«Քաղաքում»-ի «Կարբիդը» բանտից ազատ արձակվելուց հետո առաջին անգամ վերադառնում է սերիալ

Դերասան Մովսես Նիկողոսյանը, ով լսարանին առավել հայտնի էր որպես «Քաղաքում» հեռուստասերիալի Կարբիտ, տևական ժամանակ էկրաններին չէր, քանի որ ազատության մեջ չէր։ Կալանավայրից ազատ արձակվելուց հետո առաջին անգամ կվերադառնա հեռուստաէկրան։ Մովսեսը նկարահանվել է ATV հեռուստաընկերության նոր «Կարմիր բլուր» հեռուստասերիալի առաջին տեսարաններում։ Tert.am Life–ի հետ զրույցում նա պատմել է ոչ միայն նոր աշխատանքի, այլև կալանավայրից դուրս գալուց հետո ադապտացման փուլի, ընկերական շրջապատի փոփոխության, մարդկանց վերաբերմունքի և ոչ միայն այդ ամենի մասին։

Հեռուստանովելում Մովսեսը մարմնավորում է դերասան Սամվել Սարգսյանի երիտասարդությունը։ Նա եթերում կլինի առաջին սերիաներում, հետագայում կերպարը կզարգացնի Սամվել Սարգսյանը։ «Այս դեպքում խնդիր կա նմանեցնելու միմիկաները, ժեստերը։ Փորձել եմ նմանություններ գտնել, թե ինչքանով է ստացվել, հանդիսատեսը կդատի»,– ասաց նա։

Դերասանը նշեց, որ այս դերը մարմնավորելն իրեն հարմար էր այնքանով, որ այժմ չէր կարող մեծ զբաղվածություն ունենալ ֆիլմում։ Երկարատև դադարից հետո Մովսեսն առաջին անգամ է վերադառնում նկարահանման հրապարակ։

«Ես հիմա ավելի ոգևորված եմ աշխատում, քան առաջ։ Կարծում եմ` դերասանի համար շատ կարևոր է կյանքի տեսողականությունը, իմ կյանքի տեսողականությունն ավելի է մեծացել, ինչը նպաստում է իմ խաղին։ Կալանավայրում չէի  կարող զբաղվել արվեստով, դա ոչ նպատակահարմար կլիներ, ոչ էլ արդյունավետ։ Ամեն դեպքում դա չխոչընդոտեց, որպեսզի հետագայում վերադառնամ իմ աշխատանքին»,– նշեց դերասանը։

Կալանավայրից դուրս գալուց հետո Մովսեսը միանգամից չի վերադարձել հեռուստաէկրան, քանի որ որոշակի ադապտացման փուլ պետք է անցներ։ Ասում է` պատրաստ չէր։ «Ես 8 ամիս առաջ եմ ազատ արձակվել, սակայն սկզբում, իրոք, պատրաստ չէի։ Փոփոխությունը շատ մեծ է այնտեղի ու արտաքին աշխարհի միջև, եթե դրան գումարվեր արվեստը, մի քիչ աբսուրդ կլիներ։ Ես փորձեցի կարգավորել հոգեվիճակս, հետո միայն նկարահանվել»,– պատմեց Մովսեսը։

Դերասանը նկատեց, որ կալանավայրից դուրս գալուց հետո մարդկանց վերաբերմունքը միանշանակ չէ. «Շատ մարդկանց վերաբերմունքը փոխվում է, մտածում են, եթե դատվել ես, ուրեմն այլ մարդ ես դարձել, սակայն ես ինչպիսին կայի, այդպիսին էլ մնացել եմ։ Բոլորի հետ ինչպես եղել եմ, այդպես էլ պիտի շարունակեմ»։

Այնուամենայնիվ, դերասանի ընկերական շրջապատում փոփոխություններ են եղել, ասում է` շատերից այլ սպասելիքներ ուներ։ «Ես հեռացա շատերից, որովհետև այն սպասումները, որ ունեի, չարդարացան, այլ տեսակով ճանաչեցի այդ մարդկանց։ Ես որոշեցի, որ պետք չէ իրենք լինեն իմ կողքին, թեև ես էլի պատրաստ եմ լինել իրենց կողքին, իմ մեջ ոչինչ չի փոխվել, ինչպես առաջ եմ եղել, այնպես էլ հիմա»,– նշեց նա։ Մեր հարցին` հիմա իր ընկերական շրջապատում մնացե՞լ են մարդիկ հայտնի գործընկերների շրջանակից, Մովսեսը պատասխանեց, որ հայտնի ընկերների անուններ նշել չի ուզում, սակայն շատերը մնացել են իր շրջապատում։

Կալանավայրում Մովսեսը գիրք է գրել, որը հանդիսատեսին կներկայացնի ֆիլմի տեսքով։ «Մինչև ֆիլմի աշխատանքները սկսելը պետք է դուրս գամ Հայաստանից, որի իրավունքը դեռ չունեմ։ Հիմա պայմանական ազատության մեջ եմ, հունվարի 22–ին կլրանա ժամկետը։ Դրանից հետո կսկսեմ զբաղվել իմ ֆիլմի աշխաանքներով։ Եթե ասեմ, որ կհամաձայնեի երկարատև դերով ներկայանալ, կստեմ, որովհետև ծավալուն դերը մեծ աշխատանք է պահանջում, իսկ ես ուզում եմ իմ  ժամանակը տրամադրել իմ ֆիլմին»,– նշեց նա։

Դերասանից հետաքրքրվեցինք` արդյոք այլ զբաղմունք ունի` հաշվի առնելով, որ ֆիլմի նկարահանումները մեծ ներդրումներ են պահանջում։ «Արտերկրում կհովանավորեն այդ ֆիլմը։ Դերասանական լավ կազմով, ռեժիսորական  լավ աշխատանքով ֆիլմ է լինելու, սակայն իմ նպատակը մի քիչ այլ է, ինքնակենսագրական ֆիլմ է, որը հիմնված է իրական փաստերի վրա»,– եզրափակեց Մովսեսը։