Անսպասելի զարգացում Հայաստան-Եվրամիություն համաձայնագրի շուրջ

Առաջին / Եվրոպական միությունը, իսկ հետո նաև Հայաստանի ԱԳ նախարարությունը հոկտեմբերի 13-ին հրապարակել են ԵՄ-Հայաստան շրջանակային համաձայնագրի տեքստը, որը պատրաստվում է ստորագրման և ակնկալվում է, որ դա տեղի կունենա 2017 թվականի նոյեմբերի 24-ին Բրյուսելում սպասվող Արևելյան գործընկերության գագաթնաժողովի ընթացքում: Պետք է նկատել, որ շրջանակային համաձայնագրի տեքստի հրապարակումը բավականին անսպասելի էր:

Համաձայնագիրը գաղտնի է պահվել ամբողջ բանակցային գործընթացում, և թե՛ Հայաստանի, թե՛ ԵՄ պաշտոնյաների հայտարարությունները հուշում էին, որ համաձայնագիրը լայն հանրություններին հայտնի կդառնա միայն ստորագրելուց հետո: Սակայն, չնայած այդ տրամադրություններին, հոկտեմբերի 13-ին կողմերը հրապարակեցին այն: Հետաքրքիր է այն, որ դա արեց Եվրահանձնաժողովը՝ պաշտոնական կայքում, հետո արդեն հայերեն թարգմանությամբ տեքստը հրապարակեց Հայաստանի ԱԳ նախարարությունը: Եվ առաջին հարցը, որ առաջ է գալիս այստեղ, այն է, թե ինչքանով էր հրապարակումը փոխհամաձայնեցված: Այսինքն՝ արդյո՞ք կողմերը պայմանավորվել էին, թե՞ Եվրամիությունը հրապարակեց, որից հետո Հայաստանի ԱԳ նախարարությունը ստիպված էր հրապարակել, քանի որ այլևս չկար պահելու իմաստ:

Սա, իհարկե, էական պահ է՝ հաշվի առնելով այն, որ տեքստի հրապարակումը կարող է կրել, այսպես ասած, կանխարգելիչ բնույթ: Հարցն այն է, թե ով և ինչ է կանխարգելում դրանով: Մի կողմից՝ Եվրամիությունը կարող է դրանով կանխարգելել, այսպես ասած, Երևանի հնարավոր մանիպուլյացիոն քայլերը, մյուս կողմից՝ Եվրամիությունն ու Երևանը կարող էին համատեղ կանխարգելել մանիպուլյացիաները, որոնք կարող են լինել ռուսական աղբյուրներից, այսպես ասած՝ ջուր պղտորելու, իսկ հետո այդ ջրում ձուկ որսալու համար: Բոլոր դեպքերում, պետք է, թերևս, արձանագրել, որ համաձայնագրի տեքստի հրապարակումը, ըստ էության, դրա ստորագրմանը նպաստող քայլ է, քանի որ առնվազն ավելացնում է ստորագրման հանձնառություն ունեցող կողմերի պատասխանատվությունը և շատ հստակեցնում դրա շրջանակը՝ միաժամանակ նաև ապահովագրելով գործընթացի եզրափակիչ փուլը տարատեսակ հնարավոր մանիպուլյացիաներից:

շարունակությունը՝ կայքում