«Ասաց՝ պարոն Բագրատյան ջան, ախր Նապոլեոնի չքվեարկելն ի՞նչ կապ ուներ». «Ծառուկյան» դաշինքի պատգամավորը մանրամասնում է երեկվա միջադեպը

«Լրագրի» զրուցակիցն է ԱԺ «Ծառուկյան» խմբակցության պատգամավոր Սերգեյ Բագրատյանը.

Պարոն Բագրատյան, ի վերջո ի՞նչ էր տեղի ունեցել Ձեր և «Ծառուկյան» խմբակցության պատգամավորների միջև։ Պատճառը Նապոլեոն Ազիզյանի քվերակությո՞ւնն էր։

Դա կապված էր քվեարկության հետ։ Նախորդ օրը մենք քվեարկեցինք, Գևորգ Պետրոսյանը ներկայացրեց, որ օրենքն ընդհանուր առմամբ նորմալ է, բայց փաստաբանների հետ կապված վերապահում կա, և ասաց, որ մինչև հաջորդ օրը նիստը սկսելը կասի՝ եթե արտառոց բան չլինի, կողմ կքվեարկենք։ Բայց ասաց, որ փաստաբանների հետ կհանդիպի, քննարկի, նոր կհայտնի իր կարծիքը։ Մեզ մոտ իրավական ոլորտի պատասխանատուն Գևորգ Պետրոսյանն է, որ հանձնաժողովի նիստերի որոշումները ներկայացնի խմբակցությանը։ Հաջորդ օրն առավոտյան, երբ Էդմոն Մարուքյանը ներկայացրեց փաստաբանների հետ կապված խնդիրը, Գևորգ Պետրոսյանն էլ իր հերթին ասաց, որ քանի որ այդ խնդիրը կա, առաջարկում եմ չքվեարկել, բոյկոտել քվեարկությունը։ Ու այդպես չքվեարկեցինք, հետո տեսանք, որ Նապոլեոն Ազիզյանի մոտ մի հատ կողմ կար, որն էլ պատճառ հանդիսացավ, որ օրինագիծն ընդունվի։ Ես մոտեցա Ազիզյանին, հարցրեց՝ ինչ անեմ, ես էլ ասացի՝ իջիր Թաթուլ Սողոմոնյանի մոտ և ասա, որ սխալվել ես, թյուրիմացություն է եղել։ Գնաց Սողոմոնյանին ասաց, որ պատահականություն է, ինքը չի քվեարկել։ Ես համարեցի, որ խնդիրը լուծվեց։ Դրանից հետո պնդեցին, որ պետք է քվեարկությունից հետո 40 վայրկյանի ընթացքում արվեր ինչ որ արվելու էր։ Հետո մենք իջանք խմբակցություն, որտեղ բարձրաձայն շատ լուրջ վեճ եղավ, որի իմաստն այն էր, թե դեմ քվեարկե՞լն էր ճիշտ, թե՞ չքվեարկելը։ Կոնկրետ այդ օրենքն ընդունելու համար պահանջվում էր ԱԺ պատգամավորների թվի 3/5-ը, այսինքն 63 կողմ։ Ես ասում էի, որ եթե մենք դեմ քվեարկեինք, նրանք 63 կողմ ձայն չէին ունենա, իսկ Միքայել Մելքումյանն էլ ասում էր, որ եթե դեմ քվեարկենք, օրենքը կանցներ։ Ամեն մեկս մեր կարծիքն ենք հայտնել, բարձրաձայն և լարված քննարկում էր։ Հետո խմբակցության դուռը բացեցի, դուրս եկա, տեսա, որ մի քանի լրագրողներ կան։ Էլ չցանկացա լրագրողների կողմը գնալ, որ հարցեր չտան։

Այսինքն՝ Ձեր և Արթուր Մանուկյանի միջև վեճ չի՞ եղել այս հարցի շուրջ։

Ոչ թե վեճ չի եղել... երբ ես Դավիթ Մանուկյանի սենյակը գնացի, Դավիթն էլ, Արթուրն էլ այնտեղ էին։ Դուռը բացեցի, տղերքին տեսա, հետո դուրս էի գալիս, Արթուրը թևանցուկ արեց, ասաց՝ պարոն Բագրատյան ջան, ախր Նապոլեոնի չքվեարկելն ի՞նչ կապ ուներ էս ամեն ինչի հետ։ Սովորական խոսակցություն է եղել։ Լրագրողները մեր դեմ դուրս եկան, հարցրին՝ էդ ինչ հայհոյանքներ են։ Ես էլ ասացի, որ հայհոյանք չի եղել, բարձր խոսակցություն է եղել։ Դրանից հետո ես ասացի՝ դահլիճ բարձրանանք, որ չստացվի, որ եթե «Ելք»-ը որոշել է դուրս գալ դահլիճից, մենք բոլորս այդ նույն ռեժիմի մեջ ենք, իրար բերան թքած ենք։ Էդպես բարձրացանք դահլիճ, մի քիչ նստեցինք, դուրս եկանք, էլի լրագրողները չորս կողմից շրջապատեցին, թե բա ոնց ա եղել, ինչ է եղել, բայց արդեն ոչ թե դրա հետ կապված էին հարցնում, այլ քվեարկության հետ կապված։ Դե տհաճ վիճակ էր, վերջիվերջո քո գործընկերն է, ոչ կարողանում ես պաշտպանել, ոչ էլ կարողանում ես ուրիշ բան ասել։

մանրամասն՝ կայքում

Այս թեմայով Աշխարհաքաղաքական տարբեր կենտրոններ ինձ առաջարկել են վարչապետ լինել. Գագիկ Ծառուկյան «Ժողովրդի կամքի դեմ որեւէ քայլ չենք անելու». Զոհրաբյանը՝ Ծառուկյանի առաջադրվելու մասին ԲՀԿ-ն միացավ շարժմանը «Բարգավաճ Հայաստան» կուսակցության քաղաքական խորհրդի հայտարարությունը Գագիկ Ծառուկյանի այս նախաձեռնությունը համարում եմ հեղափոխական քայլ․ Գեղամ Հարությունյան