Լավ լուր՝ գործարարների համար

Հայաստան-Եվրամիություն համաձայնագրի ստորագրումից հետո առաջիկա երկու-երեք տարիների ընթացքում կողմերն առանձին բանակցություններ պետք է վարեն ներդրումների մասով, ինչն ուղղված է լինելու ներդրումների փոխադարձ պաշտպանությանը և խրախուսմանը: Այս մասին այսօր Ազգային ժողովում «Հայաստան-Եվրամիություն. համապարփակ և ընդլայնված գործընկերություն» թեմայով խորհրդարանական լսումների ժամանակ ասաց տնտեսական զարգացման և ներդրումների նախարարի առաջին տեղակալ Գարեգին Մելքոնյանը: Նա մանրամասնեց այն միջոցառումները, որոնք տնտեսական ոլորտում պետք է իրականացվեն ըստ ստորագրված համաձայնագրի:
2018 թվականի հունվարից հայ արտահանողների համար սկսելու է գործել գրանցման «Ռեքս» համակարգը: «Ներկայում որպեսզի մեր տնտեսավորղերը ապրանք արտահանեն ԵՄ և օգտվեն GSP+ի արտոնություններից, պետք է ունենան ծագման սերտիֆիկատ: 2018 թվականի հունվարից ՀՀ-ում գործող կազմակերպությունները ապրանք արտահանելիս դեպի ԵՄ կարող են մեկ անգամ գրանցվել այս համակարգում, գրանցված լինելով՝ արդեն իրենց ապրանքն արտահանել դեպի ԵՄ առանց ծագման փաստաթղթի, բայց միաժամանակ օգտվել տրվող արտոնություններից: Որպեսզի անցումը սահուն լինի, նախատեսվել է, որ 2018 թվականի ընթացքում զուգահեռ գործելու է նաև սերտիֆիկատներով արտահանման գործընթացը»,- ասաց Մելքոնյանը: Նրա խոսքով՝ սա էական նշանակություն կունենա այն փոքր ու միջին տնտեսվարողների համար, ովքեր ստիպված են լինում ամեն փոքր խմբաքանակի արտահանման համար ունենալ ծագման սերտիֆիկատ՝ դրա համար ծախսելով գումար ու ժամանակ:
«Այս համաձայնագիրն ունի լրջագույն ծածկույթ և տնտեսական, և առևտրային հարաբերությունների մասով: Համաձայնագիրն արտոնյալ առևտրի ռեժիմ չի նախատեսում, բայց ոլորտային և թեմատիկ ծածկույթի առումով ունի անհամեմատ ավելի մեծ և խորը ծածկույթ, քան մենք ունենք ներկայումս ԵՄ հետ գործող համաձայնագրով: Համագործակցություն է լինելու ապրանքային առևտրում, որը կանոնակարգում է երկկողմ ապրանքների առևտրին առնչվող հարաբերությունները՝ հիմնականում հիմնվելով Առևտրի համաշխարհային կազմակերպության սկզբունքների վրա»,- նշեց փոխնախարարը:
Նրա խոսքով՝ համաձայնագրով աշխատանք է տարվելու նաև մրցակցության բարձրացման ուղղությամբ: Նախատեսվում է կողմերի միջև հավասար հնարավորությունների ստեղծում, որը վերաբերում է շուկաներում հասանելիությանն ու համագործակցությանը:
Համեմատաբար նոր պայմանավորվածության ոլորտ կա, որը վերաբերում է պետական մասնակցությամբ ձեռնարկություններին: Այստեղ ևս, ըստ Գարեգին Մելքոնյանի, հիմք են ընդունվում ԱՀԿ նորմերը՝ հիմնականում նախատեսելով մրցակցային մոտեցումներ:
Ծառայությունների մասն, ըստ նրա, էական տեղ ունի բանակցված փաթեթում և նախատեսվում է որոշակի ազատականացում, քան ունենք այսօր ԱՀԿ շրջանակներոմ:
Ընդհանուր առմամբ, ըստ փոխնախարարի, 2014-2017 թվականների ընթացքում Եվրամիության կողմից Հայաստանին հատկացված ընդհանուր աջակցության ծավալը կազմել է 140-170 մլն եվրո, իսկ 2017-2020 թվականների համար նախատեսված փաթեթը քիչ ավելին է՝ նախատեսելով հիմնականում չորս ուղղություն՝ տնտեսական զարգացում և շուկաների հնարավորություններ, պետական մարմինների հզորացում և լավ կառավարում, հաղորդակցություն, արդյունավետություն, բնապահպանություն, կլիմայական փոփոխություն և շարժունակություն ու մարդկանց միջև շփումներ: Հատկացումների էական մասը հետագայում էլ նախատեսվում են ուղղել տնտեսական օրակարգի համար:
Եվրամիությունը կշարունակի նաև Հայաստանին բյուջետային աջակցություն հատկացնել: 2016 թվականին ամենաբարձր բյուջետային աջակցությունը ստացվել է Եվրամիությունից՝ 27.5 մլն եվրո:
«Այս տարի նախատեսվում է ստանալ 15-17 մլն եվրո բյուջետային աջակցություն: Կան հատկացումներ նաև 2018 թվականի համար, քննարկվում է հետագա տարիների հատկացումների հարցը»,- ասաց Մելքոնյանը: