«Նորատուսցի Ալիկը» դատարան է տեղափոխվել անվասայլակով

Շենգավիթ վարչական շրջանում գտնվող գեղեցկության սրահում մեկ տարի առաջ տեղի ունեցած սպանության գործով ամբաստանյալ Ալիկ Բանդուրյանը` «Նորատուսցի Ալիկը», այսօր` հոկտեմբերի 11-ին, դատարան էր տեղափոխվել անվասայլակով:

Երեւանի Շենգավիթ վարչական շրջանի ընդհանուր իրավասության դատարանում մինչեւ դատաքննությանն անցնելը Բանդուրյանի պաշտպան Երեմ Սարգսյանը միջնորդեց փոխել իր պաշտպանյալի խափանման միջոցը եւ գրավի դիմաց ազատ արձակել նրան: Երեմ Սարգսյանը հայտարարեց, որ Բանդուրյանը լուրջ առողջական խնդիրներ ունի եւ անհապաղ քաղաքացիական հիվանդանոցում բուժման կարիք ունի:

«Ալիկ Բանդուրյանն ունի սրտի հետ կապված լուրջ խնդիրներ, զարկերակային բարձր ճնշում, ողնաշարի եւ ողնուղեղի տուբերկուլյոզ, քսան օրվա ընթացքում երկու բարդ վիրահատության է ենթարկվել եւ այսօր դատարան է տեղափոխվել անվասայլակով, մինչդեռ նրան անհապաղ բուժում է հարկավոր խիստ անկողնային պայմաններում եւ երկարատեւ խնամք, որը բնականաբար, քրեակատարողական հիմնարկում չեն կարող ապահովել: Դատարանը պետք է փոխի իմ պաշտպանյալի խափանման միջոցն ու հնարավորություն տա բուժվելու քաղաքացիական մասնագիտացված հիվանդանոցում»,- ասաց Երեմ Սարգսյանը:

Պաշտպանական կողմը հայտնեց նաեւ, որ Ալիկ Բանդուրյանը 1996թ.-ից հիվանդության թոշակ է ստանում: Մեղադրող կողմն առարկեց միջնորդությանը` նշելով, որ ազատության մեջ գտնվելով ամբաստանյալը կարող է ճնշում գործադրել ականատես վկաների վրա:

Դատարանը հեռացավ խորհրդակցական սենյակ` որոշում կայացնելու:

Նշենք, որ դատավոր Նելլի Բաղդասարյանն այսօր արգելեց տեսանկարահանում եւ լուսանկարահանում իրականացնել` հաշվի առնելով ամբաստանյալների եւ նրանց պաշտպանների ցանկությունը:

Հիշեցնենք, որ 2016թ. նոյեմբերի 13-ին Երեւանի Շենգավիթ վարչական շրջանում գործող «Լիա» գեղեցկության սրահում արձակված կրակոցների հետեւանքով երկու անձ էր մահացել: Մինչդատական վարույթում ձեռք բերված ապացույցների համակցությամբ Պետրոս Իսրայելյանին մեղադրանք է առաջադրվել Քրեական օրենսգրքի 104-րդ հոդվածի 2-րդ մասի 7-րդ կետով, Ա. Բանդուրյանին («Նորատուսցի Ալիկ»)՝ Քրեական օրենսգրքի 38-112-րդ հոդվածի 2-րդ մասի 6-րդ կետով, Ա. Գասպարյանին («Բդո»)՝ Քրեական օրենսգրքի 335-րդ հոդվածի 1-ին մասով: