Ի՞նչ գիտի Բաղդասարյանը, որ չգիտեն մյուսները

Shame.am-ը գրում է․

Այսօր Վանաձոր քաղաքում ստորագրվեց «Բարգավաճ Հայաստան», «Հայկական վերածնունդ» և «Լուսավոր Հայաստան» կուսակցությունների համագործակցության հուշագիրը, որի կետերից մեկը քաղաքի նորընտիր ավագանու անդրանիկ նիստին ԼՀԿ ավագանու ցուցակը գլխավորող համայնքի ղեկավարի թեկնածու Քրիստ Մարուքյանին պաշտպանելու մասին է: Ինչպես հայտնի է, ավագանու ընտրությունների արդյունքներով ընդդիմադիր կուսակցությունները 18 մանդատ են ստացել, իսկ ՀՀԿ-ն ու իր դաշնակից ՀՅԴ-ն միասին՝ 15։ Եվ թվում է, թե արդյունքն արդեն իսկ կանխատեսելի է:


Բայց արի ու տես, որ, օրինակ, ԱԺ ՀՀԿ- խմբակցության ղեկավար Վահրամ Բաղդասարյանն այդպես չի կարծում: Ավելի ճիշտ, նա սպասվելիք արդյունքների մասին խոսում է ընդգծված թերահավատությամբ: Հարցին, թե արդյոք վանաձորյան քաղաքական զարգացումներն իշխանության համար սպառնալից նախադեպ չեն ստեղծում, Բաղդասարյանն ասել է. «Եթե կհաղթի՝ կխոսենք, ենթադրություններով չեմ առաջնորդվում»։

Վահրամ Բաղդասարյանի վերապահումը կարծես թե պատահական չէ: Բանն այն է, որ դրա համար իսկապես հիմքեր կան: Եվ այդ հիմքերից մեկը, ինչպես և պետք էր ենթադրել, թաքնված է ՕԵԿ-ի գրկում: Բացի այն, որ այս կուսակցությունը հայտնի է իր «շրջադարձային», որոշումներով, դրա հետ մեկտեղ էլ ունի վտանգի աղբյուր՝ հանձին իր տաքարյուն թեկնածուի: Արդեն իսկ կան կասկածներ, որ իշխանությունները կարող են ներգործել ՀՎԿ-ի ցուցակը գլխավարող Արկադի Փելեշյանի վրա և նրան հուշել, որ պետք է քվեարկել ՀՀԿ-ի թեկնածուի օգտին, հակառակ դեպքում քրեական գործ կհարուցեն վերջինիս մասնակցությամբ ծեծի առնչությամբ: Նման ճնշում կարող է լինել նաև ավագանու այլ անդամների նկատմամբ: Ու հավանաբար Բաղդասարյանը վստահ է այս հարցում, երբ պնդում է, թե ծիծաղում է նա, ով վերջում է ծիծաղում: