ՊՈՌՆԿՈՒԹՅՈՒՆԻՑ ՄԻՆՉԵՒ ԳԵՐԵԶՄԱՆԱՊՂԾՈՒԹՅՈՒՆ. 2018Թ-Ի ԱՂՄԿՈՏ ԴԱՏԱՎԱՐՈՒԹՅՈՒՆՆԵՐԸ ՇԻՐԱԿՈՒՄ

Հրապարակ |

2018թ-ի ընթացքում սպասվում է, որ կավարտվեն մի շարք հասարակական հնչեղություն ստացած դատավարություններ: Շիրակի մարզի ընդհանուր իրավասության դատարանում դեռ նախորդ տարվանից ընթանում են աղմկոտ դատական նիստեր, որոնց ավարտն հենց այս տարի է կանխատեսվում: Եւ հասարակական, եւ քաղաքական հնչեղություն է ձեռք բերել 2017 թ-ի ապրիլի 22-ին Գյումրիի Բուլվարային թաղամասի Արգո խանութի մոտ տեղի ունեցած ռուս զինծառայողի սպանությունը: Հայ երիտասարդի կողմից սպանվեց ռուսական 102-րդ ռազմաբազայի զինծառայող 1996թ․ ծնված Դմիտրի Սերգեյի Յալպաևը:

Նրա դին հայտնաբերեցին գետնին ընկած՝ պարանոցի շրջանում սուր կտրող, ծակող գործիքից ստացած վնասվածքով։ Դատական տեղեկատվական համակարգից ծանոթանում ենք, որ այս գործի նախաքննությունն ավարտված է եւ մտել է դատարան:21-ամյա Արման Ջանջուղազյանին մեղադրանք է առաջադրվել հանրորեն վտանգավոր այն բանի համար, որ նա «Իսլամական պետություն» ահաբեկչական խմբավորման համակիր ներկայացած, քննությամբ դեռևս չպարզված անձանց օժանդակությամբ 2017թ. ապրիլի 22-ին, ժ.17:30-ի սահմաններում, կրոնական մոլեռանդության շարժառիթով ապօրինաբար կյանքից զրկելու դիտավորությամբ, մի քանի անգամ հարվածել է Ռուսատանի Դաշնության թիվ 102 ռազմաբազայի զինծառայող Դմիտրի Յալպաևին՝ սպանելով վերջինիս: Թեև դատական նիստի առաջին օրը դեռևս հայտնի չէ, հայտնի է, որ այն ընթանալու է Շիրակի մարզի ընդհանուր իրավասության դատարանում:

Ուշագրավ է, որ նախնական քննությամբ պարզվել էր, որ Արման Ջանջուղազյանն ունի հոգեկան առողջության հետ կապված որոշ խնդիրներ։Գյումրեցիներն ընդհանրություն են տեսնում այս դեպքի եւ Ավետիսյանների սպանության միջև: Երկու դեպքում էլ մեղադրյալները հոգեկան խնդիրներ ունեն, կրոնական շեղվածություն եւ զոհերը պատահական մարդիկ էին: Իրավաբանները վստահեցնում են, որ այս գործը թեպետ տեսակով առանձնանում է եւ սպանվածը ռուսազգի ներկայացուցիչ էր, այնուամենայնիվ պերմյակովյան հնչեղություն չի ստանա: Հայ -ռուսական հարաբերությունները նույնպես չեն տուժի,քանի որ այդ հարաբերությունները ցնցումների չենթարկվեցին անգամ Ավետիսյանների սպանության օրոք:

Շիրակի մարզի ընդհանուր իրավասության դատարանում շուտով կքննվի մի դեպք, որը պակաս աղմկոտ չէր: 2017թ. օգոստոսի 23-ին Գյումրու բնակչուհին ոստիկանությանը հայտնել էր, որ անարգել են հոր գերեզմանը՝ վրան այլ գերեզման է կառուցված:Գործով ձերբակալվեց քաղաքապետարանի ենթակայության տակ գտնվող «Հավերժ հիշատակ» ՓԲԸ տնօրենը՝ Կոստիկ Ավետիսյանը:Սակայն կարճ ժամանակից նա ազատ արձակվեց, փոխարենը կալանավորվեց գյումրեցի Մկրտիչ Մելքոնյանը:Մելքոնյանի որդին, փաստաթղթերը ձեռքին, շարունակում է պայքարել հանուն արդարության՝ պնդելով, որ հորը քավության նոխազ են դարձրել: Ի դեպ, գերեզմանատան վարիչը, որը նույնպես կասկածյալ էր, մահացել է: Մկրտիչ Մելքոնյանի շահերի պաշտպան փաստաբան Հայկ Հարությունյանը, մեզ հետ զրույցում պատմեց, որ իր պաշտպանյալին կալանավորել են «Հավերժ հիշատակ» ՓԲԸ տնօրենի ցուցմունքի հիման վրա: Գումարը տնօրենն է վերցրել, իսկ տաքսու վարորդ Մկրտիչ Մելքոնյանի առնչությունն այդ գործին պատահական է եղել: Պարզվում է՝ նրա հարազատների գերեզմանը գտնվում է վաճառված գերեզմանի կողքին: Մկրտիչ Մելքոնյանը, տեսնելով, որ կողքի գերեզմանը տեր չունի, աղբի մեջ թաղված է, դիմել «Հավերժ հիշատակի» տնօրենին, որպեսզի տեր կանգնեն:

