Խոսրով Հարությունյանը խճճվել է երկու հաստ թելերի մեջ. Shame.am

Shame.am կայքը գրում է․

ՀՀԿ խմբակցության պատգամավոր, նախկին վարչապետ Խոսրով Հարությունյանը խճճվել է երկու հաստ թելերի մեջ: Մի կողմից նա ուզում է քծնել նոր վարչապետին, մյուս կողմից՝ երևի չի գիտակցում, որ դա անում է նախորդներին վատաբանելու հաշվին: Եվ քանի որ ցանկությունը մեծ է, իսկ ունակությունները՝ փոքր, իր բոլոր գործողությունների նման այս մեկն էլ անում է անարվեստ ու անտակտ:

Պարոն Խոսրովն արդեն վաղուց գիտի, որ ինչի մասին էլ խոսք գնա, դա պիտի վերագրի ՀՀԿ-ին ու Սերժ Սարգսյանին: Սա նրա համար աքսիոմա է: Ձեռքը ճար լիներ՝ կասեր, որ արևն էլ ծագում ու մայր է մտնում նրանց կամքով: Սակայն այսօր մի քիչ համեստ է գտնվել, ընդամենը արձանագրել է, որ նորանշանակ կառավարությունը մեկ նպատակ ունի՝ ապահովել ՀՀԿ-ի և հանրապետության նախագահի նախընտրական շրջանում ներկայացրած թեզերը։ Եվ որպեսզի սա հնչի հավաստի, նա չի խուսափել նկատել, որ Հովիկ Աբրահամյանը հրաժարական տվեց, քանի որ չկարողացավ վերականգնել կառավարության հանդեպ հանրային վստահությունը։

Իր նախկին կուռքին մի վայրկյանում ուրանալուց անմիջապես հետո Խոսրով Հարությունյանը հաջորդ բացահայտումն է անում, այս անգամ խիստ վտանգավոր: Նա ասում է, որ ի տարբերություն Հովիկ Աբրահամյանի՝ Կարեն Կարապետյանը կաշկանդված չէ կուսակցական կապերով: Հարությունյանի խոսքերից ստացվում է, որ մեր երկրի բոլոր դժբախտությունների պատճառը Հանրապետական կուսակցությունն է: Եթե նա չկաշկանդեր նախկին վարչապետին, ապա Աբրահամյանը չէր ձախողվի, բայց քանի որ ՀՀԿ-ն խոչընդոտել է, այդ պատճառով էլ ոչինչ չստացվեց: Իսկ ահա Կարեն Կարապետյանը երջանիկ մարդ է, նա ՀՀԿ անդամ չէ, ուրեմն շանսեր ունի հասնել հաջողության:

Հանրապետական կուսակցությունում պարոն Խոսրովի այս դատողություններին արժե, որ ուշադրություն դարձնեն: Վատ չէր լինի նկատեին նաև, որ այն օրից, ինչ Հարությունյան Խոսրովը սկսել է ջերմ հարաբերություններ պահպանել Սամվել Բալասանյանի հետ, դարձել է մի տեսակ ոչ ադեկվատ ու անվստահելի: