ՊՆ նախարարը ոգեկոչում է Վարուժան Ավետիսյանի գաղափարը

Politik.am-ը գրում է․

ԱԺ-ում Կառավարության հետ հարցուպատասխանի ժամանակ ԱԺ «Հանրապետական» խմբակցության պատգամավոր Լևոն Մարտիրոսյանը հարց ուղղեց նորանշանակ պաշտպանության նախարար Վիգեն Սարգսյանին՝ շեշտելով, թե ոլորտը նոր չէ, բայց նոր պաշտոն է նրա համար:
Նորանշանակ պաշտպանության նախարար Վիգեն Սարգսյանը խոստովանեց, որ հիշարժան օր է այսօր իր համար, քանի որ երկար տարիներ լինելով կառավարման ոլորտում՝ առաջին անգամ է մասնակցում ԱԺ հարց ու պատասխանին:
Նախարարը նշեց, որ Կառավարության ծրագրում ավելի ամբողջական կներկայացվի պաշտպանության ոլորտի տեսլականն ու ծրագրերը և տեղեկացրեց, որ այսօր առիթ են ունեցել կառավարութան կազմով ներկայացնել 25-րդ տարում ազգային բանակի գոյության առաջնահերթությունները, որոնք հիմնված են ԶՈւ և բանակի նկատմամբ գերագույն գլխավոր հրամանատարի և վարչապետի տեսլականի վրա:
«Գիտեք, որ հունվարի 28-ին բանակի 25-րդ տարին է, և մեր խնդիրն է՝ անցում կատարել բանակաշինությունից դեպի ազգ-բանակի կառուցում, որովհետև հաշվի առնելով այն իրավիճակը, որտեղ գտնվում է մեր պետությունը, տարածաշրջանը, քաղաքական մարտահրավերները՝ ակնհայտ է, որ չափով մեծ բանակը շարունակելու է մնալ իրականության մի մաս»,-ասաց նա:
Հետաքրքիր է, որ ազգ-բանակ գաղափարի մասին ամիսներ առաջ հրապարակային ելույթով էր հանդես եկել «Սասնա Ծռեր» խմբի անդամ Վարուժան Ավետիսյանը: