«Դա կնշանակի, որ տարածաշրջանում շատ շուտով կլինի պատերազմական իրավիճակ»

Լրագրի զրուցակիցն է միջազգայնագետ Սուրեն Սարգսյանը.

Պարոն Սարգսյան, ԱՄՆ պետքարտուղարությունը զգուշացրել է տարբեր երկրներին ռուսական ռազմարդյունաբերական համալիրի և հետախուզության հետ գործարքների հնարավոր հետևանքների մասին, այդ թվում Հայաստանին։ Ի՞նչ վտանգներ եք Դուք տեսնում, և ինչ պետք է ձեռնարկի Հայաստանը:

Ես չեմ պատկերացնում, թե Հայաստանն ինչ գործնական քայլեր պետք է ձեռնարկի և ինչ ուղղություններով։ Եթե խոսքն այլընտրանքային ճանապարհներով զենքի ձեռքբերման մասին է, ապա Ռուսաստանից զատ, մենք, ըստ էության, այլընտրանք չունենք։ Զենք վաճառող համաշխարհային գերտերություններից Միացյալ Նահանգները և ԵՄ-ն էմբարգոյի են ենթարկում և զենք չեն վաճառում պատերազմող պետություններին։ Սա այդ երկրների սկզբունքային մոտեցումն է։ Եվ սա երկար տարիների պատմություն ունեցող քաղաքական դիրքորոշում է։ Մենք պետք է հաշվի առնենք այն հանգամանքը, որ Հայաստանին զենք չեն վաճառում այնպիսի գերտերություններ, ինչպիսին են Թուրքիան, Իսրայելը, Պակիստանը, ըստ էության՝ Հայաստանն ամբողջ պատմության ընթացքում զենք է ձեռք բերել միայն Ռուսաստանից և բացառիկ դեպքերում նաև այլ պետություններից, մասնավորապես Չինաստանից: Բայց ոչ Ռուսաստանից ձեռք բերվող զենքն ու զինամթերքը չափազանց թանկ են Հայաստանի համար։ Նույն Իսրայելը պատրաստակամություն է հայտնել զենք վաճառելու, բայց դա մեզ համար ձեռնտու չէ, որովհետև շատ թանկ է։
Հիմա այստեղ Հայաստանն ինչ գործնական քայլեր կարող է իրականացնել. ըստ էության՝ աշխատանք պետք է տարվի Պետդեպարտամենտի հետ, և մենք պետք է մեր գործընկերներին ներկայացնենք, որ եթե այդ պատժամիջոցները կիրառվեն և Հայաստանը չկարողանա զենք ու զինամթերք ձեռք բերել ՌԴ-ից, տարածաշրջանում ուժերի բալանսի խախտում է լինելու, որովհետև Ադրբեջանն ունի այլընտրանքներ՝ Թուրքիա, Իսրայել, Պակիստան և այլն, իսկ Հայաստանն այլընտրանք չունի։ Դա կնշանակի, որ տարածաշրջանում շատ շուտով կլինի պատերազմական իրավիճակ, քանի որ, ինչպես նշեցի, ուժերի բալանսը կխախտվի հօգուտ Ադրբեջանի, ինչին էլ Ադրբեջանը տարիներ շարունակ ձգտել է։ Եվ ես համոզված եմ, որ Միացյալ Նահանգներն այդ ճանապարհով չի գնալու, և Հայաստանի դեմ պատժամիջոցներ չեն կիրառվելու՝ հաշվի առնելով հենց այն հանգամանքները, որոնց մասին ես նշեցի։
Միևնույն ժամանակ, ԱՄՆ նախագահը հանձնարարել է պետական դեպարտամենտին ուսումնասիրել և այնպես կիրառել այդ պատժամիջոցները, որ դրանք բարեկամ երկրներին չխանգարեն, որովհետև, ինչպես գիտեք, ռուսական տնտեսական ներկայությունը Հայաստանում բավական մեծ է, դրա վառ օրինակներից են, օրինակ, Գազպրոմը և ռուսական այլ ընկերություններ, և բնական էր, որ եթե այդ ընկերությունների դեմ պատժամիջոցներ կիրառվեին, Հայաստանը դրանից տուժելու էր: Բայց, ինչպես տեսնում եք, այդ տնտեսական պատժամիջոցները Հայաստանի մասով դեռևս չեն կիրառվել։ Նույնը վերաբերում է նաև ռուսական արդյունաբերական ոլորտին։ Այստեղ, կարծում եմ, Միացյալ Նահանգները բարեկամական քայլեր կձեռնարկի, և մենք նման խնդրի չենք բախվի։

շարունակությունը՝ կայքում

Այս թեմայով Ղարաբաղի բանակը հաղորդագրություն է տարածել Լավրովն ու Մամեդյարովը Ղարաբաղի հարցով քննարկում են անցկացրել Պատմության 10 խոշոր պատերազմներ, որոնց սկսման պատճառներն ավելի քան անլուրջ են եղել Ադրբեջանի խնդրանքը Հայաստանին. Բաքվում հասկացել են՝ ինչ է կատարվել Ղարաբաղի բանակը նոր տեսագրություն է տարածել հակառակորդի կուտակումների մասին