ լուսավորության, մեծ հեռավորության պատճառով նյութի մեջ պատկերված անձի որակյալ հատկանիշների վերաբերյալ հնարավոր չէ ստանալ տվյալներ:

Հրավիրված փորձագետը նշեց, որ ինքը մեջբերված եզրակացության հետ ոչ մի կապ չունի:

Ամբաստանյալ Իսրայել Սարգսյանն ըմբոստացավ. «Մենք 2-3 ամիս սպասել ենք, որ դուք գաք, կոշտ դիսկով ցույց տաք փորձաքննված նյութը…»:

«Ես հետազոտել եմ այն, ինչ ինձ տրամադրել է քննիչը»,- ասաց փորձագետը:

Ամբաստանյալը ձայնը բարձրացրեց. «Քննիչն ասում էր՝ ես կգամ դատարան, կապացուցեմ…»:

Ամբաստանյալի շահերի պաշտպան Հ. Սարդարյանն առաջարկեց մեղադրական եզրակացության մեջ նշված տեսանյութերը հանել ապացույցների շարքից: Նախագահող դատավորը նկատեց. «Շատ եք շտապում»:

Որոշվեց տեսանյութերը փորձաքննությունների ենթարկած բոլո՛ր փորձագետներին հրավիրել դատարան ու հարցեր տալ՝ եզրակացությունների վերաբերյալ:

Ամբաստանյալը հայտարարեց, թե «հեշտ տարբերակ» կարող է առաջարկել՝ երբ իրեն ձերբակալել են, «Սուր անկյունով» «կինոյի նման» ցույց են տվել կադրեր օդանավակայանում, Սարյան փողոցում կատարված տեսանկարահանումներից. «Կարաք դիմեք «Սուր անկյուն», թող էդ նյութերը տրամադրեն»:

Ամբաստանյալն իր «հեշտ տարբերակը» հեգնանքով առաջարկեց, ապա ասաց. «70 օր սպասել էինք էս փորձագետին, մի 70 օր էլ կսպասենք մյուսներին, ու ոչ մի պատասխան չենք ստանա»:

Նա առաջարկեց այս դատական նիստն արդյունավետ օգտագործել ու եթե ուրիշ՝ չհետազոտված իրեղեն ապացույցներ են մնացել, հետազոտել դրանք: Բայց այլ իրեղեն ապացույցներ կարծես թե չկային:

Ամբաստանյալի դժգոհությունը ավելի բուռն դարձավ. «Ինչքա՞ն ուրիշի տեղը ստեղ նստեմ… Էս գործը պատվերով ձգձգվում ա՝ 3-4 տարի ա՝ արհեստականորեն ձգձգվում ա… Փառք Աստծո, եվրադատարան գոյություն ունի…»:

Ամբաստանյալը հետը բերել էր գործում առկա՝ Երևանի հատակագիծը, որի վրա նշված էին իրեղեն ապացույցների հայտնաբերման վայրերը: Նշված էր, որ հայտնաբերվել է ենթադրյալ մարդասպանի ձեռնոցը, որի վրա եղել են կրակոցի արգասիքներ, իսկ ներսում՝ ԴՆԹ-ի նմուշ: Սակայն քրեական գործում այս ձեռնոցը որպես իրեղեն ապացույց՝ բացակայում է, ըստ ամբաստանյալի՝ այն դիտավորյալ կորցրել են, քանի որ, իրոք, հետքեր էր պարունակում…

«Ե՛ս եմ դատվում, էդ հարցը ի՛նձ ա հուզում, էս գործով շինծու ա ամեն բան, ես գիտեմ՝ դատարանը ինչ ձևի կանդրադառնա… Բայց վերջիվերջո՝ էս երկիրը չոփով չի ծածկված…»:

Նախագահողը մի քանի անգամ դիտողություն արեց ամբաստանյալին ու կոչ արեց լինել «կոռեկտ»:

Հաջորդ դատական նիստին դատարան կհրավիրվեն տեսանյութերը փորձաքննած մնացած փորձագետները:

1in.am