«Հայրն էլ պետք է մահանար, ինքն էլ, որ նոր հանգստանայի՞ն»․ Շարմազանովը՝ Խաչիկյանի ազատ արձակման մասին

Tert.am / Պետք չէ ՀՀ նախագահի ներման հրամանագրերը քաղաքականացնել, կուսակցականացնել`հատկապես, երբ Նախագահի հրամանագրերը չեն մեկնաբանվում: Նախագահն օրենքով սահմանված կարգով ներում է շնորհել Վազգեն Խաչիկյանին՝ ոչ թե կուսակցական պատկանելության համար։

Tert.am-ի հետ զրույցում այս մասին հայտնեց ՀՀԿ խոսնակ, ԱԺ փոխնախագահ էդուարդ Շարմազանովը՝ անդրադառնալով Սոցիալական ապահովության պետական ծառայության նախկին պետ Վազգեն Խաչիկյանի՝ ՀՀ նախագահին ուղղված ներման խնդրագրի բավարարմանը:

Նշենք, որ 2014-ից Վանաձորի ՔԿՀ-ում իր պատիժը կրող Սոցիալական ապահովության պետական ծառայության նախկին պետ Վազգեն Խաչիկյանի այսօր ազատ արձակումն արդեն իսկ բուռն քննարկումների տեղիք է տվել, մասնավորապես այն մասով, թե երբ դատարանի վճռով կոռուպցիայի համար դատապարտված նախկին բարձրաստիճան պաշտոնյան սահմանված 12 տարի ժամկետով պատժի փոխարեն 3 տարին է կրում, ինչ ազդակ կարող է դառնալ սա հասարակության և հենց պաշտոնյաների համար` կոռուպցիայի դեմ պայքարի համատեքստում:

«Վազգեն Խաչիկյանը, որը 5 տարի նստած է եղել, ներման դիմում է գրել։ Նշել է ընտանեկան վիճակը՝ ծնողների հետ կապված ուներ ընտանեկան լուրջ պրոբլեմներ. հայրն էլ, մայրն էլ քաղցկեղով հիվանդ էին, մայրն այս ընթացքում քաղցկեղից մահացել է։ Նա նաև զղջացել է իր արարքի համար, ներման խնդրագիրը գրել է, պարոն Նախագահն էլ օրենքով սահմանված կարգով ներում է շնորհել»,- մեկնաբանեց Էդուարդ Շարմազանովը:

Էդուարդ Շարմազանովը նաև նշեց, որ Խաչիկյանը 3 տարի չէ իր պատիժը կրել, այլ 5 ( նկատի ունի, որ դատաքննության ընթացքում անազատության մեջ գտնվելու ժամանակահատվածը հանվում է ազատազրկման պատժաչափից–խմբ.)։

Հիշեցնենք, որ Վազգեն Խաչիկյանը 2014 թվականի դեկտեմբերի 8-ին դատապարտվել է 12 տարվա ազատազրկման՝ 261 միլիոն ՀՀ դրամ գույքի բռնագրավմամբ։

Վազգեն Խաչիկյանին և Սոցիալական ապահովության պետական ծառայության մի շարք աշխատակիցների մեղադրանք էր առաջադրվել առ այն, որ վերջիններս 2006–2010թթ. ընկած ժամանակահատվածում, օգտագործելով իրենց պաշտոնեական դիրքը, կենսաթոշակի կասեցված վճարումը վերսկսելու վերաբերյալ վճարման իրավունք վերապահող կեղծ դիմումներ պատրաստելով կամ առանց այդ դիմումների վճարային ցուցակներում կենսաթոշակառուների ստորագրությունները կեղծելու միջոցով անհիմն ելքագրել և յուրացման եղանակով հափշտակել են իրենց վստահությանը հանձնված, մահացած կամ ՀՀ տարածքից բացակայող կենսաթոշակառուների թոշակները։

Ըստ մեղադրանքի՝ Վազգեն Խաչիկյանը խարդախությամբ հափշտակել է պետական բյուջե վերականգնման ենթակա, առանձնապես խոշոր չափերի` 29 միլիոն ՀՀ դրամ գումար:

Ի պատասխան հարցի, թե ամեն դեպքում, հիմնական շեշտադրումն այն է, որ Խաչիկյանի կոռուպցիոն սկանդալը շատ «տգեղ մեղադրանքների» էր վերաբերում, և ինքն էլ դատարանի վճռով դատապարտված է, այսինքն՝ չկա անգամ անմեղության կանխավարկած, իսկ նա էլ ընդդիմության ներկայացուցիչ չէ, որ հնարավոր լիներ խոսել քաղաքական մեղադրանքների մասին, ՀՀԿ խոսնակն ասաց. «Խաչիկյանին որևէ մեկը չի արդարացնում կամ ռեաբիլիտացնում, Վազգեն Խաչիկյանը մարդ է, որը սխալվել է, նրան ներում է շնորհվել և Խաչիկյանն ինքը, կրկնում եմ, այնպես չէ, որ իր ազատազրկումը չի կրել: Ի վերջո, մարդիկ ինչո՞ւ են նստում. նստում են, որ ուղղվեն: Բացի դրանից` մի քիչ քրիստոնյա եղեք, այդ ի՞նչ ասելու բան է՝ հայրն էլ պետք է մահանար, ինքն էլ, որ նոր հանգստանայի՞ն... Մի քիչ քրիստոնյա եղեք, մարդ, որ գաղութից դուրս է եկել, ասեք՝ աչքդ լույս լինի, շնորհավորում ենք: Եվ այդ ո՞վ սխալական չէ, հիմա մեծ-մեծ կարող է խոսեն, թող իրենց հայելու մեջ նայեն: Իրենք սրբե՞ր են: Եվ հայտնի խոսք կա՝ թող առաջինը քար նետի նա, ով մեղավոր չէ: Եվ թող որևէ մեկն իր վրա դատավորի ֆունկցիա չվերցնի»:

Որպես ամփոփում` ՀՀԿ խոսնակն ասաց. «Խաչիկյանը կլինի, Պողոսյանը, թե Պետրոսյանը, եթե մարդ գաղութից դուրս է գալիս, պետք է ասել՝ շնորհավոր»:

Հարցին էլ, թե Խաչիկյանը շարունակո՞ւմ է մնալ Հայաստանի Հանրապետական կուսակցության անդամ, Է. Շարմազանովը պատասխանեց, որ ըստ կուսակցության կանոնադրության՝ ՔԿՀ-ում լինելու ժամանակ կուսակցական տոմսը սառեցվում է։

«Ինքն իմ ընկերն է, հարց կա՞, Վազգեն Խաչիկյանն իմ ընկերն է եղել ինչպես այն ժամանակ, այնպես էլ գաղութում, և այնպես էլ՝ դուրս գալուց հետո: Իրեն էլ շնորհավորում եմ։ Եվ մի կապեք մարդկային հարաբերությունները քաղաքական հարաբերությունների հետ»,–ասաց Շարմազանովը:
Հարցին էլ, թե եթե Խաչիկյանը ցանկություն հայտնի վերադառնալ կուսակցություն, կընդունե՞ն, Էդուարդ Շարմազանովը պատասխանեց, որ նման հարց չի քննարկվել: