«Հետևանքները վատ են լինելու». ցուցարարները զգուշացնում են

«Երեկ ԱԺ-ում կառավարության հետ հարցուպատասխանի ժամանակ վարչապետի անդրադարձը «Առինջ մոլին» մեզ ոչ մի կերպ չի բավարարում։ Վարչապետը լղոզված, ոչ սպառիչ պատասխաններ տվեց։ Վարչապետի ոչ մի ասած մեզ չի գոհացնում, մինչև նա չդադարեցնի մեր նկատմամբ այս տեռորը»,- «Առաջին լրատվական»-ի հետ զրույցում ասաց «Համերաշխություն» ՀԿ նախագահ Արմեն Ներսիսյանը։

Նրա խոսքով՝ այսուհետ արդեն իրենք են սկսելու հետապնդել կառավարության անդամներին, ՊԵԿ նախագահին՝ ներկայացնելով նրանց ունեցվածքը։ «Մի հատ էլ մենք ուսումնասիրենք, ցույց տանք իրենց մութ անկյունները, ստվերը, ունեցվածքները։ Եթե ինքը մտածում է, որ ժողովուրդը ստվերի մեջ է, թող մի հատ էլ մենք տեսնենք, թե իրենք ինչ ստվերի մեջ են, որտեղից նրանց այդ ունեցվածքը»,- ասաց մեր զրուցակիցը։

Ներսիսյանն ասաց, որ իրենք շարունակելու են իրենց պայքարը, քանի որ վարչապետի երեկվա խոսքից հասկացել են, որ նա չի պատրաստվում զիջումների գնալ, իր խոսքի տերն է։ «Բայց ես էլ ասում եմ՝ էս աշխարհը ոչ իրենով սկսվել է, ոչ էլ իրենով կավարտվի։ Թող ինքը անմիջապես դադարեցնի էս պրոցեսը, թե չէ հետևանքները շատ վատ կլինեն։ Արդեն մենք ենք սկսելու հետապնդել ու բացահայտել, թե որտեղից նրանց այդ թանկարժեք առանձնատները, մեքենաները, ունեցվածքը։ Միայն վարչապետի թևի ժամացույցով կարելի էր երկու մանկապարտեզ սարքել»։

Արմեն Ներսիսյանը նշեց, որ հարկային մարմինները շատ տակտիկորեն արդեն սկսել են աշխատել այնպես, որ տոնավաճառի աշխատողներին ստիպեն խաղալ իրենց խաղի կանոններով։