Կրծքի ցավի 6 հնարավոր պատճառ. ե՞րբ է պետք սկսել անհանգստանալ

EnterTrain-ը ներկայացնում է կրծքում ցավի 6 հնարավոր պատճառ:

1. Կրծքագեղձերի ֆիբրոզ-կիստոզային փոփոխություններ
Այս բարորակ վիճակն արձանագրվում է հորմոնալ փոփոխությունների հետևանքով: Կնոջը կարող է աննշան ցավ անհանգստացնել երկու գեղձերում դաշտանից առաջ կամ դրա ժամանակ:

2. Անհարմար կրծկալ կրել
Կրծկալ կրելը, որը չափով հարմար չէ և չի պահում կուրծքը, կարող է նպաստել ցավի առաջացմանը: Կրեք պահող կրծկալ, որը ձեզ իդեալականորեն հարմար է, նաև սպորտով զբաղվելիս հատուկ սպորտային կրծկալ հագեք:

3. Որոշ դեղամիջոցների օգտագործում
Կրծքում ցավը կարող է որոշ դեղամիջոցների, այդ թվում՝ հորմոնալ դեղամիջոցների, օրալ հակաբեղմնավորիչների, հակադեպրեսանտների կողմնակի ազդեցություն լինել:

4. Մաստիտ
Կրծքագեղձերի վարակիչ հիվանդություն է: Կերակրող մայրերն այս խնդրի ռիսկի գոտում են, սակայն ցանկացած կին կարող է վարակվել: Այս հիվանդությունն արտահայտվում է կարմրությամբ, տեղային ջերմաստիճանի բարձրացմամբ, կրծքագեղձի այտուցով, ջերմությամբ, մարմնի թուլությամբ:

5. Կրծքագեղձի վիրահատություն
Վիրահատությունից հետո առաջացող սպին կարող է ցավ առաջացնել:

6. Փարթամ կուրծք
Մեծ կրծքով աղջիկները դժվարություններ են ունենում քնելիս և սպորտով զբաղվելիս: Փարթամ կուրծքը կարող է ցավ պատճառել իր չափի պատճառով: Պետք է հարմար կրծկալ կրել, որում կինը հարմարավետ կզգա:

Ե՞րբ է պետք բժշկի դիմել
Եթե ցավը՝

• Շատ ուժեղ է
• Կապված չէ դաշտանային ցիկլի հետ
• Մշտական է
• Ուղեկցվում է այլ ախտանիշերով (ծծապտուկից արտադրություններով)

Ցիկլային և ոչ ցիկլային ցավ
Կա կրծքում ցավի 2 տեսակ՝ ցիկլային և ոչ ցիկլային
Առաջինը կապված է դաշտանային ցիկլի հետ, տուժում են երկու գեղձերը, հաճախ դրսևորվում է ցավով և ծանորության զգացումով, առաջանում է ցիկլի սկզբից առաջ, սովորաբար անհանգստացնում է ավելի երիտասարդ կանանց:

Ոչ ցիկլային ցավը կապված չէ դաշտանային ցիկլի հետ և սովորաբար մեկ կրծքագեղձն է տուժում (կամ դրա մի մասը): Առավել հաճախ հանդիպում է 30-50 տարեկան կանանց շրջանում: Ցավը սուր և այրող է լինում:

Ինչպես ազատվել կրծքի ցավից տնային պայմաններում

• Կրծի վրա սառը կամ տաք կոմպրես արեք
• Սննդակարգից ժամանակավորապես բացառեք սուրճը, թեյը և կոֆեինի այլ աղբյուրները
• Սահմանափակեք ճարպերի ստացումը, ավելի շատ մրգեր, բանջարեղեն և ամբողջական հատիկեղենով մթերքներ կերեք
• Փոխեք ձեր կրծկալը, եթե անհարմար է
• Ռելաքսացիայի մեթոդներից օգտվեք
• Անալգետիկներ (ասպիրին, իբուպրոֆեն) օգտագործեք՝ դա նախապես քննարկելով բժշկի հետ
• Բժշկի հետ խորհրդակցեք հավելումներ (մագնեզիում, վիտամին E) օգտագործելու նպատակահարմարության վերաբերյալ