«Էդ մարդիկ պետք է հասկանան, որ հետդարձի ճանապարհ չկա». ՊԵԿ նախագահը զգուշացնում է

Պետական եկամուտների կոմիտեի նախագահ Վարդան Հարությունյանն այսօր Ազգային ժողովում պատասխանել է լրագրողների հարցերին: Ներկայացնում ենք հարց ու պատասխանը:

Պարոն Հարությունյան, առևտրականները հարկային մարմինների դեմ բողոքի ակցիա են անում, ինչպե՞ս եք մեկնաբանում սա:

Ես պետք է ասեմ, որ օրենսդրությամբ սահմանված կարգով բոլորը պետք է հարկերը վճարեն: Դուք պետք է կանգնեք մեր կողքին, և բոլոր այն մարդկանց, ովքեր խուսափում են հարկերից, նրանց ոչ թե պետք է քաջալերեք, այլ պետք է ասեք՝ չի կարելի միտինգ անելով՝ խուսափել հարկերից: Դա բացառվում է, չի լինելու նման բան: Նաև ուզում եմ ասել, որ այդ առևտրականների հետ հանդիպում է եղել, մանրամասն բացատրվել է, թե ինչ պետք է անեն: Եթե դրանից էլ են խուսափում ու փորձում էլի մանիպուլյացիաների միջոցով խուսափել հարկերից, նման բան չի լինելու, կոշտ վարչարարություն է լինելու:

Ասում են՝ բարդ է իրենց համար փաստաթղթավորումը:

Բարդ չէ, մենք առաջարկել ենք ձրի հաշվապահություն, դրանից հրաժարվում են: Չգիտեմ՝ ինչու են հրաժարվում, հարցրեք իրենցից, չեն ուզում իրենց շրջանառությունը ցույց տալ: Ավելին, կարող եմ ասել, որ ոչ բոլոր տնտեսվարողներն են այդ վիճակում: Կան տնտեսվարողներ, ովքեր օրինական դաշտում են աշխատում: Բայց կան նաև այնպիսիք, ովքեր, թաքնվելով սոցիալապես վատ վիճակում գտնվող խավի տակ, ունենալով մեծ հնարավորություն, այդ մարդկանց ուղղորդում են նման քայլերի: Ես ուղղորդողներ եմ տեսնում:

մանրամասն՝ այստեղ