Նիհար լինելը վտանգավոր է կանանց և աղջիկների համար

Դեռահասության կամ միջին տարիքում անբավարար քաշ ունեցող կանանց մոտ աճում է վաղ դաշտանադադարի հավանականությունը։ Նման եզրակացության են հանգել Մասաչուսեթսի համալսարանի գիտնականները 25-42 տարեկան շուրջ 80 հազար կանանց հետազոտելուց հետո։ Հետազոտության արդյունքները հրապարակվել են Human Reproduction ամսագրում։

Գիտնականները պարզել են, որ եթե կանայք չափազանց նիհար են կամ եղել են այդքան նիհար դեռահասության տարիքում ու մինչեւ 30 տարեկանը, նրանց մոտ բարձրանում է վաղ դաշտանադադարի հավանականությունը։ Իսկ այն կանանց մոտ, որոնք 18-30 տարեկանում առնվազն 3 անգամ նիհարել են ավելի քան 9 կիլոգրամով, 2․4 անգամ բարձրանում է վաղ տարիքում, այսինքն՝ մինչեւ 45 տարեկանը դաշտանադադարի սկսվելու հավանականությունը։

Գիտնականները 1989-2011 թթ․ ժամանակահատվածում դիտարկել են այդ կանանց ՄԶԳ-ը, քաշի փոփոխությունը ու դաշտանադադարի սկսվելու ժամանակը։ Մասնակիցները տրամադրել են տեղեկություններ իրենց հիվանդությունների, նաեւ վնասակար եւ օգտակար սովորությունների մասին՝ յուրաքանչյուր երկու տարին մեկ լրացնելով համապատասխան հարցաթերթիկները։ Գիտնականները հայտնաբերել են, որ ցանկացած տարիքում չափից դուրս նիհար կանանց մոտ 30 տոկոսով բարձրանում է վաղ դաշտանադադարի հավանականությունը՝ պարզապես նիհար կամ նորմալ քաշով կանանց համեմատ։ Իսկ ավելորդ քաշով կանանց մոտ այդ հավանականությունը բարձրանում է 21-30 տոկոսով՝ նորմալ քաշով կանանց համեմատ։ Ավելին՝ 18 տարեկանում չափազանց նիհար լինելն այդ հավանականությունը բարձրացնում է 50 տոկոսով, իսկ 35 տարեկանում չափից նիհար լինելը՝ 59 տոկոսով։

Կանանց շուրջ 10 տոկոսի մոտ դիտարկվում է վաղ դաշտանադադար, ու դա կապակցված է սրտանոթային հիվանդությունների զարգացման, մտավոր ֆունկցիաների նվազման, օստեոպորոզի եւ վաղաժամ մահվան հավանականության բարձրացման հետ։ Այդ պատճառով էլ այս հետազոտության արդյունքները կարեւոր են կանանց ու նրանց բժիշկների համար, ասում է հետազոտության հեղինակ Քեթլին Սեգդան։ Սակայն դաշտանադադարի ժամկետի վրա անբավարար քաշի ազդեցության պատճառներն առայժմ պարզ չեն ու պահանջում են լրացուցիչ հետազոտություններ, հավելել է նա։