Վերջ անցանկալի մազերին

Ի՞նչ է կատարվում մեզ հետ, երբ անցանկալի մազեր ենք նկատում մարմնի այն հատվածում, որտեղ նրանց գոյությունը ցանկալի չէ: Բոլոր միջոցներով պայքարում ենք, իսկ երբեմն էլ հուսահատվում, որ այդ «աներես» մազերը դարձյալ լույս աշխարհ են եկել: Անկախ նրանից, թե քանի տեսակ են լինում մազերը, կանայք դրանք բաժանում են 2 տիպի՝ ցանկալի և անցանկալի, հոգ տանելով մեկի մասին ու անխնա պայքարելով մյուսի դեմ: Միակ խնդիրն այն է, որ որոշ ժողովուրդների մազը և հաստ է, և մուգ: Եվ ինչ միջոցների էլ դիմեն մեր լեդիները, մազակալումից խուսափել գրեթե հնարավոր չէ: Ամենահին ու մինչ այժմ օգտագործելի միջոցներից է մեղրամոմի կամ բուսական ծագման խեժի միջոցով անցանկալի մազերը հեռացնելը: Հիմա այս ձևը համարվում է ամենահեշտը, ամենամատչելին և կատարվում է նույնիսկ տնային պայմաններում: Բացի այդ, այն նաև շատ ավելի մատչելի է, քան գեղեցկության սրահների պրոցեդուրաները: Բայց ինչպես նշեց կոսմետոլոգ Քրիստինա Այրումյանը, այդ ձևով մազահեռացման ժամանակ հնարավոր է՝ վնասվի մազը, որովհետև մեծ դեր ունի նաև, թե ինչ ուղղությամբ է աճում այն: Երբեմն մեր կանայք դրան ուշադրություն չեն էլ դարձնում:

Մեր օրերում կիրառվում է նաև քիմիական եղանակով էպիլյացիան: Ժամանակակից արտադրությունն առաջարկում է գելերի, քսուքների հարյուրավոր տեսականի, որոնք ազդում են մազարմատների վրա և քսելուց 10-15 րոպե հետո առանց ցավի հանում են բոլոր անցանկալի մազերը: Այս արդյունքը պահպանվում է 2-3 շաբաթ:

Ներկայում անցանկալի մազերից ազատվելու ամենաարդյունավետ եղանակներից է լազերային էպիլյացիան: Սրա առավելությունն այն է, որ այս եղանակով մազերից ազատվում են երկար ժամանակով, հաճախ՝ ընդմիշտ: Լազերային ճառագայթն ազդում է մազարմատի վրա՝ ոչնչացնելով այն: Բայց կոսմետոլոգը պնդում է, որ այդ ազատումն էլ երկարաժամկետ չէ. հնարավոր է 5-6 տարի հետո նորից մազակալում: Նա խորհուրդ է տալիս դիմել ասեղային էպիլյացիայի, որը չնայած փոքր-ինչ ցավոտ է, բայց, ըստ կոսմետոլոգի, արդյունավետ է եւ ավելի անվնաս: Այստեղ էլ կա մյուս խնդիրը. ո՞ւմ դիմել, որ վստահ լինես: Այս խնդրի առաջ կանգնել էր Լուսինեն. «Պիտի հեռացնեի շուրթերիս վերևի աղվամազը, իսկ այդ կոսմետոլոգը ուղղակի ավիրեց. շուրթերիս եզրագիծը լրիվ խախտվել է, բացի այդ կարմիր հետքեր են մնացել»: Ամեն դեպքում, լավ մտածեք մազերը հեռացնելու որոշում կայացնելուց առաջ: Կանանց շրջանում լազերային էպիլյացիան առաջացրել է մտավախություն, որ այն վտանգավոր է առողջության համար, ու որ շատ հնարավոր է՝ հանգեցնի հայտնաբերված հիվանդությունների խորացման: Այս հարցով իր պարզաբանումը տվեց բժշկուհի Լիլին՝ նշելով, որ հաճախորդը նախքան էպիլյացիան թերթիկ է լրացնում, թե ինչ հիվանդություն ունի, և ըստ այդմ որոշվում է՝ կարելի է կատարել, թե ոչ. «Ճիշտ չէ, որ լազերային ճառագայթը վնասում է: Սարքավորումներն այնպիսին են, որ ճառագայթը ազդում է միայն մազի վրա, և ոչ մի հյուսվածք կամ բջիջ չի վնասվում»:

Կոսմետոլոգների հավաստիացմամբ, հայուհիների մեծ մասը դիմում է հենց լազերային էպիլյացիայի, քանի որ մազը մուգ է և հաստ, ու մազահեռացման մյուս միջոցները շատ դեպքերում անարդյունավետ են:

Եղեք գեղեցիկ ու առողջ: Մի զիջեք խնամված լինելու՝ ձեր իրավունքը:

Հասմիկ Մելիքսեթյան