Ի՞նչ կարևոր ապացույցներ ունի Էրդողանը

Թուրքիայի եւ Արեւմուտքի հարաբերությունների վատթարացմանը զուգահեռ ամրապնդվում են Անկարայի եւ Մոսկվայի հարաբերությունները, գրում է ermenihaber.am-ը`մեջբերելով Sputnik-ի թուրքական ծառայության հրապարակումը եւ ներկայացնելով մի քանի փորձագետների կարծիքները:

Թուրքիայի եւ արեւմտյան երկրների միջեւ առաջացած լարվածությանն անդրադարձել է Եվրոպայի թուրք ժողովրդավարների միության գլխավոր քարտուղար Բյուլենթ Բիլգին: Նրա կարծիքով՝ 2016թ հուլիսի 15-ին Թուրքիայում կազմակերպված ռազմական հեղաշրջման փորձի աջակիցները եվրոպական երկրներում, մասնավորապես՝ Գերմանիայում ապաստան ստացան: Բիլգիի գնահատմամբ՝ գործընկեր երկրների միջեւ նման կեցվածքն անընդունելի է: Նա կարծում է, որ «Իսլամական պետությանը» (ԻՊ) եւ Ալ-Քաիդային աջակցելու մեջ Արեւմուտքին մեղադրող Թուրքիայի նախագահ Ռեջեփ Թայիփ Էրդողանի ձեռքում կան ապացուցներ:

Գերմանիայի քրդական միության գլխավոր քարդուղար Ջահիթ Բաշարը խոսել է ԱՄՆ-ի` Թուրքիայի քաղաքացիներին մուտքի արտոնագրի տրամադրումը դադարեցնելու որոշման մասին: Նրա կարծիքով ԱՄՆ-ի այս որոշումը կապ ունի Թուրքիայի ռուսամետ նախաձեռնությունների, ինչպես նաեւ Անկարայի՝ Մոսկվայի եւ Թեհրանի հետ հարաբերությունների զարգացման հետ:

Ըստ Բաշարի` վերջին ամիսներին Թուրքիան Արեւմուտքին այլընտրանք ունենալու եւ որպես առաջատար երկիր իսլամական աշխարհն ուղղորդելու ազդանշաններ է տալիս:

«Մյուս կողմից Թուրքիան, Ռուսաստանի հետ բարեկամական հարաբերություններ կառուցելով, ՆԱՏՕ-ին ցույց է տալիս, որ ռազմական համակարգերի, գործընկերության եւ ռազմավարական պայմանավորվածությունների հարցում այլընտրանքներ կան»,- նշել է Բաշարը՝ հավելելով, որ սա առաջին հերթին ԱՄՆ-ին է անհանգստացրել:

Բեռլինի «Ազատ» համալսարանի պրոֆեսոր Գյուլիստան Գյուլբեյը ներկայացրել է ԱՄՆ-Թուրքիա հարաբերություներում զարգացումների մասին իր տեսակետը: Նա ԱՄՆ-ի կողմից մուտքի արտոնագրերի տրամադրման դադարեցումը համարում է ճնշման միջոց:

Գյուլբեյը մատնանշել է, որ թուրք-ամերիկյան հարաբերություններում որոշիչ գործոն է եղել Սիրիայի հարցում տարաձայնությունները:

«Թուրքիան պահանջում է, որ ԱՄՆ-ն դադարեցնի «Ժողովրդավարական միություն կուսակցության» (ԺՄԿ-PYD` քրդական կուսակցություն Սիրիայում) հետ համագործակցությունը: Կողմերի միջեւ մերձեցում չի լինի, քանի դեռ այս պահանջը չի կատարվել»: