Ի՞նչ է նշանակում «ֆրիգիդ» կին

Հաճախ տրվող հարցեր. ի՞նչ է նշանակում ֆրիգիդություն, ֆրիգիդ կին:



Ֆրիգիդությունը նշանակում է կնոջ սեռական սառնությունը, սեռական գրգռման ֆիզիոլոգիական և հոգեբանական նշանների բացակայությունը: Այլ կերպ ասած` կինը ոչ մի հետաքրքություն չի ցուցաբերում սեքսի նկատմամբ և դրանից ոչ մի հաճույք չի ստանում: Բառի բուն իմաստով ֆրիգիդ կանայք, երբ հետաքրքրության բացակայությունը կապված չէ հիվանդության կամ թերզարգացածության հետ, շատ քիչ են: Մեծ մասամբ սխալմամբ այդպես են անվանում այն կանանց, ում մոտ սեռազգացողությունը ինչ-ինչ պատճառներով դեռ չի ձևավորվել:

Դրա պատճառները կարող են տարբեր լինել` նախկինում ապրած վախը, բռնաբարությունը, առաջին զուգընկերոջ կոպտությունն ու անփորձությունը, չափազանց խիստ դաստիարակությունը, կրոնական հայացքները և այլն: Փորձը ցույց է տալիս, որ նման խնդիրներ ունեցող բոլոր կանայք համապատասխան բուժում (գլխավորապես` հոգեբանական) ստանալուց հետո ձեռք են բերում նորմալ զգայունակություն և ընդունակություն հաճույք ստանալու սեքսից:

Ֆրիգիդությունը պետք չէ շփոթել անօրգազմիայի հետ․ վերջինիս դեպքում կինն զգում է սեռական ցանկություն, բայց բավարարում չի ստանում։