Ճնշումներ Միսս Թուրքիայի վրա․ աղջիկն ստիպված է եղել ջնջել իր սոց․ էջը

Նախօրեին իր թվիթերյան գրառման պատճառով տիտղոսից զրկված արդեն նախկին «Միսս Թուրքիա Աշխարհ-2017» Ըթըր Էսենը ստիպված է եղել ջնջել սոցցանցի իր հաշիվը՝ ստացած բազմաթիվ վիրավորանքների ու սպառնալիքների պատճառով, գրում է թուրքական «Բիրգյուն» պարբերականը:

Նշենք, որ գեղեցկության մրցույթի հաղթող ճանաչված աղջիկը թագից զրկվել է մրցույթի հենց հաջորդ օրը: Նման սկանդալային որոշման պատճառ է դարձել գեղեցկուհու՝ Թուրքիայում 2016թ.-ին տեղի ունեցած հեղաշրջման փորձի զոհերի նկատմամբ ցուցաբերած անարգանքը:

Հեղաշրջման փորձի առաջին տարելիցին՝ 2017թ.-ի հուլիսին, Էսենն այսպիսի հեգնական գրառում էր կատարել Twitter-ի իր էջում. «Հուլիսի 15-ին մեր նահատակների օրը նշելու առիթով ամսականներս սկսվեցին: Օրը նշում եմ մեր նահատակների արյունը խորհրդանշող արյունահոսությամբ»:

Էսենի՝ թագից զրկվելու արդյունքում նրա փոխարեն «Միսս Թուրքիա Աշխարհ-2017» տիտղոսը տրվել է երկրորդ տեղում հայտնված մասնակցին՝ Ասլը Սյումենին:

Հիշեցնենք, որ 2016-ի հուլիսի 15-ին Թուրքիայում տեղի է ունեցել ռազմական հեղաշրջման փորձ: Դրան հաջորդել են ձերբակալությունները երկրի զինված ուժերում և այլ կառույցներում, փակվել են բազմաթիվ թերթեր, կազմակերպություններ, կենտրոններ, երկրում հայտարարվել է արտակարգ դրություն: Հեղաշրջման փորձի համար Թուրքիայի նախագահ Ռեջեփ Թայիփ Էրդողանը մեղադրում է «Հիզմեթ» («Ծառայություն») կրոնական շարժման հիմնադիր և իր հակառակորդ Ֆեթուլլահ Գյուլենին: