«Հանգստացեք, դա ընդամենը շպար էր»․ պարսկուհին հրապարակել է իր իրական լուսանկարներն ու առաջին անգամ խոսել

Հավանաբար լսել եք Սահար Թաբարի՝ իրանցի այս աղջկա մասին, ով 50 վիրահատություն էր տարել, որպեսզի նմանվեր իր իդեալին՝ Անջելինա Ջոլիին: Ինստագրամում նա 450,000-ից ավելի հետևորդներ ունի, և վերջապես որոշել է պատասխանել իրեն քննադատողներին ու ոչ միայն։

Նա սկզբից կոչ է արել բոլորին հանգստանալ, քանի որ ինքն իրեն դուր է գալիս և արտաքինի հետ ոչ մի խնդիր չունի։ Բացի այդ՝ աղջկա պնդմամբ համացանցում լայն տարածում գտած նրա լուսանկարներում նա հատուկ դիմահարդարմամբ է, այսինքն՝ նա այդպիսի տեսք ստացել է դիմահարդարման, ոչ թե վիրահատությունների շնորհիվ։

«Ողջույն քիչ, թե շատ սիրելի հետևորդներ։ Չնայած ինձ այնքան էլ դուր չէին գալիս իմ այն լուսանկարները, որոնք ձեր քննարկման թեման էին դարձել, այնուամենայնիվ ես պահել եմ դրանք, չեմ հեռացրել։ Պետք է ասեմ, որ ամենևին էլ 50 վիրահատություն չեմ տարել, սակայն միջազգային մամուլը միանգամից տարածեց այդ լուրերը։ Ինձ մի պահ թվում էր, որ մարդիկ ապրում էր 18-րդ դարում և երբեք չեն լսել ժամանակակից տեխնոլոգիաների ու դիմահարդարման մասին»,-ասել է 19-ամյա աղջիկը։

Փաստորեն, Սահարը հերքում է այն, որ մի քանի տասնյակ վիրահատություններ է տարել, իսկ իր լուսանկարներում հատուկ շպարով է։ Բայց ամեն դեպքում մարդկանց մի մասը կարծում է, որ նա ստում է ու ընդամենը փորձում է պաշտպանվել հասարակական պարսավանքի ենթարկվելուց։

Վերջում աղջիկն ավելացրել է․ «Ձեր քննադատությունները շատ վառ կերպով արտահայտում են ձեր մեջ եղած նախանձն ու խանդը»։

Այս ամենի հետ մեկտեղ Սահար Թաբարին հրապարակել է նաև իր առանց շպարի լուսանկարներից մի քանիսը, որոնցում նա ոչ արտասովոր տեսք ունի։