Սուրիկ Խաչատրյանը կաթողիկոս չէ

Այսօր կատարվեց այն, ինչի հնարավորությանը քչերն էին հավատում: Աշխատանքից ազատվեց Սյունիքի մարզպետ Սուրիկ Խաչատրյանը: Ընդամենը շաբաթներ առաջ մարզպետը դեռ բոլորին հավաստիացնում էր, թե իրեն ձեռք չեն տա, ու նրա վստահությունը լուրջ հիմքեր ուներ: Բայց արի ու տես, որ անհնարինն էլ կարող է ակնհայտ դառնալ և անձեռնմխելիին էլ երբեմն ձեռք են տալիս: Հիմա պահանջվում է ընդամենը պաշտոնաթողությունը հիմնավորող մեղմ բառեր ընտրել և ոչ մի գնով չխոստովանել, որ Լիսկան իշխանությունների համար ծանր բեռ էր դարձել և առանց այդ ծանրությունը թոթափելու ճանապարհը շարունակելը շատ դժվար է լինելու:

Օրինակ, ԱԺ փոխխոսնակ Էդուարդ Շարմազանովը, մեկնաբանելով Խաչատրյանի հեռանալը, ասել է, թե կարիք կար նոր, թարմ արյան, նոր աշխատանքի` նոր թիմով, բայց արյան կարոտ Շարմազանովը չի պարզաբանել, թե ինչու դա չեղավ իր արյունը: ՀՀԿ պատգամավոր, գեներալ Սեյրան Սարոյանն էլ իր չափով է դիտել երևույթն ու կրկին սեփական արյունը մի կողմ դրած՝ վշտացած ձայնով ասել է. «Կերաք կյանքը, աչքով տվիք, էնքան արիք, մինչև սենց էղավ: Հիմա Սուրիկ Խաչատրյանն էլ չկա, տեսնեմ` ի՞նչ եք անելու: Էդ յութուբն էլ մնաց անտեր, մարդ չկա, որ խոսաք»:

Առանց Սուրիկ Խաչատրյանի մենք բոլորս դեռ մի քիչ էլ կապրենք: Եվ հետո, ինչպես իրավացիորեն նկատել էր նույն գեներալ Սեյրանը, Լիսկան կաթողիկոս չէր, որ ցմահ բազմեր, չնայած կաթողիկոսի հետ համեմատելիս գեներալը գուցե ուրիշ բաներ է նկատի ունեցել: Եվ եթե արդեն նախկին մարզպետն իր հեռանալը գնահատի հենց այդ տեսանկյունից, ապա պիտի երախտապարտ լինի նրանց, ովքեր ստորագրեցին ազատման հրամանը, որովհետև դրանից ավելի թանկ նվեր չի լինում: Մեղավորին ազատ են արձակում առանց պատժի:

Գրում է Shame.am-ը