«Հոկտեմբերի 27-ից 1 շաբաթ առաջ իրենց կանանցով մեր տանն էին»

Հրապարակ / Երբ իշխանավորները՝ մի փոքր խմբով, իրենց պարտքը կատարեցին ու հեռացան, Եռաբլուր այցելեցին ընդդիմադիրները։ Մասնավորապես՝ ներկա ու նախկին խորհրդարանական ընդդիմության ներկայացուցիչները՝ շատ համեստ կազմով։ 1999 թվականի հոկտեմբերի 27-ի ոճրագործության զոհերից սպարապետ Վազգեն Սարգսյանը թաղված է հենց Եռաբլուրում։ Նրա հիշատակը հարգելու էին եկել «Ելք» դաշինքի անդամներ, ԱԺ պատգամավոր, Վազգեն Սարգսյանի եղբայր Արամ Սարգսյանը, Արտակ Զեյնալյանը, Երեւանի ավագանու «Ելք» խմբակցության անդամները։ Վազգեն Սարգսյանի մյուս եղբայրը՝ պաշտպանության նախարարի խորհրդական Արմեն Սարգսյանը, Եռաբլուր էր այցելել առավոտյան՝ պաշտպանության նախարարի եւ մյուսների հետ։

Երբ Արամ Սարգսյանն ու նրա թիմակիցները Վազգեն Սարգսյանի հուշարձանի մոտ իրենց պարտքը կատարելուց հետո պատրաստվում էին հեռանալ, ժամանեցին ՀԱԿ անդամները՝ Արամ Մանուկյանը, Ստեփան Դեմիրճյանը, Գագիկ Ջհանգիրյանը, ով այդ թվերին զինդատախազն էր ու ղեկավարում էր Հոկտեմբերի 27-ի գործով քննչական խումբը։ ՀԱԿ առաջնորդ, ՀՀ առաջին նախագահ Լեւոն Տեր-Պետրոսյանը ներկա չէր։ Կոնգրեսականներն էլ ծաղիկներ դրեցին Վազգեն Սարգսյանի շիրիմին եւ հեռացան։ ՀԱԿ անդամներից որեւէ մեկը չցանկացավ խոսել որեւէ թեմայով։ Նրանք լռության ուխտ են պահպանում։ Այսքանով ավարտվեց Հայաստանի քաղաքական դաշտի ընդդիմադիր հատվածի այցը Եռաբլուր։ Տպավորություն է, թե պարտադրված պարտք է, որ ամեն տարի այս օրը տալիս են քաղաքական դաշտի ներկայացուցիչները՝ ընդդիմադիր, թե իշխանական, որ ցույց տան, թե չեն մոռացել 18 տարի առաջ տեղի ունեցածը։ Սա գնալով ավելի ձեւական ու արարողակարգային բնույթ է կրում՝ պարտք, որը պետք է տալ, որ չասեն՝ չտվեցին։

շարունակությունը՝ կայքում