Եվրամիության կողմնակիցների թիվը կտրուկ աճել է. հարցում

Հայաստանի բնակչության մեծ մասը կողմնակից է Եվրամիությանը, դեմ է ԵՏՄ անդամակցությանը: Այս մասին այսօր հրավիրած ասուլիսում ասաց «Հասարակական հետազոտությունների առաջատար խումբ» ՀԿ նախագահ Ռուբեն Սարգսյանը՝ ներկայացնելով «Դեպի Հյուսիս, թե Արևմուտք. դիրքորոշումներ» հետազոտության արդյունքները: Հետազոտությունն իրականացվել է ՀՔԱ Վանաձորի գրասենյակի հետ միասին, այս տարվա մայիսին, Հայաստանի բոլոր մարզերում, այդ թվում՝ Երևանում: Հարցվածները 18 տարեկանից բարձր անձինք են եղել:
Այս հետազոտությունն իրականացվում է 2014 թվականից՝ ներկայացնելով հասարակության դիրքորշման փոփոխության դինամիկան: 2017 թվականի արդյունքներով՝ Եվրամիության կողմնակիցները կազմել են հարցվածների 33 տոկոսը: Նրանք այն քաղաքացիներն են, ովքեր ցանկացել են, որ Հայաստանն անդամակցի Եվրամիությանը: Իսկ ԵՏՄ անդամակցությանը կողմ են եղել 32 տոկոսը: Հարցվածների 12 տոկոսը երկու բլոկին էլ կողմ են արտահայտվել, իսկ 10 տոկոսը՝ ոչ մի կառույցի, 12 տոկոսը դժվարացել է պատասխանել, իսկ 1 տոկոսն ընդհանրապես հրաժարվել է պատասխանից:
Ռուբեն Սարգսյանը ներկայացրեց հետազոտության դինամիկան վերջին երեք տարիների կտրվածքով: Ըստ նրա՝ ակնհայտ երևում է, որ 2014-2017 թվականներին Եվրամիության կողմնակիցների թիվը հստակ աճում է, իսկ ԵՏՄ կողմանկիցների թիվը՝ նվազում: Եթե 2014 թվականին ԵՏՄ կողմնակիցները կազմել են հարցվածների 38 տոկոսը, ապա արդեն 2017 թվականին՝ 32 տոկոսը:
Հետազոտության հեղինակները նաև դիտարկել են հարցը, թե ո՞րն է պատճառը, որ ԵՏՄ կողմնակիցների թիվը գնալով նվազում է: «Մեր կարծիքով, դա կապվում է ապրիլյան պատերազմի և դրանում Ռուսաստանի Դաշնության ներգրավվածության հետ: Նկատի ունենք Արդբեջանին ՌԴ կողմից զինամթերքի մատակարարումը: Դա է փաստում այն, որ 2016 թվականին ԵՄ կողմնակիցների թիվը, ըստ հետոզոտության, կտրուկ աճել է: Մենք նկատել ենք, որ Ռուսաստանի նկատմամբ բացասական վերաբերմունքն ազդեցություն ունի ԵՏՄ-ին դեմ լինելու դիրքրոշման վրա», ասաց Սարգսյանը:
Գրեթե բոլոր մարզերում ԵՄ կողմնակիցների թիվն աճում է, բացառությամբ Լոռու ու Վայոց Ձորի մարզերի, որտեղ ԵՏՄ կողմնակիցներն ամենաշատն են: Իսկ Եվրամիության կողմնակիցների թիվը մեծ է Տավուշում ու Շիրակում:
Հետազոտությունը նաև հետաքրքիր պատկեր է բացահայտել: Պարզվում է, որ Եվրամիության կողմնակիցները հիմնականում 18-45 տարեկան անձինք են, մեծամասնությունը իգական սեռի ներկայացուցիներ, բնակվում են հիմնականում քաղաքային բնակավայրերում: Երևանի բնակիչներն ամենաշատն են կողմ Եվրամիությանը: ԵՄ կողմնակիցները հիմնականում ամսական 150 հազար դրամից ավելի եկամուտ ունեցողներն են:
ԵՏՄ կողմնակիցները 45 տարեկանից բարձր մարդիկ են, հիմնականում արական սեռի ներկայացուցիներ, բնակվում են գյուղերում և ամսական մինչև 150 հազար դրամ եկամուտ ունեն:
Ռուբեն Սարգսյանի խոսքով՝ գյուղական բնակավայրերում ամենաշատն են ԵՏՄ-ին կողմ, որովհետև այնտեղից արտագնա աշխատանքերի են մեկնում Ռուսաստան:
Բարձր տարիքի մարդիկ են կողմնակից ԵՏՄ-ին, որովհետև նրանք այդ կառույցը համեմատում են ԽՍՀՄ-ի հետ և հույս ունեն, որ դրանով վերականգնվելու է անցյալը:
Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցի խոսով՝ Եվրամիության կողմնակիցների ակնկալիքներն ավելի մեծ են, որ հենց Եվրամիությանն անդամակցելով՝ Հայաստանի պետական կառույցների աշխատանքն ավելի արդյունավետ կլինի: Նա նշեց, որ պետք է ուշադրություն դարձնել այն հարցին, որ ոչ միայն ԵՄ կողմնակիցների թիվն ավելի մեծ է, այլ նաև թե որ գործոններով են պայմանավորված տարեցտարի նկատվող այս փոփոխությունները: