«Միջադեպը ողբերգական էր». անվտանգության ինչ մեխանիզմներ են առաջարկում մանկապարտեզի տնօրենները

1in.am / Ավագանու վերջին նիստին Տարոն Մարգարյանը նշել է, որ մանկապարտեզների անվտանգությունը պետք է ուժեղացնել: «Ոստիկանությանը խնդրելու ենք, որ իրենք էլ իրենց հսկողությունն ուժեցացնեն և կտեսնենք, թե հետագայում այդ ուղղությամբ ինչ քայլեր ենք ձեռնարկելու»,-ասել է Տարոն Մարգարյանը՝ պատասխանելով Երևանի ավագանու «Ելք» խմբակցության անդամ Արայիկ Հարությունյանի հարցին, թե ի՞նչ լրացուցիչ միջոցներ են ձեռնարկվում մանկապարտեզների ու դպրոցների անվտանգության համար:

Դիտարկմանը, որ Երևանի քաղաքապետ Տարոն Մարգարյանն ասել է, որ պետք է ուժեղացնել մանկապարտեզների անվտանգությունը, և որպես մանկապարտեզի տնօրեն՝ ինչպիսի՞ անվտանգություն կցանկանա, որ լինի, Երևանի թիվ 4 մանկապարտեզի տնօրեն Արմինե Զոհրաբյանը պատասխանեց. «Իհարկե, երեխաների անվտանգությունը շատ կարևոր է, որովհետև ծնողները իրենց ամենաթանկ բանը՝ իրենց փոքրիկներին են բերում մանկապարտեզ։ Կոնկրետ մեր մանկապարտեզում մենք ունենք հատուկ դռնապան, որը ամբողջ օրը նստում է դռան մոտ։ Նախ, նա բոլոր ծնողներին գիտի և գիտի ում ներս թողնել, ում չթողնել։ Բացի այդ, երբ առավոտյան 8.30-ին մանկապարտեզը բացվում է, երեխաներին բերում են, դրանից հետո դուռը փակվում է մինչև ժամը 17.30-ը։ Եթե կան ծնողներ, որոնց անհրաժեշտ է ժամանակից շուտ վերցնել երեխային, նրանք կապ են հաստատում տվյալ խմբի դաստիարակի հետ։ Մենք դռան վրա ունենք դրված անվտանգության համակարգ և օտարների համար շատ դժվար է ներս մտնել»,- հավելեց Արմինե Զոհրաբյանը։

Տնօրենը անվտանգության ամրապնդման համար ավելացրեց նաև տեսախցիկների տեղադրման կարևորությունը և նշեց, որ այդ ուղղությամբ աշխատանքներ են իրականացվում.«Աշխատում եմ այդ ուղղությամբ, որ տեսախցիկներ դրվեն»,-ասաց նա։