Ինչքան համբերել ենք, հերիք է

«Հրապարակ»-ը գրում է․

Անկախության օրը սին խոստումներ տալու ու այդ խոստումները հմտորեն հաջորդին վերագրելո՞ւ տոնն է: 

Համենայնդեպս այդպես էր վերջին 20-25 տարիների ընթացքում, երբ անկախության նորանկախ նախագահները իրենց ուղերձներում երջանիկ, ապահով ու անկախ ապրելու հեռանկարը տեսնում էին ապագայում: Դա տեսնելն ու հասկանալը բարդ չէ: Կարդանք անկախության 5, 10, 20 և 25 տարվա կապակցությամբ հնչած նախագահական կոչերը, ուղերձները: Դրանք ինչ-որ տեղ արդարանալու, արդարացնելու ու սեփական կոշիկը հաջորդի ոտքը հագցնել փորձելու կոչեր են:

1996 թ․ ՀՀ առաջին նախագահ Լևոն Տեր-Պետրոսյան
Անկախության 5-րդ տարեդարձին նվիրված ուղերձում նախագահ Լևոն Տեր-Պետրոսյանը ասում էր, որ առաջիկայում ավելի մեծ հնարավորություն է լինելու զբաղվել տնտեսության զարգացման, ժողովրդի կենսամակարդակի բարձրացման, կրթության, գիտության, մշակույթի, առողջապահության բնագավառների բարեկարգման, օրինականության եւ կարգուկանոնի հաստատման հարցերով։ Իր ուղերձում ՀՀ առաջին նախագահը նշում էր. « Ես խորապես համոզված եմ, որ առաջիկա տարիները լինելու են շատ ավելի հեշտ, շատ ավելի անվտանգ, շատ ավելի ապահով, քան նախորդները։ Տարեցտարի առողջանալու է երկրի տնտեսությունը, բարելավվելու է ձեր կյանքը»:

2001 թ․ ՀՀ երկրորդ նախագահ Ռոբերտ Քոչարյան
Անկախության 10 -րդ տարեդարձին նվիրված ուղերձում Ռոբերտ Քոչարյանը նույն համոզմունքն էր հայտնում. «Համընդգրկուն բարեփոխումների արդյունքում եւ մեր բոլորի ջանքերով, համոզված եմ` Հայաստանի Հանրապետությունը կարող է դառնալ տարածաշրջանի ամենակազմակերպված, ժամանակակից տնտեսություն ունեցող, ժողովրդավարական պետություն եւ սա մեր ազգային շահերի իրականացման ամենաարդյունավետ ուղին է»:

2011 թ․ ՀՀ երրորդ նախագահ Սերժ Սարգսյան
«Կարող է»- ների շարքը լրացնելու «եկավ» անկախության 20-րդ տարեդարձի կապակցությամբ ՀՀ երրորդ ու ներկայիս նախագահ Սերժ Սարգսյանի ելույթը, որտեղ նշում էր. «Համոզված եմ, որ հայոց պետականության հաջորդ տասնամյակները լինելու են առավել արդյունավետ: Այդպիսին են լինելու նաև բոլորիս աշխատանքի շնորհիվ, ողջ հայության ջանքերի մեկտեղման շնորհիվ»:

2016 թ․ ՀՀ երրորդ նախագահ Սերժ Սարգսյան
«Մենք կարող ենք և պետք է շարունակենք կառուցել արդյունավետ երկիր, որը կպաշտպանի ազատ քաղաքացուն և ազատ հասարակությանը։ Մենք մեր ձեռքբերումները պետք է բազմապատկենք մե՛ր աշխատանքով և պաշտպանենք մե՛ր ուժերով»:

Հ․Գ․ Ակամայից հիշեցի այս տողերը․

«...Էս երկրում բոլորը խոսում են` «պետք է», «պետք է», իսկ ո՞վ պետք է այդ պետքեները իրականացնի: Մինչև այսօր ինչքան համբերել ենք, հերիք է»։