Ինչու է վարչապետն այցելել Վանաձոր

«Առաջին լրատվական»-ի տեղեկություններով՝ վարչապետ Կարեն Կարապետյանն այսօր մասնավոր այցով Վանաձոր է մեկնել։ Վարչապետը եղել է «Արտեկ» ճամբարում, այցելել Վանաձորի ճոպանուղու շենքի քանդված տարածք, ապա եղել է նաև Վանաձորի մարզադաշտում։ Ըստ էության այցը կրել է Վանաձորում տուրիզմի զարգացման հնարավորությունները գնահատելու նպատակ, քանի որ վարչապետը եղել է այն տեղերում, որոնք նախկինում տուրիզմի կենտրոններ, հանգստի գոտիներ են եղել։

Օրինակ՝ «Արտեկ» ճամբարը խորհրդային տարիներին եղել է հանգստի գոտի, բայց հետո այն սեփականաշնորհվել է ՀՀԿ խմբակցության ղեկավար Վահրամ Բաղդասարյանի կողմից և հիմա, ըստ էության, լքված տարածք է, և դժվար է պատկերացնել, թե ինչպես է հնարավոր դրանից տուրիզմի կենտրոն ստանալ։

Նույն վիճակն է նաև Վանաձորի ճոպանուղու դեպքում, որը ոչ վաղ անցյալում քանդվում էր Վանաձորի փոխքաղաքապետի կողմից։ Հիմա, պարզվում է, վարչապետը հետաքրքրված է այդ տարածքներում ներդրումներով և դրանք ներդրումների արդյունքում զբոսաշրջային կենտրոններ դարձնելով։

Մեզ հասած տեղեկություններով՝ այցը հանպատրաստից է եղել, որովհետև քաղաքային ու մարզային իշխանությունները իրար են խառնվել, նախապատրաստական աշխատանքներ տարել վարչապետի այցից առաջ։ Ապա մարզպետն ու քաղաքապետը ուղեկցել են վարչապետին շրջայցի ժամանակ։ Այս պահին էլ վարչապետի այցը Վանաձոր շարունակվում է։ Նա հիմա մարզպետարանում է և խորհրդակցություն է անցկացնում։

Վանաձորի ավագանու «Լուսավոր Հայաստան» խմբակցության ղեկավար Քրիստ Մարուքյանը «Առաջին լրատվական»-ի հետ զրույցում ասաց, որ չի կարող կոնկրետ գնահատական տալ վարչապետի այցին, նպատակներին, քանի որ դա մասնավոր այց է եղել, նախապես հայտարարված չի եղել, անգամ լրագրողներից է գաղտնի պահվել այցը։ «Ըստ մամուլի, վարչապետը այցելել է Վանաձորի խնդրահարույց վայրեր, որոնք վաղուց արդեն մասնավորեցված են և ավերակ վիճակում են գտնվում։ Մենք տարիներ շարունակ բարձրացնում ենք այդ խնդիրները, բայց Կառավարության կոմից միայն ներդրումներ անելու մասին խոսոտումներ ենք լսում և այն, որ իրենք ներդրողներ են փնտրում։ Հիմա չեմ կարող ասել, թե ինչ են պատրստվում անել, քանի որ, կրկնում եմ, այցը խիստ գաղտնի է պահվել»։