Ինչպես կանխարգելել արգանդի միոմայի առաջացումը

Արգանդի միոման (մկանուռուցք) բավական լուրջ հիվանդություն է, որը ժամանակին չբուժելու դեպքում կարող է մեծ խնդիրներ առաջացնել: Սակայն այն, ինչպես և ցանկացած այլ հիվանդություն, շատ ավելի ճիշտ կլինի կանխարգելել, քան բուժել:

Ցավոք՝ այս հիվանդության հարցում նույնպես շատ մեծ նշանակություն ունի գենետիկ գործոնը: Ընտանիքում ու հարազատների շրջանում արգանի միոմայից տառապած ազգականների առկայությունը զգալիորեն մեծացնում է հիվանդության առաջացման հավանականությունը, իսկ եթե դրա հետ մեկտեղ նկատվում է նաև վաղաժամ սեռական հասունություն (մինչ 11 տարեկանը լրանալը), ապա այդ հավանականությունն առանձնահատուկ մեծ է լինում:

Սա, իհարկե, չի նշանակում, որ հիվանդությունը վաղ թե ուշ անպայման ի հայտ կգա: Բացի այդ, կարելի է նաև ինքնուրույն նպաստել մկանուռուցքի առաջացման հավանականության նվազմանը:

Այս խնդրից խուսափելու համար առաջին հերթին հարկավոր է ժամանակին ուշադրություն դարձնել կանացի գործառույթներին և մինչ 25 տարին լրանալը մի քանի երեխա լույս աշխարհ բերել ու խուսափել հղիության արհեստական ընդհատումներից:

Շատ մեծ նշանակություն ունի նաև ավելորդ քաշի կուտակումից խուսափելը, քանի որ կանանց հորմոնները, որոնք սինթեզվում են ճարպային հյուսվածքներում, շատ մեծ նշանակություն ունեն արգանդի միոմայի զարգացման հարցում:

Գոյություն ունեն նաև այլ պոտենցիալ ռիսկային գործոններ (օրինակ՝ էկոլոգիական ու սննդային), որոնք նույնպես կարող են ազդել հիվանդության զարգացման ընթացքի և դրա հետևանքների վրա, սակայն այդ գործոնները դեռ ամբողջությամբ ուսումնասիրված չեն, ուստի դրանց մասին խոսելը դեռ վաղ է:

Սակայն գոյություն ունի մի գործոն, որը, կարելի է ասել, ամենակարևորն է: Չնայած դրան՝ այս գործոնից ազատվելն ամենահեշտն է, քանի որ դա կնոջ վերաբերմունքն է սեփական առողջության հանդեպ: Հարկ է հիշել, որ առողջության հանդեպ ոչ մի դեպքում չի կարելի անտարբեր լինել:

Կանանց համար շատ կարևոր է տարեկան երկու անգամ գինեկոլոգի հետ խորհրդակցելն ու պարբերաբար ուլտրաձայնային հետազոտություն անցնելը: Այս կերպ հնարավոր կլինի հայտնաբերել մկանուռուցքը զարգացման վաղ փուլերում և հեշտությամբ ազատվել դրանից՝ խուսափելով վիրահատական միջամտությունից: