10 օր Մխիթարյանի և Մոուրինյոյի համար

1in.am

Անգլիայի Պրեմիեր լիգայի 22-րդ տուրում «Մանչեսթեր Յունայթեդը» վերջապես հաղթեց՝ հյուրընկալվելիս առավելության հասնելով «Էվերթոնի» նկատմամբ: Ժոզե Մոուրինյոյի թիմը հաջողության հասավ առանց հարձակման գծի առաջատար Ռոմելու Լուկակուի, որը առողջական խնդիրներ ուներ: Առանց ընդգծված հարձակվողի «Յունայթեդում» դրսևորվելու հնարավորություն ստացան Մարսիալը, ինչպես նաև Լինգարդը, որոնք էլ դարձան հանդիպման հերոսները: Մոուրինյոն ստիպված եղավ փոխել տակտիկան և կամա թե ակամա ստացավ բոլորովին նոր որակ:

«Մեզ համար շատ կարևոր ու սկզբունքային այս խաղում հպարտությունը, ջանասիրությունը ուղղակի թոփ մակարդակի վրա էին: Մենք շատ լավ էինք խաղում և վերահսկում էինք հանդիպման ընթացքը: Մեր խաղը նման չէր հոգնած տղաների խաղի, որոնք մեծ դժվարությամբ են տեղաշարժում՝ քարշ տալով գնդակը: Ժամանակ առ ժամանակ «Էվերթոնին» հաջողվում էր սուր գրոհներ կազմակերպել, սակայն ընդունենք, որ մենք էինք վերահսկում իրավիճակը: Լինգա՞րդը: Ոչ բոլոր ֆուտբոլիստներն են ունակ արագ պոկվել, իսկ նա կարող է: Նա ավելի կայուն է դարձել, հիմա նա հարմարվում է տարբեր խաղային իրավիճակների, ավելի լավ է հասկանում խաղը: Նա ճիշտ ուղղությամբ է շարժվում»,- խաղից հետո ասել է Մոուրինյոն:

Իսկապես, Լինգարդը ընթացիկ մրցաշրջանում ցուցադրում է բոլորովին այլ մակարդակի խաղ: Որոշ փորձագետների կարծիքով՝ հենց Լինգարդի տպավորիչ խաղի հետևանքով է ստվերում հայտնվել Հենրիխ Մխիթարյանը, որը «Էվերթոնի» հետ խաղում խաղաժամանակ չստացավ: Այսօր «Յունայթեդում» ստեղծվել է խառնաշփոթ մի իրավիճակ, որը Հայաստանի ազգային հավաքականի ավագի համար դժվարացնում է պայքարը: Վերջին հանդիպումներում համոզվեցինք, որ Մոուրինյոն Մխիթարյանին խաղադաշտ է դուրս բերում այն ժամանակ, երբ զգում է նրա կարիքը: Ոմանք այն կարծիքին են, որ «Էվերթոնի» դեմ առանց Լուկակուի Մխիթարյանի համար լավ հնարավորություն կլիներ ազատ գործելու, արագությունն օգտագործելու: Եթե Մխիթարյանը լիներ մեկնարկային կազմում հնարավոր է՝ խաղը բոլորովին այլ ընթացք ստանար, բայց… Հենրիխ Մխիթարյանի ապագան «Մանչեսթերում» շարունակում է անորոշ մնալ՝ գրում է The Sport Review-ը՝ հավելելով, որ հայ ֆուտբոլիստը կորցրել էր իր տեղը հիմնական կազմում Անգլիայի գործող չեմպիոն «Չելսիի» հետ խաղում ցուցադրած անփույթ խաղից հետո:

Մխիթարյանի հետ կապված խնդրի է անդրադարձել Լոնդոնի «Արսենալի» նախկին պաշտպան Մարտին Քիոունը: «Հայ կիսապաշտպանը դաշտ վերադարձավ միայն 2 ամիս անց՝ «Բարնլիի» հետ խաղում: Ֆուտբոլիստը 65 րոպե է անցկացրել «Սաութհեմփթոնի» հետ գոլազուրկ ոչ-ոքիի ժամանակ: 28-ամյա կիսապաշտպանին արդեն իսկ կապում են Դորտմունդի «Բորուսիայի» և Միլանի «Ինտերի» հետ: Մխիթարյանին ուղղակի չի գոհացնում կյանքը «Մանչեսթերում»: Մխիթարյանին դուր չի գալիս այն նոր միջավայրը, որ ստեղծել է մարզիչը: Դուրս թողնել նրան թիմից, իսկ հետո վերադարձնել կազմ: Մխիթարյանը չի կարողանում հաղթահարել այդ իրավիճակը և այլևս այն ֆուտբոլիստը չէ, ինչ նախկինում»,- ասել է Քիոունը:

Երկու օր անց Անգլիայի գավաթի խաղարկության շրջանակներում «Յունայթեդը» կհյուրընկալի «Դերբիին», որից հետո կտրվի կարճ դադար: Մասնավորապես «Դերբիի» հետ հանդիպումից հետո «Յունայթեդը» հաջորդ հանդիպումը կանցկացնի հունվարի 15-ին՝ Պրեմիեր լիգայի 23-րդ տուրի շրջանակներում հյուրընկալելով «Սթոք Սիթիին»:

Որոշ ֆուտբոլիստների Մոուրինյոն արդեն իսկ հանգստանալու հնարավորություն է տվել, և հիմնական կազմի մի քանի խաղացողներ չեն մասնակցի առաջիկա հանդիպմանը: Այս պահին դժվար է ասել՝ Մոուրինյոն «Դերբիի» հետ խաղում հնարավորություն կտա՞ Մխիթարյանին, թե՞ ոչ: 10 օրվա դադարը, կարծում ենք, բավարար է մեր ֆուտբոլիստի համար վերջնականապես կողմնորոշվելու: Մխիթարյանը կարող է տեղափոխվել այլ թիմ՝ բացելով կարիերայի մի նոր էջ: Մեր ֆուտբոլիստը, սակայն, կարող է մնալ «Յունայթեդում» և դժվարին պայքար մղել հիմնական կազմ վերադառնալու:

10 օրը, կարծում ենք, բավարար է նաև Մոուրինյոյի համար տրանսֆերային թոհուբոհին ընդառաջ կողմնորոշվելու Մխիթարյանի հարցում: Միջազգային մամուլում շարունակ տեղեկություններ են հայտնվում Հայաստանի հավաքականի ավագի՝ այլ թիմ տեղափոխվելու հավանականության վերաբերյալ: Այսօր էլ խոսվում է, որ «Ինտերը» մտադիր է վարձակալել Մխիթարյանին, և գործարքը շուտով կկայանա:

Այս թեմայով Նորություններ Մխիթարյանի առողջական վիճակից Ռոնալդուն առաջին անգամ կարող է պահեստայինների նստարանին մնալ «Ժամանակն է, որ միջազգային հանրությունը ճանաչի մարդկության դեմ այս հանցագործությունը». Հենրիխ Մխիթարյան Մխիթարյանը հայտարարություն է տարածել Բերեզովսկին վերադառնում է. հայտնի է, թե ովքեր կօգնեն Մինասյանին