«Մի քանի տարի հետո Ռուսաստանը դառնալու է չուլ»․ Հանրային խորհուրդը դեմ է ռուսերենի հայեցակարգին

Երեկ Հանրային խորհրդում քննարկվել է ռուսաց լեզվի դասավանդման հայեցակարգը, որին մասնակցել է նաև ԿԳ նախարար Լևոն Մկրտչյանը: Հանրային խորհրդի անդամներն անընդունելի են համարել նման հայեցակարգի մշակումը: Հանրային խորհրդի նախագահ Վազգեն Մանուկյանն էլ կարծիք է հայտնել, որ այնպիսի տպավորություն է, որ դա պայմանավորված է կա՛մ ռուսների ճնշմամբ, կա՛մ մեր ցանկությամբ՝ հաճոյանալու ռուսներին, ինչը երկու դեպքում էլ վիրավորական է և անընդունելի:

Հանրային խորհրդի անդամ Արշակ Սադոյանն այն կարծիքին է, որ շատ վտանգավոր մոտեցում է որդեգրվում, ընդհանրապես իմաստ չունի այդ ճանապարհով գնալ: «Առաջին լրատվական»-ի հետ զրույցում Արշակ Սադոյանը քննարկումից մանրամասներ հայտնեց: «Մասնավորապես իմ այն հարցին, թե նախարարը արդյոք փորձո՞ւմ է պատկերացնել, թե 10-15 տարի հետո աշխարհում ինչ կլինի, և լեզուների իմացությունը ո՞ր ուղղությամբ կզարգանա, ինքն ուղղակի պատասխան չկարողացավ տալ: Եվ բնական է, որ այն, ինչ արվում է, հյուսիսային հարևանին հաճոյանալու համար է արվում, որը պետք է ամբողջությամբ դատապարտել»,- ասաց Արշակ Սադոյանը: Հանրային խորհրդի անդամը մտահոգություն հայտնեց, որ նման քայլ որդեգրում է ՀՅԴ ներկայացուցիչը:

«Զարմանալի է, թե, օրինակ, ինչու պետք է ռուսաց լեզվի առանձին հայեցակարգ լինի, պատասխանը լինում է այն, որ իրենց տառերը լատինականի նման չեն: Ասում ենք՝ այ մարդ, մի երկու խազի պատճառով առանձին հայեցակարգ պետք է լինի՞»,- հավելեց Արշակ Սադոյանը: Նրա խոսքով՝ նախարարը որևէ լուրջ հիմնավորում չի բերել, թե ինչու են ռուսաց լեզվի հայեցակարգ մշակել: Նրա կարծիքով՝ հանրությունը պետք է շարունակի պայքարը, որպեսզի նման վտանգավոր բան կյանքի չկոչվի:

«Առանց պատկերացնելու՝ ինչ են անում, փորձում են ապագայում աշխատանքային գործունեության մեջ մտնող երիտասարդներին դատապարտել հաճոյանալու մտքով, որ մեր երիտասարդները լինեն աշխարհի կորած-մոլորած մի մասնիկ՝ հեռու քաղաքակրթական զարգացումներից»,- ասաց Արշակ Սադոյանը:

Իսկ թե ով է ուզում հաճոյանալ հյուսիսային բարեկամին՝ Հանրային խորհրդի անդամը նշեց, որ չի տեսնում իշխանության անմիջական թելադրանք, պարզապես փորձում են ներքին պատկերացմամբ՝ ում ինչ դուր կգա, նման քայլեր անել, և իրենց թվում է, որ ավելի վերևիններին էլ դա դուր կգա:

«Միանշանակ դատապարտում եմ, սա դավաճանություն է հայ ժողովրդի ապագայի հանդեպ: Գնալ եվրասիական ճանապարհով և փորձել աշխարհին պարտադրել ռուսաց լեզուն, բնական է, որ բոլորս էլ հասկանում ենք՝ ապուշություն է, և հնարավոր չի լինի: Եվ քանի որ այսօրվա սովորողները 10-15 տարի հետո են մտնելու կյանք, աշխատանքային գործունեության, նրանց ապագան ուղղակի խորտակվում է, որովհետև ստիպված են լինելու ավելի շատ ժամանակ տրամադրել ռուսաց լեզվին, բայց որ ի՞նչ, թող անգլերենին տրամադրեն, անգլերենը դարձել է համաշխարհային լեզու՝ Եվրոպայում բոլոր խորհրդակցությունները անգլերենով են, անգլերենը դարձել է գիտության, միջազգային հարաբերությունների լեզու»,- ասաց նա՝ հավելելով, որ չի կարող լինել ռուսական քաղաքակրթություն, քանի որ չկա այդ քաղաքակրթությունը: Եվ եթե խոսք է գնում աշխարհի մասին, ապա, Արշակ Սադոյանի խոսքով, եկեք չինարեն սովորենք, քանի որ տասը տարի հետո Չինաստանը շատ ուժեղ է լինելու, իսկ Ռուսաստանը դառնալու է «չուլ»:

մանրամասն՝ կայքում