Նա էլ վաճառել է գերեզմանը, իսկ իր ցուցմունքներում նշել, որ գերեզմանի տեր է ներկայացել Մ. Մելքոնյանը, հետևաբար գումարը հենց նրան էլ տվել են: Ուշագրավ է, որ ցուցմունքի համաձայն, գումարը հանձնել են Գյումրի բ/կ-ում բուժվող Մ. Մելքոնյանին, մինչդեռ փաստաբանը ներկայացնում է իր ձեռքի տակ եղած թղթերը, որով ապացուցում է, որ իր պաշտպանյալն այդ օրերին վիրահատվել եւ բուժում է ստացել Գյումրու Ավստրալիական հիվանդանոցում: Գերեզմանապղծության գործի շրջանակն ընդլայնվել է: Գործին ներքաշվել է Շիրակի մարզի նախկին դատախազ Կարեն Շահբազյանը: Նախկին դատախազը հանդես է եկել որպես տուժող: Բանն այն է, որ գերեզմանը վաճառել են հենց նրան: Նախկին դատախազն իր մորը հուղարկավորել է հենց այդ գերեզմանոցում, որտեղ արդեն հանգուցյալ է հուղարկավորված եղել: Կարեն Շահբազյանը վստահեցնում է, որ այդ գործարքով զբաղվել են իր հարազատները եւ անգամ պատկերացում չի ունեցել, որ կարող են իր կամ որևէ մեկի հետ այդպես վարվել եւ ուրիշի գերեզմանը վաճառել որպես ազատ տարածք: Այս դեպքը Գյումրիում հատուկ է քննարկվում, քանի որ ըստ ասեկոսեների, գերեզմանափորները գիշերով հանել են մահացածի դին, գցել են ջուրը եւ տարածքը վաճառել են նախկին դատախազին:

2018թ-ին կավարտվի նաև Շիրակի մարզի ընդհանուր իրավասության դատարանում ընթացող 25-ամյա Արտյոմ Ադանալյանի սպանության գործը: Մենք բազմիցս անդրադարձել ենք այս գործին: Սպանված երիտասարդի մայրը երեք տարի է՝ պայքարում է արդարության հասնելու համար: Այս գործի շրջանակներում դատական նիստեր են ընթանում նաև Երևանում: Արտյոմի մայրը՝ Ռուզան Ադանալյանը, որդու սպանության մեջ մեղադրում է նախկին ոստիկաններին, իսկ գործը կոծկելու մեջ՝ մարզի ներկա եւ նախկին դատախազներին, ինչպես նաև ՀՀ գլխավոր դատախազին: Հայց է ներկայացրել նրանց բոլորի դեմ, բայց կնոջ խոսքերով՝ դեռևս մեկը մյուսին հաջորդում են անիմաստ դատական նիստեր:

Հիշեցնենք, որ Արտյոմ Ադանալյանի սպանությունը տեղի էր ունեցել 2014թ. աշնանը, Գյումրի քաղաքի տնակներից մեկում, հավաքույթի ժամանակ, որին ներկա է եղել հայրը՝ Ավետիք Ադանալյանը: Ռուզան Ադանալյանը նախկին ամուսնուն նույնպես մեղադրում է որդու սպանության մեջ: Տարօրինակ է, որ հայրը ոչ միայն չի կանխել վերահաս աղետը, այլև որդուն՝ Արտյոմ Ադանալյանին ժամանակին բժշկական օգնություն չի ցուցաբերել: Այս դեպքի պատճառով անգամ կարգապահական տույժի է ենթարկվել դատաբժիշկը, քանի որ առկա բացթողումները շատ են: Մինչ օրս պարզված չէ սպանության մոտիվը, հայտնաբերված չէ սպանության գործիքը, դատաբժիշկը վրիպել է, դատաբժշկական եզրակացությամբ չի տրվել պատասխան, թե հարվածները միևնույն գործիքով են հասցվել: Եզրակացությանը կից չկան դիակի լուսանկարները: Ինչպես նաև սպանված երիտասարդի մայրը պնդում է, որ տեղի է ունեցել խմբակային հանցագործություն, իսկ ամբաստանյալի աթոռին մեկն է:

Իսկ ահա օրերս Շիրակի մարզի ընդհանուր իրավասության դատարանը քննության առավ Շիրակի մարզի Մայիսյան գյուղի հյուրանոցներից մեկի աշխատակցուհու նկատմամբ հարուցված գործը: Ըստ մեղադրանքի՝ հյուրանոցի ադմինիստրատոր՝ Լ.Մ.-ն մարմնավաճառների հետ գործարք է կնքել՝ նրանց պարբերաբար հրավիրել է հյուրանոց՝ հաճախորդներին սեռական ծառայություններ մատուցելու համար, եւ 5000-դրամանոց ծառայության դիմաց 2000դրամ միջնորդավճար է գանձել: Ի դեպ, ամբաստանյալը շուրջ 10 տարի է՝ աշխատում է «Սամո» ՍՊԸ-ին պատկանող այդ հյուրանոցում: Նոր բացահայտումներ կլինեն առաջիկա դատական նիստերին, մասնավորապես, թե ովքեր են տուժել նրա գործողություններից եւ որքան ժամանակ է կավատությամբ զբաղվել: Մայիսյանի բնակիչների համար լսածը շոկային էր՝ պոռնկություն իրենց քթի տա՞կ:

Այս թեմայով Ոստիկանները թարմ հետքերով բացահայտել են հանցագործությունը․ Տեսանյութ Հերթական զավեշտը հայկական ֆուտբոլում․ «սուձյային» համոզեցին չեղարկել որոշումը ՈՒՇԱԴՐՈՒԹՅՈՒՆ. լուսանկարներում պատկերված երիտասարդին ճանաչողներին խնդրվում է հայտնել Քննչական կոմիտե Բռնաբարվածը ոչ թե աղջիկներն էին, այլ հենց ինքը՝ մեղադրյալը․․․