Որքա՞ն ժամանակ կպահանջվի Եվրամիության հետ առանց վիզա ռեժիմի համար

Վիզաների ազատականացման հարցը բարձրացնելով՝ եվրոպական կողմը Հայաստանին ուզում է ցույց տալ, թե որը կարող է լինել հաջորդ քայլը, եթե նոյեմբերի 24-ին ստորագրվի Հայաստան-ԵՄ շրջանակային համաձայնագիրը:

Այս մասին Lragir.am-ի հետ զրույցում ասաց Արևելյան գործընկերության քաղաքացիական պլատֆորմի Հայաստանի ազգային համակարգող, Երևանի մամուլի ակումբի նախագահ Բորիս Նավասարդյանը:
Հիշեցնենք, որ Եվրախորհրդարանը Եվրամիության կառավարությանն ու արտաքին քաղաքական գերատեսչությանը կոչ է արել վիզաների ազատականացման շուրջ երկխոսություն սկսել Հայաստանի հետ։
«Հայաստանի հետ բանակցությունները խորը և համապարփակ գործընկերության պայմանագրի շուրջ ավարտվել են, ինչը հաջող օրինակ է, թե ինչպես կարող են Եվրասիական միությանն անդամակցությունը եւ մասնակցությունը Եվրամիության հարևանության ծրագրերին համատեղվել: Հաշվի առնելով այդ առաջընթացը՝ եվրոպացի պատգամավորները հորդորում են Հայաստանի հետ ևս առանց վիզաների ռեժիմ սահմանել»,- նշվել է հայտարարությունում:
«Նախ, Եվրախորհրդարանը քաղաքական մարմին է և այն սովորաբար ավելի բաց է հարևանների հետ համագործակցությունը խորացնելու համար, քան Եվրոպական հանձնաժողովը, բայց ամեն դեպքում մենք այստեղ Եվրամիության քաղաքական շրջանակների կողմից տեսնում ենք այնպիսի միտում, որ գործընկեր երկրներին ցույց տան, թե ինչպիսի հեռանկարներ իրենք ունեն Եվրամիության հետ հարաբերությունների սերտացման առումով: Եվ նաև Հայաստանին ուզում են ցույց տալ, թե ինչպիսին կարող է լինել հաջոդ քայլը, եթե նոյեմբերի 24-ին ստորագրվի շրջանակային համաձայնագիրը»,- ասաց Բորիս Նավասարդյանը:
Մասնագետի խոսքով՝ այսինքն՝ Եվրամիությունը գործընկերներին ամեն կերպ ցույց է տալիս, որ հետևողական աշխատանքի արդյունքում կարող են երկկողմանի հարաբերություններում լինել նաև հետաքրքիր զարգացումներ:
Նրա խոսքով՝ վիզաների ազատականացման գործընթացում արդյունք ունենալու ժամկետները կախված են նրանից, թե որքան արագ են պայմանավորվածություններն իրականություն դառնում:
«Եթե ինտենսիվ գործըթնաց լինի, և Հայաստանը քաղաքական կամք ունենա հստակ կատերելու այն բոլոր քայլերը, որոնք անհրաժեշտ են վիզաների ազատականացման համար, մոտավորապես մեկ տարվա ընթացքում կարող է ավարտվել վիզաների ազատականացման երկխոսությունը, որի ընթացքում հստակեցվում են այն քայլերը, որոնք պետք է իրականացնի Հայաստանը: Եվ ևս մոտ մեկ տարի կպահանջվի բուն համաձայնագրի ստորագրման նախապատրաստման համար: Այսինքն՝ ամբողջ գործընթացը կարող է տևել ամենաքիչը 1.5 տարի, բայց եթե ձգձգվի, կարող է տարիներ պահանջվեն»,- ասաց Նավասարդյանը:
Նրա խոսքով՝ Հայաստանի իշխանությունները պետք է որ շահագրգռված լինեն այդ գործընթացն արագ զարգացնելու հարցում: «Սակայն մենք նաև տեսնում ենք որոշ արհեստական նախաձեռնություններ, հասարակության մեջ շրջանակներ, որոնք դրսի դրդմամբ կամ ուղղակի իրավիճակը լավ չպատկերացնելով՝ դիմադրում են որոշ քայլերի, որոնք անհրաժեշտ են լինելու վիզաների ազատականացման համար: Այսինքն՝ այստեղ շատ կարևոր կլինի հետևողական իրազեկման աշխատանքը հասարակության հետ, որպեսզի մեր համաքաղաքացիները հասկանան ինչի համար է դա պետք և որ իրոք դա հեռանկարային է երկրի զարգացման համար: Մինչ այժմ այդպիսի հետևողական աշխատանք մենք չենք տեսել: Բայց հուսանք, որ համաձայնագրի ստորագրումից հետո համապատասխան քայլերի կդիմեն և մեր իշխանությունները, և քաղաքացիական հասարակությունը»,- ասաց նա:
Բորիս նավասարդյանը նաև անդրադարձավ այն հեռանկարներին, որոնք կարող է ունենալ Հայաստանը վիզաների ազատականացման շնորհիվ: Նրա խոսքով՝ եթե որևէ գործընկերոջ հետ ուզում ես զարգացնել հարաբերություններ՝ և տնտեսական, և քաղաքական, և այլ ոլորտներում, անհրաժեշտ է ազատ տեղաշարժի հնարավորություններ ստեղծել: Առանց վիզաների ազտականացման, ըստ մասնագետի, շատ հարցեր լուծելու համար ավելի երկար ժամանակ է պահանջվելու, ավելի մեծ բարդություններով ու խոչընդոտներով:
«Այնպես որ, եթե մենք ուզում ենք, որ այդ խնդիրները լուծվեն, պետք է անպայման գնանք այդ ճանապարհով: Եվ դա բոլոր առումներով միայն արդյունավետ կդարձնի երկկողմանի հարաբերությունները Եվրամիության հետ»,- ասաց նա: